Свет
Странските студенти ќе мора да ги напуштат САД ако универзитетите се префрлат на онлајн-часови

Странските студенти ќе бидат принудени да ги напуштат САД или да се префрлат на друг колеџ ако нивните училишта есенва понудат интернет-настава, покажуваат новите упатства издадени во понеделникот од федералните власти за имиграција, пренесува РТ.
Упатствата издадени од Американсата служба за имиграција и царина вршат дополнителен притисок за отворање на универзитетите дури и покрај растечката загриженост за неодамнешното ширење на Ковид-19 кај младите луѓе. Колеџите добија насоки истиот ден кога некои институции, вклучително и Универзитетот „Харвард“, објавија дека сите предавања ќе бидат понудени онлајн.
Претседателот Доналд Трамп инсистира училиштата и колеџите да се вратат на настава што е можно побергу. Набргу потоа Трамп повтори на „Твитер“ дека училиштата есенва мора да се отворат додавајќи дека демократите сакаат да ги задржат училиштата затворени од политички, а не од здравствени причини.
„Тие мислат дека тоа ќе им помогне во ноември. Луѓето сфаќаат погрешно!“, напиша Трамп.
Според ажурираните правила, меѓународните студенти мора да слушаат барем дел од нивните предавања лично. Нови визи нема да им се издаваат на студентите од факултетите или програмите што се целосно на интернет, па дури и на колеџи, кои нудат мешавина од лични и онлајн-курсеви оваа есен, а на меѓународните студенти ќе им биде забрането да ги слушаат сите предавања на интернет.
Тоа создава итна дилема за илјадници меѓународни студенти кои станаа заробени во САД минатата пролет кога коронавирусот ги принуди универзитетите да се преместат на интернет. Студентите на факултетите со онлајн-настава мора да ја напуштат земјата или да преземат други мерки, како што е префрлање на факултет со индивидуална настава.
Американскиот совет за образование, кој ги претставува претседателите на универзитетите, вели дека упатствата се ужасни и ќе резултираат со забуна, а факултетите бараат начини да се отворат безбедно.
Од особена загриженост е одредбата според која студентите нема да бидат ослободени од правилата, дури и ако епидемијата ги принуди факултетите на онлајн-настава за време на есенскиот семестар. Не е јасно што би се случило ако студент заврши во тоа сценарио, но се соочи со ограничувања на патувањето во матичната земја, вели Тери Хартл, постар потпретседател на советот.
Меѓународната група за образование НАФА ги осуди правилата и рече дека на факултетите треба да им се даде овластување да носат одлуки што се соодветни за нивните кампуси. Оттаму велат дека насоките се штетни за меѓународните студенти и ги става во опасност нивното здравје, благосостојба и целата заедница за високо образование.
Речиси 400.000 странци добија студентски визи во 12-месечниот период, кој заврши на 30 септември, што е помалку од 40 отсто во споредба со претходните четири години. Училишните администрации за тоа делумно го обвинуваат одложувањето на процесирањето на визите.
Колеџите во САД веќе очекуваат пад во бројот на новозапишани странски студенти оваа есен, но губењето на сите меѓународни студенти може да биде катастрофално за некои. Многу колеџи зависат од приходите од школарината од меѓународни студенти. Минатата година универзитетите во САД привлекоа речиси 1,1 милион студенти од странство.
Критичарите на Трамп бргу ги нападнаа новите упатства. Сенаторот Берни Сандерс рече дека суровоста на оваа Бела куќа не знае за граници.
„На странските студенти им се заканува избор: ризикувајте го вашиот живот за да одите на предавања или ќе бидете депортирани“, рече Сандерс во твитот. „Мора да се спротивставиме на нетолеранцијата на Трамп. Мора да ги чуваме сите наши студенти безбедни“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Уапсена сопругата на поранешниот јужнокорејски претседател

Сопругата на затворениот поранешен јужнокорејски претседател Јун Сук Јеол, Ким Кеон Хи, е уапсена по низа сериозни обвиненија, вклучувајќи манипулација со акции и поткуп. Поранешната прва дама ги негираше сите обвиненија за време на четиричасовното судско рочиште во Сеул, но судот сепак издаде налог за притвор, наведувајќи го ризикот од уништување на доказите, објавува BBC.
Иако Јужна Кореја има долга историја на обвинувања и затворање на поранешни претседатели, ова е прв пат и поранешен претседател и поранешна прва дама да бидат зад решетки. Нејзиниот сопруг, Јун, беше приведен во јануари и чека судење за неговиот неуспешен обид да воведе вонредна состојба минатата година, потег што ја втурна земјата во хаос и на крајот доведе до негово соборување.
Обвинителите тврдат дека 52-годишната Ким заработила повеќе од 800 милиони вони (околу 578.000 долари) со учество во шема за фиксирање на цената на акциите на „Дојч Моторс“, јужнокорејскиот дилер на БМВ. Иако наводно се случило пред нејзиниот сопруг да стане претседател, аферата фрли сенка врз целиот негов мандат.
Таа е обвинета и за прифаќање на две чанти „Шанел“ и дијамантска огрлица како мито од контроверзната Црква за обединување во замена за деловни услуги. Меѓу другите обвиненија, Ким се обвинува и за влијание врз номинациите на кандидати за време на парламентарните дополнителни избори во 2022 година и општите избори минатата година.
Ким Кеон Хи се појави на сослушувањето со сериозен израз на лицето, облечена во црно одело. „Искрено се извинувам што предизвикав проблеми и покрај тоа што сум незначителна личност“, изјави таа кратко пред новинарите.
Додека беше на функцијата, нејзиниот сопруг Јун стави вето на три опозициски закони со кои ќе се бараше специјален обвинител да ги истражи обвинувањата против неговата сопруга. Последен пат стави вето на нив во ноември, само една недела пред да прогласи вонредна состојба. Специјалниот обвинител за случајот беше назначен во јуни оваа година, откако ривалот на Јун, Ли Џе Мјунг, ја презеде функцијата.
Свет
Трамп ќе одржи виртуелен состанок со европските лидери и Зеленски

