Американскиот претседател Доналд Трамп денеска објави дека преговарачот за заложнички кризи, Роберт О’Брајан, ќе го именува за наследник на отпуштениот советник за национална безбедност, Џон Болтон.

„Задоволство ми е да објавам дека ќе го назначам Роберт О’ Брајан, кој во моментов успешно работи како специјален пратеник за заложници во Стејт департментот, за нов советник за национална безбедност. Долго и напорно соработуваме со Роберт. Тој ќе заврши голема работа на оваа позиција“, напиша Трамп на „Твитер“.

О’Брајан има долгогодишно искуство во републиканските кругови кои се занимаваат со надворешна политика, пренесе „Ројтерс“.

На 10 септември Трамп го отпушти Болтон поради, како што рече, големи несогласувања по однос на повеќе прашања.

Руските граничари уапсиле повеќе од 160 државјани на Северна Кореја во Јапонското Море поради рибокрадство кога претходно во инцидент беа нападнати и повредени четири руски граничари, од кои еден бил ранет со огнено оружје, пренесува „Спутник“ цитирајќи го рускиот Истражен комитет.

„По координираните акции на крајбрежната стража, авијацијата и специјалните сили, граничарите запленија две ‘шкуне’, 11 моторни чамци, а уапсени се 161 државјани на Северна Кореја. Меѓу странците има повредени, на кои им е укажана неопходната помош“, соопшти прес-центарот на ФСБ.

Руските граничари им ја одзеле забранетата опрема за риболов на уапсените лица, а против нив е поведена кривична постапка поради напад на службени лица.

Илјадници слатководни риби, претежно крап, пцовисаа во езерото Коронија, каде што нивото на водата драстично се спушти на 60-80 сантиметри.

„Од 2,80 до 3 метри, колку што беше длабоко езерото пред пет-шест години, сега достигна неколку сантиметри поради сушата и недостигот на одржување на инфраструктурата за водоснабдување во Коронеја“, рече за АНА претседателката на организацијата за управување со Коронија, „Волви и Халкидик“, Димитра Бомбори.

Се вративме во тешко време кога значителното намалување на водата во комбинација со високите температури резултира со голем помор на рибите, објасни Бомбори.

Техничката работа направена во 2012 година помогна да се врати поврзаноста на езерото со потоците што го обновија езерото, а популацијата на риби значително се зголеми, па забележани се осум до девет видови риби, истакна таа.

Бомбори изјави дека надоместувањето на водостојот на езерото во голема мера зависи од хидролошките услови и работите за одржување што не се извршени бидејќи не е назначен ниту еден управител да ги побара потребните средства.