Американската Амбасада во Ерусалим беше отворена и покрај смртоносните судири во Појасот Газа.

Церемонијата за преместување на Амбасадата почна со химната на САД, по што американскиот амбасадор во Израел, Дејвид Фридман, одржа говор. Присутните ракоплескаа при споменувањето на името на американскиот претседател, Доналд Трамп, и локацијата на амбасадата – Ерусалим, Израел, пишува „АФП“.

Заменик-државниот секретар на САД, Џон Саливан, ја предводеше делегацијата, меѓу кои и ќерката на Трамп, Иванка, како и нејзиниот сопруг, Џаред Кушнер, кои имаат високи позиции во Белата куќа. На церемонијата присуствуваа околу 800 луѓе.

Претходно, крвави судири го опфатија Појасот Газа, при што според последните информации, загинаа 52 Палестинци, а илјадници се повредени, што претставува најкрвавиот ден од почетокот на протестите на 30 март.

Десетици илјади луѓе се собраа во близина на границата во знак на протест, а мала група демонстранти почнаа да фрлаат камења и да се приближуваат до оградата, пришто снајперистите од израелската страна отворија оган.

Статусот на Ерусалим е најголемиот проблем во израелско-палестинскиот конфликт.