Претседателот на САД, Доналд Трамп, и потпретседателот Џ.Д. Венс денес ќе учествуваат на виртуелен состанок со украинскиот претседател Володимир Зеленски и европските лидери, објави ABC News, повикувајќи се на двајца американски претставници.
Според „Ројтерс“, европските лидери прво ќе одржат видеоконференција меѓусебно за да ги координираат своите ставови пред да разговараат со Трамп за претстојните преговори во Белата куќа со рускиот претседател Владимир Путин.
Портпаролот на германската влада изјави дека Зеленски и претставниците на ЕУ и НАТО ќе се приклучат на виртуелен состанок што ќе се одржи денес во 14 часот, на кој ќе учествуваат лидерите на Германија, Финска, Франција, Велика Британија, Италија и Полска.
Дневниот ред вклучува стратегии за зголемување на притисокот врз Русија, редоследот на чекорите во евентуалниот мировен процес, иднината на териториите окупирани од Русија и безбедносните гаранции за Украина.
Потоа, во 15 часот по средноевропско време, европските лидери ќе одржат видеоконференција со претседателот Трамп и потпретседателот Венс.
За потсетување, Трамп и Путин треба да се сретнат на 15 август во Енкориџ, најголемиот град во Алјаска.
Фото: ЕПА
Свет
Комисија на СЗО: Топлотните бранови повеќе не се климатска закана, туку здравствена криза

Екстремните временски услови што ја засегаат Европа и Централна Азија повеќе не се само климатска закана, туку и сериозен проблем со јавното здравје, предупреди Паневропската комисија за клима и здравје во отворено писмо до владите и здравствените власти на 53-те земји-членки на Европскиот регион на Светската здравствена организација.
Комисијата вели дека европскиот регион доживува сè почести, интензивни и смртоносни топлотни бранови. Последиците често се скриени во статистиката под причини како што се срцеви удари, мозочни удари или респираторни проблеми, но причината, велат тие, е јасна.
Постарите лица, лицата со попреченост, бремените жени, малите деца, работниците на отворено и оние што живеат во лошо изолирани станови се особено изложени на ризик.
Смртните случаи поврзани со топлината се зголемија за 30% во последните две децении, со повеќе од 100.000 смртни случаи поврзани со топлината регистрирани во 35 европски земји само во 2022 и 2023 година.
Јуни 2025 година беше најжешкиот месец регистриран во Западна Европа, со два силни топлотни бранови што пристигнаа пред врвот на летото.
Климатските промени, предупредуваат тие, исто така шират болести што некогаш беа ретки – локално преносливите случаи на денга треска во ЕУ/ЕЕА се зголемија за 368% помеѓу 2022 и 2024 година.
Топлотните бранови предизвикуваат пораст на приемите на пациенти, особено со кардиоваскуларни, респираторни и бубрежни проблеми.
Менталното здравје е исто така засегнато – спиењето е полошо, анксиозноста се зголемува, а когнитивната функција ослабува. Луѓето со ментални заболувања се особено ранливи бидејќи некои лекови го отежнуваат регулирањето на телесната температура.
Во исто време, здравствените работници се исто така изложени на исцрпеност и прегревање.
Комисијата нагласува дека акционите планови за екстремна топлина спасуваат животи и треба да се спроведат итно, а не за неколку години.
Загадувањето на воздухот предизвикува повеќе од половина милион предвремени смртни случаи во европскиот регион секоја година, главно поради согорувањето на фосилни горива. Намалувањето на емисиите значи почист воздух и помалку смртни случаи – повеќе од 5 милиони животи би можеле да бидат спасени на глобално ниво.
Зголемувањето на зелените површини во градовите ја намалува изложеноста на топлина, го подобрува менталното здравје и ги намалува сметките за енергија. Се проценува дека зголемувањето на урбаните зелени површини за 30% би можело да ги намали смртните случаи поврзани со топлината за до 40%.
Комисијата вели дека ваквите мерки се паметни инвестиции и повикува на редефинирање на економските индикатори за успех, со фокус на здравјето, благосостојбата, праведноста и одржливоста.
„Не можеме да го аутсорсираме здравјето – ниту нашето, ниту здравјето на планетата. И двете се непроценливи и двете се изложени на ризик“, се вели во писмото потпишано од 14 членови на Комисијата, вклучувајќи поранешни премиери, министри и водечки меѓународни експерти.
Фото: ЕПА