Турскиот претседател Реџеп Таип Ердоган изјави дека мирот во Украина е остварлив и дека наскоро може да се види, по дипломатските напори во кои се вклучени Москва и Вашингтон.

По разговорите со рускиот претседател Владимир Путин во Туркменистан, Ердоган рече дека Анкара се надева на соработка и со американскиот претседател Доналд Трамп за разгледување на можен мировен план.

„По средбата со Путин, се надеваме дека ќе имаме можност да разговараме за мировниот план и со претседателот Трамп. Мирот не е далеку, можеме да го видиме“, изјави Ердоган.

Тој нагласи дека Путин и другите актери добро го знаат ставот на Турција во однос на војната и мировните напори и додаде дека Анкара позитивно гледа на дијалогот што го иницирал Трамп.

Ердоган предупреди и дека Црното Море не треба да стане арена на ривалства, истакнувајќи дека безбедноста и слободата на пловидба се од заеднички интерес за сите страни.

Фото: depositphotos

Калифорнија и уште 19 американски сојузни држави поднесоа тужба со која бараат да се блокира воведувањето надомест од 100.000 долари за H-1B работни визи, што го наметна американскиот претседател Доналд Трамп.

Тужбата е поднесена до федерален суд во Бостон и е трета по ред со која се оспорува оваа мерка, најавена во септември, со која значително се зголемуваат трошоците за добивање на H-1B визи. Во моментов, работодавачите плаќаат меѓу 2.000 и 5.000 долари по вработен за оваа виза.

Од канцеларијата на државниот обвинител на Калифорнија, Роб Бонта, соопштија дека Трамп нема законски овластувања да воведе ваков надомест и дека тоа е спротивно на федералниот закон, кој дозволува наплата само на трошоци неопходни за администрирање на визите.

H-1B програмата им овозможува на американските компании да вработуваат странски работници во специјализирани области, а технолошката индустрија, особено во Калифорнија, во голема мера се потпира на овие визи. Според Бонта, надоместот од 100.000 долари би создал дополнителен финансиски товар за секторите како образованието и здравството и би го влошил недостигот од работна сила.

На тужбата, покрај Калифорнија, се приклучија и државите Њујорк, Масачусетс, Илиноис, Њу Џерси и Вашингтон. Белата куќа, пак, соопшти дека мерката е законска и дека ќе спречи злоупотреби на H-1B програмата.

Пожарот што синоќа избувна во објект на хрватската компанија „ЦИАК“ во Забок, која складира и третира опасен отпад, е ставен под контрола, соопшти претседателот на Противпожарната заедница на Крапинско-загорската жупанија, Стјепан Скулибер, пренесе Танјуг.

„Пожарот сè уште не е целосно изгаснат, но е под контрола. На терен останаа седум пожарникари со три возила, а во текот на утрото ќе продолжи догасувањето и внатре во објектот“, изјави Скулибер.

Тој потврди дека вработени од Наставниот завод за јавно здравје „Д-р Андрија Штампар“ извршиле мерења на квалитетот на воздухот на местото на пожарот и во околните населени места Забок, Орославје и Велико Трговишче, а резултатите се очекуваат во текот на денот.

Околу 3:30 часот наутро, жителите на Хрватско Загорје добиле предупредувачка порака преку системот HR112 ALERT за потенцијална опасност поради пожарот во компанијата ЦИАК од Забок.

Компанијата во индустриската зона располага со хали и погон за рециклирање акумулатори, а локалните медиуми објавија дека на терен биле ангажирани повеќе од 60 пожарникари. Според порталот Zagorje.com, целата зграда била зафатена од оган и се слушале експлозии, при што станува збор за објект во кој се складира опасен хемиски отпад.

На местото на настанот пристигнала и градоначалничката на Забок, Валентина Ѓурек, која изјави дека дел од конструкцијата веќе е урната, но дека во тој момент немала дополнителни информации.

Од полицијата за Хина изјавиле дека пожарникарите интервенираат и дека засега не можат да дадат повеќе детали. Хрватските медиуми наведуваат дека во гаснењето учествувале пожарникари од јавната пожарникарска станица на Загорје и уште осум доброволни противпожарни друштва од околината.