Руската делегација во мировните преговори со Украина претрпе „квалитативна промена“, изјави украинскиот министер за надворешни работи Андриј Сибиха во интервју објавено синоќа. Неговите коментари доаѓаат во време на обновени дипломатски напори од страна на Украина, Русија и САД, поттикнати од иницијативата на американскиот претседател Доналд Трамп за прекин на војната. Следната рунда разговори се очекува в недела, 1 февруари, објави „Киев Индепендент“.

Украинската делегација вклучува високи функционери како што се секретарот на Советот за национална безбедност и одбрана Рустем Умеров и началникот на кабинетот на претседателот Кирил Буданов.

Руската страна сега ја предводи адмиралот Игор Костјуков, шеф на руското воено разузнавање, заедно со високи претставници на Министерството за одбрана. „Гледаме квалитативна промена во составот“, рече Сибиха. „Ова се различни луѓе и немаше повеќе псевдоисториски предавања. Разговорите беа многу фокусирани.“

Во претходните преговори, руската делегација ја предводеше Владимир Медински, советник на рускиот претседател Владимир Путин, кој стана познат по своите долги историски дигресии. Медински ја водеше последната претходна рунда директни преговори во Истанбул во март и април 2022 година. За време на преговорите во 2025 година, тој наводно ѝ се закани на Украина со понатамошна окупација на територијата и предупреди дека Русија е подготвена да се бори бесконечно ако Киев ги отфрли максималистичките барања на Москва.

Изјавите на министерот за надворешни работи се во согласност со неодамнешните коментари на претседателот Володимир Зеленски, кој ги опиша разговорите одржани на 23 и 24 јануари, во кои учествуваа Украина, САД и Русија, како „конструктивни“.

Сибиха додаде дека Зеленски е подготвен да се сретне со Путин за да реши две клучни прашања во мировниот процес: територијалните прашања и иднината на нуклеарната централа Запорожје, која е под руска окупација. „Токму за да ги реши овие прашања, претседателот е подготвен да се сретне со Путин и да разговара за нив“, рече Сибиха, додавајќи дека не гледа смисла во средбата со рускиот министер за надворешни работи Сергеј Лавров.

„Киев Индепендент“ дознава дека Вашингтон се надева дека ќе ги турне преговорите „кон нивниот конечен крај“ за време на следната рунда разговори, иако Москва сè уште не сигнализирала дека е подготвена да ги прифати предлозите што се моментално на маса.

Се очекува најспорните прашања да доминираат на агендата – барањето на Русија Украина да се повлече од делови од Донбас и претензиите на Москва кон нуклеарната централа Запорожје.

Русија преку ноќ изврши масовен напад со беспилотни летала врз Украина, при што загинаа најмалку 12 лица низ целата земја. Патнички воз беше погоден во Харковската област, при што загинаа пет лица, додека нови цивилни жртви беа регистрирани во нападите врз Одеса и околината на Киев. Украинскиот претседател Володимир Зеленски го нарече нападот врз возот „терористички чин“, пишува „Euronews“.

Најмалку пет лица беа убиени откако руски дрон удри во патнички воз во Харковската област во вторникот вечерта. Претседателот Зеленски објави кратко видео од еден од запалените вагони на социјалната мрежа Икс, а регионалните служби за итни случаи подоцна објавија дека пожарот е изгаснат.

„Убивањето цивили во вагон на воз нема и не може да има никакво воено оправдување“, напиша Зеленски. „Во возот имаше повеќе од 200 патници, од кои 18 беа во вагонот погоден од рускиот дрон. Русите значително ја зголемија својата способност за убивање и тероризирање“, додаде тој, повторувајќи ја потребата од поголем притисок врз Москва, порака што постојано им ја испраќа на своите сојузници.

Бран од над 50 руски беспилотни летала, исто така, го погоди пристаништето на Црното Море Одеса во вторникот, каде што, според официјалните лица, три лица беа убиени, а повеќе од 30 беа ранети, вклучувајќи две деца. Целите на нападот беа градската електрична мрежа, која Русија постојано ја таргетира за да ги прекине снабдувањето со електрична енергија и греење во средината на зимата, и пет станбени згради.

Одеса е стратешки центар за украинскиот извоз и е честа цел на руски напади. Според украинските власти, меѓу беспилотните летала што се користеа во нападот врз јужниот град беа модели што неодамна ги надгради Русија за да го подобрат својот дострел и моќ на удар.

Русија, исто така, го таргетираше Киев, кој е под сè почести напади во последните месеци. Најмалку две лица беа убиени во нападот. „Двајца наши сограѓани, маж и жена, беа убиени во населбата Билохородка како резултат на нападот“, објави на Телеграм Микола Калашник, началник на воената администрација на Киевската област.

Според украинската национална полиција, четиригодишното дете на загинатиот пар преживеало, но било рането во нападот. Уште три лица беа повредени.

Американските сили ќе спроведат повеќедневна воздушна вежба на Блискиот Исток, додека Вашингтон го засилува своето воено присуство во регионот поради зголемените тензии со Иран. Најавата за вежбата доаѓа откако ударната група на носачот на авиони „УСС Абрахам Линколн“ пристигна во зоната под надлежност на Централната команда на САД (CENTCOM), а претседателот Доналд Трамп предупреди дека „армада“ се движи кон Иран, објави Си-ен-ен.

Според генерал-потполковник Дерек Франс, командант на воздухопловните сили во CENTCOM, вежбата ќе им овозможи на пилотите да демонстрираат „како да распоредуваат, управуваат и спроведуваат борбени мисии во тешки услови, безбедно, прецизно и со нашите партнери“.

CENTCOM не ја прецизираше точната локација или времетраење на вежбата, ниту кои воени единици ќе учествуваат во неа.

Најавата за вежбата дојде откако Трамп се закани со можна воена акција против иранскиот режим поради неговото брутално задушување на бранот антивладини протести. Сепак, извори за Си-ен-ен изјавија дека Трамп сè уште ги разгледува своите опции и дека нема индикации дека е донесена каква било одлука за можна акција против Иран.

„Имаме многу бродови што се движат во таа насока, за секој случај. Би сакал ништо да не се случи, но ги следиме многу внимателно“, рече Трамп во петокот.