Германската канцеларка Ангела Меркел и американскиот претседател Џо Бајден ја повикаа Русија да ги повлече војниците од украинската граница заради деескалација на ситуацијата во регионот, изјави денеска портпаролот на германската влада Штефен Зајберт.

Русија и Украина одржаа истовремени воени вежби во средата, додека министрите за надворешни работи и одбрана на НАТО започнаа итни разговори за акумулирањето на руските трупи во близина на украинската граница, според „Ројтерс“.

Меркел и Бајден разговараа по телефон за последните случувања во источна Украина и ја повикаа Русија да избегне каква било понатамошна ескалација.

„Канцеларката и претседателот се согласија дека Русија треба да ја намали најновата акумулација на војници за да придонесе за деескалација на ситуацијата“, рече Зајберт.

Во Вашингтон, портпаролката на Белата куќа Џен Псаки изјави дека Бајден разговарал со рускиот претседател Владимир Путин во вторникот за да ги нагласи последиците од руските активности.

Турскиот претседател Реџеп Таип Ердоган го обвини италијанскиот премиер, Марио Драги, дека е арогантен и без почит откако Драги го нарече диктатор.

Да потсетиме, Драги минатата недела го обвини Ердоган дека сакал да ја понижи претседателката на Европската комисија, Урсула фон дер Лајен и рече дека треба да се настапува отворено со диктаторите, предизвикувајќи осуди од Турција. Ердоган ја прими Фон дер Лајен и претседателот на Европскиот совет, Шарл Мишел во Анкара, а снимките од почетокот на состанокот покажаа дека Мишел добил стол покрај Ердоган, додека Фон дер Лајен мораше да седи на каучот од страна.

Ердоган, пак, вчера изјави дека Драги ги нарушил односите меѓу Турција и Италија и дека италијанскиот премиер нема легитимитет да упатува вакви критики.

„Изјавата на италијанскиот премиер е чиста дрскост и непочитување. Додека се надевавме дека турско-италијанските односи можат да достигнат високо ниво, неговата изјава, изјавата на тој човекот по име Драги, за жал ги торпедираше тие односи“, рече Ердоган и продолжи:

„Вие сте таму затоа што некој ве именувал, а не ве избрал. За да можете да дадете такви критики за Таип Ердоган, прво мора да бидете свесни за сопствената историја. Но, видовме дека не сте“, нагласува Ердоган, притоа јасно алудирајќи на италијанскиот фашистички диктатор, Бенито Мусолини.

Драги, поранешен претседател на Европската централна банка, не дојде на власт преку избори, но беше назначен од италијанскиот претседател на чело на владата, по падот на претходната коалиција поради внатрешни превирања.

Телата на четири деца се пронајдени откако избувнал пожар во приватна куќа во село во регионот Свердловск во Русија.

Во пожарот се повредени уште четири лица, од кои две се деца.

Портпаролот на регионалниот оддел на руското Министерство за вонредни ситуации изјави дека е можно друго дете да е под урнатините.

„ Пожарникарите пронајдоа тела на четири деца. Според соседите, можно е друго дете да е под урнатините. Потрагата продолжува “, рече портпаролот, како што пренесе ТАСС.

Тој додаде дека пожарот избувнал рано утрово.