Бразилската федерална полиција соопшти дека издала налог за апсење 54 лица поради наводна улога во голема мрежа за шверцување наркотици, која се специјализирала за авионски испораки за Брасил, САД и за Европа.

Полицијата соопшти дека имала судски налози за заплена на 47 авиони на кои се наоѓа голема количина од стоката, пренесе „Ројтерс“.

Претседателот на Европската комисија, Жан-Клод Јункер, изјави дека не е оптимист кога станува збор за излезот на Велика Британија од Европската Унија со договор предупредувајќи дека неуспехот во преговите би чинел скапо.

„Ако не дојде до договор, што не можам да го исклучам како опција, тоа би имало катастрофални економски и социјални последици врз Велика Британија и ЕУ, а моите напори се насочени кои избегнување такво нешто. Но, не сум оптимист кога станува збор за овој проблем“, изјави Јункер, кој вчера се состана со британската премиерка, Тереза Меј, пренесе „Ројтерс“.

Мигрантите кои нелегално влегле во ЕУ и се „во транзит“ се плашат да побараат азил во Европа поради репресивните и заплашувачки политики против нив, се вели во еден извештај.

Хуманитарната организација „Доктори без граници“ и белгиската невладина организација ЦИРЕ во извештајот велат дека мигрантите во „транзит“ немаат храброст да побараат азил и заштита во Белгија.

„Нехуманите услови во бегалските кампови на границите на Европа, Даблинската регулатива, репресивните акции на полицијата и кампањите за разубедување кои се водат во Белгија и низ цела Европа, се причина за недовербата на мигрантите во властите, а ова само придонесува кон нивната ранливост“, се вели во извештајот.

Според Даблинската регулатива на ЕУ, азилантите треба да бидат процесирани во првата земја во која ќе пристигнат.

Ова правило значи дека одговорноста за одобрување статус на азил паѓа на земјите на надворешните граници од Европа, односно оние земји преку кои бегалците првично влегуваат во ЕУ.

Во извештајот се додава дека мигрантите се чувствуваат одвоени во Европа и дека актуелната мигрантска политика им ги скратува основните права.