Албанскиот премиер Еди Рама изјави денеска дека Албанија упати повик до НАТО да учествува во финансирање на воена поморска база во Драч. Рама на прес-конференција рече и за други случувања на самитот на НАТО во Мадрид истакнувајќи дека таму изнел детали за изградбата на поморската база, пренесува Анадолија.

„На самитот разговаравме за нашиот проект и верувам дека ќе се вратиме во Брисел за продолжување на проектот и предлогот кој не само што предизвика интересирање, туку и желба за продлабочување на разговорите за поставување на поморска база во Драч, која освен комерцијалниот и трговски дел би имала и воен“ рече Рама.

Додаде дека наскоро за ова прашање ќе се одржи посебен состанок со комплетниот албански експертски тим и со стручњаци од Алијансата за детално да се претстави проектот.

Унгарскиот министер за надворешни работи – Петер Сијарто денеска во Бањалука рече дека „е срамно што Брисел го забавува европскиот пат на земјите од Западен Балкан.

Тој оцени дека проширувањето на ЕУ е една од најважните политики и дека зајакнувањето на Унијата не е можно без нејзино проширување.

„Колку не има повеќе, толку сме посилни, а тоа е најважно за регионот на Западен Балкан. Унгарија е заинтересирана за мир и стабилност на регионот. Го поддржавме и кандидатскиот статус на Украина и Молдавија, но сметаме дека кандидати треба да станат и Грузија и БиХ. Срамота е што не се случи тоа“, рече Сијарто.

Претседателот на Украина – Володимир Зеленски изјави дека Украина треба да се приклучи на ЕУ што е можно поскоро и дека процесот „не смее да трае со години“.

„Процесот на прием на членките обично трае со години бидејќи земјите мора да исполнат одредени економски и политички критериуми“ – пишува Sky News.

„Денеска потпишуваме заедничка изјава, која е сигнал за единството на сите гранки на власта и доказ за нашата решеност да ја постигнеме стратешката цел на Украина – полноправно членство во Европската Унија. Потпишувањето на оваа декларација треба да значи исто како и потпишувањето на апликацијата за влез на петтиот ден од војната. Ни требаа 115 дена за да се кандидираме. Патот до членството не смее да трае со години, децении“ – напиша Зеленски на „Телеграм“.

Украинскиот претседател е со став дека „степенот до кој тоа е можно зависи од нас. Мораме да го завршиме нашиот дел од работата совршено за да им овозможиме на нашите пријатели во Европската Унија да донесат уште една историска одлука за нас исто толку брзо, на консолидиран начин“.