Турција го оствари ветувањето за репатријација на заробените терористи на Исламската држава сигнализирајќи дека сојузниците на НАТО – Франција, Германија, Данска и САД – ќе бидат први што ќе мора да ги примат вратените џихадисти, пренесува „Брејтбарт“.

Министерот за внатрешни работи на Турција, Сулејман Сојлу, предупреди минатата недела дека Анкара ќе почне да ги враќа милитантите на ИД во нивните матични земји, дури и ако им било одземено државјанството.

Предупредувањето на Турција дојде и покрај неподготвеноста на европските држави да ги преземат, особено Велика Британија, која дури најави дека ќе им ги одземе државјанствата на познатите џихадисти.

„Ние нема вечно да ги чуваме. Не сме хотел за Исламската држава“, изјави Сојлу.

Сега процесот почнува. Еден американски странски терорист, чија постапка е завршена, е депортиран. „Патните планови за седум странски терористички борци со германско потекло во центрите за депортација се завршени, тие ќе бидат депортирани на 14 ноември“, изјави портпаролот на Министерството, Исмаил Чатаки, цитиран од државната новинска агенција „Анадолија“.

Катаки не даде веднаш дополнителни информации за осомничените за тероризам, но рече дека тие се чуваат во центрите за депортација.

„Странскиот терористички борец од САД е депортиран од Турција кога беа завршени процедурите. Уште 11 француски државјани исто така се подготвени да бидат вратени дома“, посочи Чатаки.

Во изминатите неколку недели Турција ги критикува западните нации, вклучително и Велика Британија и Холандија, за одбивањето да ги вратат своите државјани кои ѝ се придружија на милитантната група и ветија дека ќе ги депортираат назад милитантите на ИД, дури и ако нивното државјанство е одземено.