Новиот американски претседател Џо Бајден денеска го одржал првиот телефонски разговор со неговиот руски колега, пренесе Белата куќа, додавајќи дека тој се соочил со претседателот Путин за низа прашања, почнивајќи од неодамнешниот кибер напад на американската компанија „Солар виндс“ до сомневањата за труење на водечкиот руски опозиционер, Алексеј Навални.

„Владимир Путин му честиташе на Џозеф Бајден за почетокот на работата во својство на претседател на САД. Истакна дека нормализацијата на односите меѓу Русија и САД би била од интерес на двете земји и со оглед на нивната одговорност за оддржување на безбедноста и стабилноста во светот, тоа би било од интерес и на меѓународната заедница“, се вели во соопштението за разговорот кое го објави Кремљ.

Прес-секретарката на Бајден, Џен Псаки рече дека тој го започнал телефонскиот повик со намера да разговара за СТАРТ (Договор за ограничување на стратешкото нуклеарно вооружување), кој администрацијата на Бајден се надева дека ќе го продолжи, руската агресија во Украина, кибер нападот на „Солар виндс“ чиј обем сè уште се утврдува, извештаите дека Русија давала награди за елиминација на американски војници кои служат во Авганистан, мешањето на Москва во претседателските избори во САД и труењето на Алексеј Навални.

„Неговата намера беше да разјасни дека Соединетите држави ќе дејствуваат цврсто во одбрана на нашите национални интереси како одговор на малигните активности на Русија“, рече Псаки, истакнувајќи дека повикот се случил за време на нејзиниот брифинг и дека поцелосно резиме ќе објави подоцна.

Според информациите од светските медиуми, кај двете страни има волја во најскоро време да ги завршат неопходните процедури за натамошно функционирање на договорот за заемно ограничување на ракетно-нуклеарните арсенали.

Договорот истекува на 5 февруари.

Повикот дошол на барање на Москва, соопштија американски дипломатки извори, кои додаваат дека Бајден сакал најпрво да разговара со европските лидери и неговите советници пред да оствари телефонски разговор со Путин.

Полицијата задолжена за обезбедување на зградата на американскиот Конгрес се извини за пропустите за време на упадот од страна на приврзаниците на поранешниот претседател Доналд Трамп на 6 јануари.

Официјалните лица признаа голем број грешки: разни информации, недоволна подготовка и мобилизација на партнерските агенции. Тие повикаа на подобрени канали за комуникација и подобри системи за отчетност.

„Тука сум да ги искажам моите најискрени извинувања во име на одделот“, рече Јоланда Питман, шефица на полицијата на Конгресот, во подготвена изјава за Комисијата за надзор на јавните финансии на Претставничкиот дом.

„Одделот не ги исполни своите високи стандарди ниту, пак, вашите“, додаде таа.

Питман рече дека повеќето од полицајците што биле на должност на 6 јануари денес страдаат од посттрауматско стресно нарушување.

Во упадот на приврзаниците на Трамп, кои сакаа да ја запрат, но само на неколку часа ја одложија потврдата на победата на Џо Бајден, загинаа пет лица, меѓу кои и еден полицаец.

Шефицата на полицијата рече дека немирите се индиректно поврзани со смртта на уште еден полицаец.

Поранешните началници на конгресната полиција во меѓувреме поднесоа оставка и неколку недели по нападот и во пресрет на инаугурацијата на Бајден на 20 јануари повеќе од 20.000 припадници на Националната гарда беа испратени во центарот на Вашингтон. Речиси 5.000 од нив ќе останат во главниот град на САД до средината на март.

Германската полиција во Берлин уапсила 30-годишен колега од Бамберг, кој е осомничен за неколку кражби, пренесува „Б92“.

Уапсениот полицаец веќе подолго време бил на боледување, соопштила полицијата.

Тој е осомничен дека заедно со еден соучесник, кој исто така е уапсен, извршил повеќе злосторства во Баварија.

Наводно, на 14 јануари во Бамберг тој насилно украл скап мобилен телефон од една жена, што потоа преку интернет го понудил на продажба.

Истата вечер тие украле автомобил од една личност во Швајнфурт.

Следниот ден со тоа возило влетале во излогот на една златарница во Бамберг и украле накит вреден повеќе од 100.000 евра.