Турскиот претседател, Реџеп Таип Ердоган, изјави денеска дека не е можно кандидатот на опозицијата да прогласи победа во Истанбул со 13.000-14.000 гласа повеќе во градот со 10 милиони гласачи.

Претседателот на опозициската Републиканска народна партија, Кемал Киличдароглу, рече дека Високиот избирачки одбор, кој се согласи на делумно повторно пребројување на гласовите во Истанбул, отвори процес што ѝ наштети на безбедноста на гласачките кутии, објави „Ројтерс“.

Партијата на правдата и развојот на Ердоган побара пребројување на гласовите во Истанбул во неделата кога нивниот кандидат изгуби.

Киличдароглу рече дека членовите на комисијата треба да биде непристрасни и дека целосното пребројување на гласовите мора да има разумно оправдување.

Тој додаде дека со 92,3 процента од делумното пребројување на гласовите во Истанбул кандидатот на неговата партија, Екрем Имамоглу, е во водство со 15.722 гласа.

Во Истанбул, од 39 административни области, гласовите беа пребројувани во 18 административни области.

Во Турција на 1 април се одржаа избори, на кои гласачите избираа градоначалници во големите градови, началници на општини и градски или провинциски и општински совети.