Во судир меѓу автобус и камион на автопатот во областа Асијут во Египет загинаа 20 лица, а три лица беа повредени, соопшти денеска Министерството за здравство на Египет.

Автобус со патници од Каиро доцна синоќа удри во камион натоварен со бетон, кој запрел поради дефект на пустинскиот дел од автопатот во Горен Египет, во областа Асијут, оддалечен околу 370 километри од главниот град, пренесува „Ројтерс“.

Во соопштението на локалните власти се наведува дека автобусот изгорел кратко по судирот, како и дека спасувачите одвај ги извлекле телата на загинатите и повредените.

На местото на настанот пристигнале 36 возила на брза помош, соопшти Министерството за здравство.

Претседателот на Европскиот совет, Чарлс Мишел, претстави план за подобрување на распоредот за седење и за еднакво право на говор со претседателката на Европската комисија, Урсула фон дер Лајен, за време на меѓународните посети, во светло на инцидентот познат како „софагејт“.

За време на неговата прва средба со фон дер Лајен по инцидентот од минатата недела, на приемот кај турскиот претседател Таип Ердоган, Мишел повикал на заедничко разбирање во однос на билатералните самити на кои учествуваат двајцата претседатели, пренесува весникот „Политико“, кој имал увид во документот презентиран од Мишел.

Текстот на документот ветува дека поголемо внимание ќе се посвети на распоредот на места за седење, со цел да се обезбеди достоинствен третман на двајцата претседатели, почитувајќи го протоколарниот ред.

Протоколарните оддели на двете институции се исто така поканети да бидат вклучени во подготовката на состаноците.

Мишел и фон дер Лајен вчера се појавија пред политичките лидери во Европскиот парламент за да разговараат за скандалот со седењето.

Според парламентарните власти, Мишел неколку пати се извинил за своето однесување во Анкара, додека Фон дер Лајен изразила непријатност.

Со зголемување на военото присуство на границата со Украина, Русија ја тестира реакцијата на другите земји на ваквите активности, смета германската министерка за одбрана Анегрет Крамп-Каренбауер.

„Руската страна прави се за да предизвика реакција, а ние, заедно со Украина, не сакаме да учествуваме во таа игра“, рече министерката за телевизијата АРД.

Таа изрази надеж дека нема да има понатамошна ескалација на тој конфликт и посочи дека НАТО ќе дејствува разумно, за што ги повика и другите земји.

„Украина досега реагираше мудро. Ние во Алијансата ќе го сториме истото “, рече таа.

Зборувајќи за претходната најава дека повеќе од десет бродови на руската касписка флота ќе преминат во Црното Море како дел од инспекцијата, германската министерка рече дека, доколку официјална Москва ги изврши вежбите, тие мора да бидат во согласност со меѓународните стандарди.

„Ако сè е како што вели руската страна, тоа е вежба, тогаш се пропишани меѓународни правила во согласност со кои се формира транспарентност и доверба“, додаде таа.

Претходно, САД и европските земји изразија загриженост за движењето на руските сили во близина на границата со Украина.

Ставот на Москва е дека преместувањето на руската армија на територијата на Русија не треба да ги загрижува другите земји, бидејќи тоа не ги загрозува на кој било начин.