Генералниот секретар на НАТО, Марк Руте, доцна синоќа изјави дека на состанокот со Доналд Трамп не било разговарано дали Гренланд ќе остане под Данска, откако американскиот претседател ги повлече заканите за царини против европските земји и ја исклучи можноста за употреба на воена сила за преземање на контролата врз Гренланд.

Руте ги даде своите коментари во интервју за Фокс њуз по состанокот со Трамп на маргините на самитот во Давос.

Претходно во текот на денот, Трамп нагло се повлече од заканите за воведување царини, ја исклучи можноста за употреба на сила и рече дека е на повидок договор за завршување на спорот околу данската територија.

По средбата со Руте, Трамп изјави дека западните арктички сојузници би можеле да постигнат нов договор за стратешки важната островска територија со 57.000 жители, што би ја задоволило неговата желба да ја изгради Златната купола, систем за ракетна одбрана и пристап до критични минерали, а воедно да ги блокира руските и кинеските амбиции на Арктикот.

Трамп претходно постојано повторуваше дека Вашингтон мора да го поседува Гренланд, автономен дел од Кралството Данска во кој се наоѓа американска воздухопловна база, за да ги спречи Русија или Кина да ја окупираат стратешки лоцираната територија богата со минерали.

На Руте му беше поставено прашање дали Гренланд ќе остане „под Кралството Данска во овој рамковен договор“ што го спомена Трамп.

„Тоа прашање не беше повторно покренато во моите разговори со претседателот вечерва“, одговори Руте.

„Тој (Трамп) е многу фокусиран на она што треба да го направиме за да се осигураме дека можеме да го заштитиме тој огромен арктички регион, каде што се случуваат промени токму сега, каде што Кинезите и Русите се сè поактивни“.

Но, „сè уште има многу работа што треба да се направи“ за да се постигне договор за Гренланд, изјави шефот на НАТО за АФП по средбата.

„Средбата вечерва беше многу добра. Но, сè уште има многу работа“, рече Руте.

Претходно истиот ден, Доналд Трамп тврдеше дека двајцата лидери развиле „рамка за иден договор за Гренланд“.

Данска и САД се членки на НАТО. Многу експерти ја оценуваат надворешнополитичката агенда на Трамп како империјалистичка.

Рускиот претседател Владимир Путин најави средба за денес со американските пратеници Стив Виткоф и Џаред Кушнер, кои се задолжени да најдат решение за речиси четиригодишната војна на Русија во Украина.

Путин, цитиран од руските новински агенции, вчера за време на состанокот на Рускиот совет за безбедност изјави дека ќе разговара со американските пратеници за можната употреба на замрзнатите руски средства во врска со работата за обнова во регионите погодени од војна.

„Оваа можност се дискутира и со претставници на американската администрација“, го цитираа руските новински агенции. Путин рече дека ќе разговара за употребата на средствата и со палестинскиот претседател Махмуд Абас, кој денес треба да се сретне со рускиот лидер.

Путин, исто така, му рече на Рускиот совет за безбедност дека Министерството за надворешни работи сè уште го проучува предлогот на американскиот претседател Доналд Трамп за приклучување кон Одборот за мир и дека ќе одговори навреме. Тој нагласи дека предлогот го гледа првенствено како дел од напорите за решавање на конфликтот на Блискиот Исток.

Но, дури и пред каква било одлука за приклучување кон Одборот, Путин рече дека Москва е подготвена да обезбеди 1 милијарда долари што Трамп ги бара за долгорочно членство од замрзнатите средства „со оглед на посебните односи на Русија со палестинскиот народ“.

Доцна синоќа во Конгресниот центар во Давос за време на Светскиот економски форум беше активиран противпожарен аларм. Претседателот на САД, Доналд Трамп, исто така, бил во зградата во тоа време, објави швајцарската новинска агенција Keystone-SDA, пренесе Анадолија.

Портпаролот на кантоналната полиција на Граубинден изјави дека до среда вечерта сè уште не е познато што точно го предизвикало инцидентот.

Трамп бил во зградата кога се вклучил алармот, каде што претходно одржал говор во текот на денот.

Полицијата соопшти дека нема повредени, а дополнителни пожарникари, полиција и амбулантни возила биле испратени на местото на настанот за секој случај, со оглед на зголемените безбедносни мерки за време на форумот.

🚨 BREAKING — DAVOS UNDER FIRE

Reports say the WEF conference centre has been EVACUATED amid an emergency response.

Firefighters everywhere. Helicopters overhead. Local media cite a fire at a nearby hotel.

LA7 reporter on scene: “It’s full of firefighters… this is an… pic.twitter.com/CuEieomSqy

— Conflict Alarm (@ConflictAlarm) January 21, 2026

Се запали и штанд за фонду
Ова е втората вонредна ситуација поврзана со пожар во Давос. Според полицијата, се запали и штанд за фонду во близина на хотелот, поради што гостите беа привремено евакуирани. Немаше повредени ниту во тој инцидент.