Свет
Соочен со криза во Франција, Макрон мора бргу да назначи наследник на Бајру

Францускиот претседател Емануел Макрон денес ќе ја прифати оставката на премиерот Франсоа Бајру откога неговата влада не ја доби довербата во парламентот, а францускиот лидер мора итно да најде наследник за да избегне нова политичка криза.
Вчера, Бајру претрпе пораз на гласањето за доверба во парламентот што самиот го свика туркајќи ја Франција во нова неизвесност и оставајќи го Макрон со задачата да го пронајде својот седми премиер.
Кабинетот на францускиот претседател соопшти дека Макрон го забележал исходот и дека ќе назначи нов премиер во наредните денови, со што ќе се стави крај на шпекулациите за предвремени избори.
Макрон денеска ќе се сретне со Бајру за да ја прифати оставката на неговата влада. Точно кога би можел да биде именуван нов премиер останува нејасно, но извор близок до Макрон рече дека назначувањето е можно уште денеска, а претседателското обраќање исто така не е исклучено.
Бајру ги изненади дури и своите сојузници со тоа што свика гласање за доверба за да се стави крај на долгогодишниот ќор-сокак за неговиот предлог за буџет за штедење, кој вклучуваше речиси 44 милијарди евра намалување на трошоците за намалување на долгот на Франција.
На гласањето во Националното собрание 364 пратеници гласаа против владата, а само 194 ѝ дадоа доверба.
Макрон има неколку опции – ниту една од нив не е особено привлечна, објавува Би-би-си.
Тој би можел да назначи нов премиер, но наоѓањето кандидат што нема веднаш да биде одбиен од една од главните парламентарни фракции нема да биде лесно. Минатата година процесот траеше неколку недели. Бајру, веројатно, ќе остане на функцијата како технички премиер додека не се именува наследник.
Макрон би можел да распише и нови парламентарни избори. Тоа би го променило сегашниот баланс на моќ, но би можело да резултира со уште поубедлива победа за крајно десничарскиот Национален собир на Марин Ле Пен.
Друга опција е да се распишат претседателски избори, на кои Макрон нема да може да се кандидира бидејќи неговиот втор мандат завршува во 2027 година. Некои парламентарни групи го повикаа да го направи тој потег, но тој постојано повторуваше дека нема да поднесе оставка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белата куќа: Се водат чувствителни разговори за предлогот на Трамп за прекин на војната во Газа

Белата куќа денес објави дека се водат „чувствителни дискусии“ за предлогот на американскиот претседател Доналд Трамп за прекин на војната во Појасот Газа.
„Можам да ви кажам дека се водат некои многу чувствителни разговори, но секако не сакам да ги превенирам најавите од оваа говорница. Ќе им препуштам на специјалниот пратеник (Стивен) Виткоф и на претседателот на Соединетите Американски Држави да се справат со тоа“, изјави портпаролката на Белата куќа, Каролин Ливит, на редовниот брифинг за медиумите, објави Ројтерс.
Висок функционер на Хамас изјави за Би-Би-Си дека палестинската група веројатно ќе го отфрли мировниот план на американскиот претседател, тврдејќи дека тој „им служи на интересите на Израел“ и „ги игнорира интересите на палестинскиот народ“.
Фото: принтскрин
Свет
Трамп го потпиша указот за американски безбедносни гаранции за Катар

Претседателот на САД, Доналд Трамп, потпиша извршна наредба со која САД се обврзуваат да ја гарантираат безбедноста на Катар, што претставува значајна нова обврска кон клучен арапски сојузник кој не е член на НАТО, пишува CNN.
„САД ќе го сметаат секој вооружен напад врз територијата, суверенитетот или критичната инфраструктура на Државата Катар за закана за мирот и безбедноста на САД“, се вели во наредбата потпишана во понеделник.
Оваа одлука доаѓа во време кога израелскиот премиер Бенјамин Нетанјаху, за време на посетата на Белата куќа, му се извини по телефон на катарскиот премиер за израелскиот напад врз Доха минатиот месец. Потоа, Трамп, во заеднички настап со Нетанјаху, го претстави својот план од 20 точки за мир во Газа.
„Во случај на таков напад, САД ќе ги преземат сите законски и соодветни мерки – вклучувајќи дипломатски, економски и, доколку е потребно, воени – за да ги одбранат интересите на САД и Државата Катар и да го вратат мирот и стабилноста“, се вели во документот, според медиумот.
Фото: принтскрин
Свет
Макрон: Ја потценивме Русија

Францускиот претседател Емануел Макрон изјави дека не исклучува никакви опции доколку руските борбени авиони влезат во европскиот воздушен простор.
„Во согласност со доктрината за стратешка двосмисленост, можам да ви кажам дека ништо не е исклучено“, рече Макрон во интервју за весникот „Франкфуртер алгемајне цајтунг“, одговарајќи на прашање дали би поддржал соборување на руски борбен авион доколку влезе во европскиот воздушен простор без дозвола.
Макрон истакна дека ја потцениле Русија. Тој тврдеше дека Русија е најголемата структурна закана за Европејците, наведувајќи мешање во изборните кампањи, кибернапади, атентати на противници и ширење лажни информации.
„Постои француски нуклеарен чадор“
„Наивни сме ако не препознаеме дека тајната армија на Русија се шири во нашите демократии. Таа се состои од оние мали анонимни воини што ги нарекуваме дигитални ботови. Тие ја манипулираат демократијата во Франција, Германија и низ цела Европа“, предупреди тој.
Кога беше прашан за предлогот на Европската комисија да се користат замрзнати руски средства како колатерал за исплати на воени репарации на Украина, Макрон повтори дека средствата не можат едноставно да се конфискуваат, бидејќи тоа би го прекршило меѓународното право.
Макрон, исто така, потврди дека ќе одржи говор на почетокот на следната година за француската нуклеарна доктрина, која моментално се ажурира.
„Францускиот нуклеарен чадор постои. Моментално работам на ажурирање на нашата доктрина и сакам да продолжам со продлабочување на нашиот стратешки дијалог со Европејците кои сакаат да учествуваат“, рече тој.
Фото: принтскрин