Свет
Сојузникот на Трамп убиен во атентат, ФБИ приведе осомничен, па го пушти
Чaрли Кирк (31), влијателен десничарски активист, близок до американскиот претседател Доналд Трамп и извршен директор на организацијата Turning Point USA (TPUSA), е мртов. Тој беше застрелан во вратот околу 12:25 часот по локално време за време на настан на Универзитетот во Јута Вали.
Видеата што кружат на социјалните мрежи го покажуваат моментот кога беше застрелан додека зборуваше под шатор во дворот на универзитетот, пред собрана публика од 3.000 луѓе и обезбедување од 6 полицајци. Кирк таму настапи како дел од турнејата American Comeback, организирана од локалниот огранок на TPUSA. Тој беше префрлен во болница во критична состојба, каде што почина.
Осомничениот за убиството на Кирк е уапсен, потврди ФБИ неколку часа по атентатот. Првично беше уапсено погрешно лице, кое набрзо беше ослободено.
Смртта на Чарли Кирк ја потврди американскиот претседател Доналд Трамп.
„Големиот, па дури и легендарниот Чарли Кирк е мртов. Никој не го разбираше или не го имаше срцето на младите на Соединетите Американски Држави подобро од Чарли. Сите го сакаа и се восхитуваа, особено јас, а сега го нема. Меланија и јас им упатуваме сочувство на неговата прекрасна сопруга Ерика и семејството. Чарли, те сакаме!“, напиша тој на „Тру соушал“.
Трамп потоа изрази длабока тага и гнев поради убиството на конзервативниот активист, нарекувајќи го атентатот „темен момент за Америка“. Трамп го опиша Кирк како „патриот кој го посвети својот живот на борба за отворена дебата и за земјата што толку многу ја сакаше, Соединетите Американски Држави“.
„Чарли инспирираше милиони, а вечерва сите што го познаваа и го сакаа се обединети во шок и ужас“, рече Трамп. „Тој е пример за вистината и слободата, и никогаш немало некој толку почитуван меѓу младите“.
Трамп, исто така, ја истакна „длабоката вера“ на Кирк, велејќи: „Чарли беше и човек со длабока, длабока вера. Се утешуваме знаејќи дека тој сега е во мир со Бога на небото“. Додаде дека го замолил Бога да ги чува сопругата и децата на Кирк „во ова ужасно време на болка и страдање“.
Во продолжение на изјавата, Трамп вети дека неговата администрација ќе преземе решителни чекори против политичкото насилство.
„Ќе го најдеме секој што придонел за ова злосторство и друго политичко насилство“, изјави тој. Трамп конкретно ја обвини „радикалната левица“ за насилството од кое „страдале премногу невини луѓе“, споменувајќи го обидот за атентат врз него и убиството на извршниот директор на „ЈунајтедХелткер“, Брајан Томпсон, минатата година.
Американскиот конгресмен Џејсон Чафец, кој беше на настанот со својата ќерка, за Fox News изјави дека насилството било „шокантно“.
„Сите се фрлија на подот и избегаа“, рече Чафец. „Куршумот падна право во него“. Тој откри дека разговарал со Кирк непосредно пред почетокот на натаснот.
По пукањето, луѓето почнаа да бегаат во паника и следеше хаос.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Мажот кој се обиде да влезе во имотот на Трамп дигнал пушка во позиција за пукање пред агентите да го убијат
Маж на околу 20-годишна возраст бил убиен откако се обидел нелегално да влезе на имотот на Доналд Трамп во Флорида.
Обезбедувањето го забележало кај северната порта, носејќи пушка и канистер со бензин.
Агентите на тајните служби му наредиле да ги спушти предметите. Мажот го спуштил канистерот, но ја подигнал пушката во положба за пукање.
„Тогаш заменик-шерифот и двајцата агенти го застрелале и ја неутрализирале заканата. Мажот починал на лице место“, кажа Рик Бредшо, шериф на округот Палм Бич.
Сè уште не е јасно колку куршуми биле испукани, а шерифот рече дека тоа е дел од истрагата.
Во моментот, Доналд Трамп бил во Белата куќа, а неговата сопруга Меланија била со него.
Допрва ќе бидат објавени повеќе детали за идентитетот на осомничениот поврзан со инцидентот.
Портпаролот на Тајната служба, Ентони Гуглиелми, изјави дека осомничениот е од Северна Каролина. Неговото семејство го пријавило како исчезнат пред неколку дена.
Свет
Маж е застрелан откако се обидел нелегално да влезе во имотот на Трамп во Флорида
Mаж е убиен откако се обидел нелегално да влезе во имотот на Трамп во Флорида, објави Скај њуз.
Како што објавија разузнавачките служби, мажот на околу 20-годишна возраст бил застрелан околу 1:30 часот наутро.
Идентитетот на осомничениот сè уште е непознат, а обезбедувањето го забележало човекот на северната порта од имотот.
Носел оружје кое личело на пушка и канта со гориво.
Ниеден агент не е повреден.
Во тек се истраги за идентитетот на човекот и неговиот мотив за делото.
Иако Трамп често го поминува викендот на својот имот, во моментот на инцидентот тој бил во Белата куќа, во Вашингтон, а со него била и сопругата Меланија Трамп.
Свет
Гласањето за трговскиот договор ЕУ–САД може да се одложи поради хаосот со тарифите
Претседателот на Комитетот за меѓународна трговија на Европскиот парламент, Бернд Ланге, предложи одложување на гласањето за трговскиот договор меѓу ЕУ и САД, кое беше планирано за следната недела. Тој истакна дека условите и правната основа на договорот се променети поради неодамнешните американски тарифни мерки.
Ланге оцени дека американската администрација создала „тарифен хаос“ со привремените тарифи на претседателот Доналд Трамп, кои првично беа 10%, а потоа беа зголемени на 15%.
Од партијата Зелени во ЕУ исто така побараа пауза во гласањето додека не се разјаснат сите детали.
Договорот, кој беше постигнат минатото лето, предвидува ЕУ да ги укине царините на многу американски производи, додека САД би вовеле тарифа од 15% на поголемиот дел од европскиот извоз. Намалените царини од ЕУ треба да бидат одобрени од владите на земјите-членки и од Европскиот парламент.
Европскиот парламент минатиот месец привремено ја стопираше работата на договорот поради барањето на Трамп за припојување на Гренланд и заканите со царини кон европските сојузници, но подоцна беше одлучено дека договорот ќе биде ставен на гласање крајот на февруари.

