Последните два дена од карневалот во Венеција, кој привлекува туристи од целиот свет, се откажани поради коронавирусот, изјави гувернерот на регионот Венето, Лука Заја.

Тој најави дека планираните активности за денеска ќе се одржат.

„Од вечерва, прекинува карневалот, како и сите други настани, вклучувајќи ги и спортските“, рече Заја.

Тој претходно соопшти дека во Венеција се потврдени два слуачи на коронавирусот.

Десет градови во Италија се во изолација откако беа потврдени два смртни случаи од вирусот.

Шефицата на канцеларијата на ЕУ во Приштина, Наталија Апостолова, изјави дека очекува наскоро да бидат укинати таксите за стоката од Србија и дека тоа на состанок неодамна ѝ го потврдил премиерот на Косово, Албин Курти, пренесува „Танјуг“.

Апостолова за РТК на српски јазик рекла дека реципрочните мерки кои Приштина сака да ги воведе за Србија не би требало да ги влошуваат односите меѓу Приштина и Белград туку би требало да имат спротивен ефект – да ги отстранат пречките меѓу двете страни.

Апостолова за емисијата „Разговор“, која ќе биде емитувана на 27 февруари, рекла дека добила уверување од Курти дека таксите ќе бидат укинати, додавајќи дека не ги знае деталите кои се однесуваат на воведување реципроцитет кон Србија.

Трет патник од крузерот „Дајмонд принцес“ во Јапонија почина од коронавирусот, објави денеска јапонското Министерство за здравство.

80-годишниот јапонски државјанин бил хронично болен. Откако било потврдено дека е заразен со вирусот тој бил лекуван во локална болница. Датумот на неговата смрт не е објавен.

Во четвртокот беше објавено дека две лица од бродот, исто така 80-годишни Јапонци, починале од коронавирусот.

Околу 3.700 патници и членови на екипажот од 56 националности се наоѓаа на бродот кој е во карантин од 5 февруари во Јокохама, откако еден патник позитивен на коронавирус го напуштил бродот во Хонгконг.

Досега се потврдени 630 случаи на заболени на бродот.