Турција би можела да го испрати својот брод „Нене Хатун“, да помогне во решавањето на блокадата во Суецкиот Канал, изјави денеска турскиот министер за транспорт, Адил Караисамилоглу.

Транзитот низ еден од најфреквентните трговски премини во светот е блокиран од вторникот, откако се заглави товарниот брод „Евергрин“ и го блокираше преминот, потсетува агенцијата „Ројтерс“.

„Ние дадовме понуда да им помогнеме на нашите египетски браќа и ако дојде позитивен одговор од нив, нашиот брод ‘Нене Хатун’ е меѓу ретките во светот што може да заврши работа во вкави ситуации“, рече турскиот министер за телевизијата НТВ.

Тој додаде дека Анкара сè уште не добила одговор, но дека е подготвена да дејствува, пренесува „Ројтерс“.

На почетокот на овој месец Турција објави дека ги обновила контактите со Египет. Нивната врска е „на мраз“ откако египетската армија во 2013 година го симна од власт претседателот Мохамед Морси, близок сојузник на Ердоган.