Американскиот претседател Доналд Трамп планира да го напушти Вашингтон утрото на денот на инаугурацијата на својот наследник Џо Бајден, на 20 јануари, пренесе Ројтерс.

Трамп, кој веќе соопшти дека нема да присуствува на инаугурацијата, планира да одржи проштален настан во базата Ендрјуз во близина на Вашингтон, во која е стациониран претседателскиот авион Ер форс уан.

Според извори на Ројтерс, тој потоа ќе отпатува во Палм Бич на Флорида, во својот клуб Мар-а-Лаго.

Италијанскиот премиер Џузепе Конте издаде указ со кој се продолжуваат рестрикциите за контрола на ширењето на коронавирусот, откако Министерството за здравство предупреди дека епидемиолошката состојба се влошува.

Новата наредба го продолжува ноќниот полициски час од 22 до 5 часот наутро до 5 март, а системот на зони останува во сила, со што се делат 20 италијански региони на различни нивоа на инфекција.

Спортските сали и базените ќе останат затворени низ цела Италија, а продажбата на храна нема да биде дозволена по 18 часот, пренесува „Гардијан“.

Со указот се продолжува забраната за движење меѓу регионите до 15 февруари, а граѓаните ќе можат да патуваат само поради работа, здравје или други итни случаи.

Скијачките центри остануваат затворени до 15 февруари.

Владата најави дека повеќето мерки ќе бидат укинати во региони каде стапките на инфекции се доволно ниски.

Федералните обвинители на САД во поднесокот до судот тврдат дека толпата што упадна во зградата на Капитол сакала да ги фати и убие избраните пратеници, пренесува „Гардијан“.

Тужителите ја направија таа процена во поднесокот до судот со кој се бараше притвор за Џејкоб Ченсли, снимен во зградата на Капитол со рогови на главата.

Барањето за притвор, напишано од обвинителите во Аризона, детаљно наведува што направил Ченсли во Капитол. Меѓу другото, се наведува дека тој му оставил порака на потпретседателот на САД, Мајк Пенс, во која гласи: „Правдата доаѓа, прашање на време е“.

„Силните докази, кои ги вклучуваат зборовите и постапките на Ченсли во Капитол, ја поддржуваат тезата дека демонстрантите сакале да ги фатат и убијат избраните американски службеници“, се вели во поднесокот.

Чансли треба да се појави на суд в понеделник, а неговиот полномошник по службена должност не даде коментар за поднесокот.

Обвинителите и федералните агенти поведуваат посериозни обвиненија за насилство во Капитол, пишува „Гардијан“ повикувајќи се на примерот на пензионираниот пожарникар Роберт Санфорд, кој фрлил апарат за гаснење пожар во главата на еден од полицајците, и Питер Стагер, кој е обвинет за удирање друг офицер со стап, на кој имало американско знаме.