Свет
СЗО: Стапката на новозаразени се ближи до нов рекорд
Бројот на нови случаи на коронавирус во светот на неделно ниво е речиси двојно зголемен во последните два месеца и се приближува до највисоката стапка на инфекција од почетокот на пандемијата, изјави шефот на Светската здравствена организација (СЗО), Тедрос Гебрејсус.
„Случаите (инфекции) и смртните случаи се зголемуваат со загрижувачки стапки“, рече тој на брифинг фокусиран на Папуа Нова Гвинеја (ПНГ) и регионот на западениот Пацифик.
Шефот на СЗО рече дека е многу загрижен за ПНГ и дека е од клучно значење за земјата да добие што повеќе вакцини против Ковид-19.
ПНГ потврди повеќе од 9.300 инфекции и 82 смртни случаја.
„Иако овие бројки и натаму се пониски отколку во други земји, порастот е голем и СЗО е загрижена за можна многу поголема епидемија“, рече Тедрос.
Министерката за здравство на земјата, Јелта Вонг, рече дека е предизвик да се убедат луѓето да носат маски и да се отстрани неверувањето во самата болест, што може да го компилицира воведувањето вакцини.
Официјални лица на СЗО соопштија дека три екипи за итна медицинска помош пристигнале во ПНГ оваа недела од Австралија, САД и од Германија.
„Ситуацијата е крајно предизвикувачка во моментот“, вели Такеши Касаи, регионален директор на СЗО за западниот Пацифик.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски: Ова се важни денови за Украина
Претседателот на Украина, Володимир Зеленски објави дека денеска разговарал со генералниот секретар на НАТО, Марк Руте.
„Разговарав со Марк Руте и ќе разговараме повторно во наредните денови. Ова се важни денови и многу работи можат да се променат. Тесно се координираме и во нашите активности и во активностите на сите партнери, заедничките акции, заедничките позиции ќе бидат исклучително ефикасни. Ви благодарам за вашата поддршка“, напиша Зеленски на Телеграм.
Тој наведе дека телефонски разговарал со претседателката на Европската комисија, Урсула фон дер Лајен.
– Продолжуваме да бидеме во целосна координација со Европската комисија, благодарен сум за поддршката. Разговаравме за ситуацијата во дипломатијата и имаме заеднички став за клучните прашања. Исто така е важно што Урсула е многу внимателна кон потребата од зајакнување на нашата отпорност во услови на постојани руски напади врз инфраструктурата и енергијата. Ја ценам подготвеноста да ѝ се помогне на Украина!, напиша Зеленски.
Свет
Папата Лав Четиринаесетти пристигна во Либан
Папата Лав Четиринаесетти пристигна во Либан во рамки на неговата прва турнеја во странство, објави ДПА.
Светиот Отец пристигна попладнево во либанскиот главен град Бејрут, по посетата на Турција.
Посетата на папата се смета за причина за надеж за мир и стабилност во земјата загрозена од воени конфликти и зафатена од кризи.
Тој ќе се сретне со либанските лидери, ќе посети христијански објекти и ќе одржи литургија. Околу 30 отсто од населението на Либан се христијани, додека мнозинството жители се муслимани.
Свет
Четворица мртви и десет ранети на семеен собир во Калифорнија
Четири лица се убиени, а 10 се ранети во пукотница за време на семеен собир во свечена сала во Стоктон, Калифорнија, објавија ноќеска официјални лица од канцеларијата на шерифот, пренесуваат американските медиуми.
Меѓу жртвите има деца и возрасни, потврди Хедер Брент, портпаролка на канцеларијата на шерифот на округот Сан Хоакин.
Првичните информации „сугерираат дека ова можеби бил намерен инцидент“, рече Брент за време на прес-конференцијата на местото на настанот.

Локалните официјални лица објавија дека осомничениот напаѓач сè уште не е уапсен и апелираа до јавноста за помош. Детективите сè уште работат на утврдување на можниот мотив за инцидентот.
„Доколку имате какви било информации за ова лице, ве молиме веднаш да се јавите. Ако сте тоа лице, ве молиме веднаш да се предадете“, рече окружниот обвинител на округот Сан Хоакин, Рон Фреитас, на прес-конференција.
Пукањето се случило непосредно пред 18 часот во свечената сала што го дели паркингот со други деловни објекти.
Стоктон е град со 320.000 жители, сместен околу 40 милји јужно од Сакраменто.
„Семејствата треба да бидат заедно, наместо да бидат во болница, да стојат покрај своите најблиски и да се молат да преживеат“, рече градоначалничката Кристина Фугаци.
Засега, властите не објавија никакви дополнителни информации за состојбата на повредените. Претходно беше потврдено дека неколку лица се префрлени во болници.

