Свет
Трета руска вакцина против Ковид-19 доби зелено светло за клинички испитувања

Руското Министерство за здравство даде зелено светло на уште едно домашно тестирање за вакцина против коронавирус, пренесува РТ. Новата формула се смета за нискоризична за оние со компромитиран имунолошки систем, кои можеби не можат да најдат алтернативи.
Околу 3.000 луѓе ќе учествуваат во клиничките испитувања што ќе се спроведат во Санкт Петербург, Новосибирск и во Киров. Федералниот научен центар за истражување и развој на имунолошки и биолошки производи „Чумаков“, кој ја разви вакцината, ги сподели информациите со московскиот дневен весник РБК.
Центарот истакна дека испитувањата ќе ги задоволат барањата на Светската здравствена организација и на меѓународните регулатори, истовремено обезбедувајќи им на истражувачите доверлив обем на научни податоци.
Волонтерите ќе бидат изолирани во болнички услови и ќе бидат надгледувани 16 дена по вакцинирањето. Тестирањата се очекува да завршат во ноември, вели Ајдар Ишмукаметов, директорот на центарот.
Имунизацијата е таканаречена „цело-вирионска“ вакцина, заснована на уништена или вештачки ослабена честичка на вирусот, која е неспособна да предизвика болест. Овој тип на вакцина обично се смета за низок ризик за луѓе чиј имунолошки систем веќе е нарушен.
Ова е трета руска вакцина против Ковид-19 одобрена за големи испитувања кај луѓе. Последното испитување на руската пионерска вакцина „спутник V“, официјално регистрирана на 11 август, сè уште е во тек. Околу 60.000 луѓе доброволно се пријавија да бидат имунизирани со инокулација, развиена од реномираниот московски истражувачки центар за епидемиологија и микробиологија „Гамалеја“, објави градоначалникот на Москва, Сергеј Собјанин.
EpiVacCorona, втората руска вакцина дизајнирана од државниот истражувачки центар за вирологија и биотехнологија „Вектор“, со седиште во Новосибирск, во моментов е во фаза на регистрација. Кај неа од средината на август се во тек испитувањата во фаза 2.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелците масовно купуваат храна и вода: се подготвуваат за иранска одмазда

Репортерот на Би-Би-Си од Ерусалим известува дека Израелците масовно почнале да купуваат храна и вода, а полиците во супермаркетите брзо се празнат пред очекуваниот ирански одговор.
Населението во поголемиот дел од земјата се разбудило околу 3 часот наутро кога се огласиле сирени и бил испратен телефонски аларм со предупредување за „значајна закана“, а граѓаните добиле инструкции да останат блиску до засолништата.
Службите за итни случаи низ Израел складираат крв, додека некои болници почнале да ги отпуштаат пациентите доволно стабилни на домашна нега за да се ослободат капацитети.
На окупираниот Западен Брег, во сите палестински градови е прогласен карантин до понатамошно известување. Сите мерки се спроведуваат во очекување на одмазда, а израелската армија предупредува дека повеќе од 100 ирански беспилотни летала веќе се на пат кон Израел.
Светските медиуми потсетуваат дека синоќа Израел изврши обемен воздушен напад врз неколку цели во Иран. Според израелски воени извори, погодени се објекти поврзани со иранската нуклеарна програма и воени локации, вклучувајќи го и клучниот комплекс за збогатување ураниум во Натанц. МААЕ потврди дека Натанц е меѓу нападнатите локации и е во контакт со иранските власти за следење на нивоата на зрачење.
Израелскиот премиер Бенјамин Нетанјаху рече дека целта на операцијата е да се „неутрализира егзистенцијална закана“, истакнувајќи дека Иран со години развива нуклеарни капацитети и отворено се заканува дека ќе го уништи Израел.
Иран го затвори својот воздушен простор, а израелската војска го подигна нивото на тревога за можен одговор, вклучително и лансирање беспилотни летала и ракети од Иран и територии контролирани од проирански групи.
Свет
Аракчи: САД се одговорни за израелските напади

Иранскиот министер за надворешни работи, Абас Аракчи, ги осуди израелските воздушни напади во текот на ноќта како јасно кршење на меѓународното право и ги обвини Соединетите Американски Држави како најблизок сојузник на Израел.
„Соединетите Американски Држави, како главен поддржувач на овој режим, ќе бидат одговорни за опасните последици од оваа безгрижна авантура“, рече Аракчи, според порталот „Иран Интернешнл“.
Тој додаде дека Израел не можел да го започне нападот без координација или одобрение од САД.
Аракчи истакна дека Иран има законско право да возврати според член 51 од Повелбата на ОН.
Во текот на ноќта, Израел започна „превентивен напад“ врз Иран, насочен кон нуклеарната програма на земјата и високите воени лидери.
Израелската армија објави дека биле употребени 200 борбени авиони.
Како одмазда, Иран лансираше над 100 беспилотни летала кон израелска територија, соопшти израелската армија.
Свет
Израел соборува ирански дронови над Саудиска Арабија

Израелската војска почна да пресретнува ирански беспилотни летала над Саудиска Арабија, објави израелската телевизија Канал 12.
„Тајмс оф Израел“ исто така објави дека израелските сили почнале да соборуваат беспилотни летала надвор од израелска територија, повикувајќи се на воени извори.
Претходно беше потврдено дека Иран лансирал повеќе од 100 беспилотни летала кон Израел како одговор на израелските воздушни напади во текот на ноќта.
На беспилотните летала им требаат неколку часа за да стигнат до израелска територија од Иран, а пресретнувањата започнаа веднаш штом влегоа во воздушниот простор над регионот.