Куба се надева дека годинава ќе произведе 100 милиони дози од својата вакцина против коронавирус и ќе ја вакцинира целата популација, најави директорот на институтот „Финлеј“, кој управува со два од четирите проекти за вакцина кои се во фаза на клинички студии.

„Имаме капацитет да произведеме 100 милиони дози од ‘Соберане 2’, која е најнапредниот кандидат за кубанска вакцина“, изјави Висенте Верес пред новинарите, додавајќи дека фазата на производство е веќе започната.

Според него, ако сè оди како што треба, целото население на Куба ќе биде вакцинирано оваа година.

„Во февруари ќе почнеме клиничко испитување на педијатриската популација, така што вакцината може да се примени и на деца“, рече тој.

Целта е да се започне општа вакцинација на Кубанците во првата половина на годината. Вакцината ќе биде бесплатна, но не и задолжителна. Верес рече дека ќе им биде понудена и на туристите.

Куба има четири кандидати за вакцини: „Соберана 1 и 2“, „Абдала“ и „Мамбиса“, сите во фаза на клинички испитувања. Првите три се даваат со инјекција, четвртата е спреј за нос.

Доколку некоја од нив добие конечно одобрување, тоа ќе биде првата вакцина против Ковид-19 направена и произведена во Латинска Америка.

Иако неодамна се зголеми бројот на случаи, Куба останува една од најмалку погодените земји од пандемијата во нејзиниот регион, со вкупно 19.122 заболени и 180 смртни случаи. Во Куба живеат 11,2 милиони жители.

Претседателот на САД, Џо Бајден, потпиша извршна уредба со која започна процесот на враќање на Соединетите држави во Парискиот климатски договор, со што е укинат еден од клучните потези на неговиот претходник Доналд Трамп.

Набргу откако положи заклетва како 46-ти американски претседател, Бајден потпиша серија декрети со кои се укинаа климатските политики на Трамп кој долго време се спротивставуваше на глобалниот договор за климата потпишан од скоро сите земји во светот, а во ноември 2020 година, САД и официјално се повлекоа од пактот.

Во исто време, одлуката на САД означи големо намалување на американското финансирање за посиромашните земји за да им помогне да ги надминат ефектите од климатските промени.

Европската унија и Обединетите нации синоќа го поздравија враќањето на САД во Парискиот договор за климатски промени. Францускиот претседател, Емануел Макрон, исто така, го поздрави потегот на Бајден, и напиша на Твитер: „Добредојдовте назад во Парискиот договор“.

На неговиот прв ден на функцијата, Бајден, исто така, потпиша и указ со кој се бара преиспитување на сите одлуки на Трамп за ублажување на мерките за заштита на животната средина.

Благодарение на подобрувањето на епидемиолошката состојба во поголемиот дел од Словенија, скијачките центри наскоро ќе бидат отворени под одредени услови, следната недела повторно ќе започнат часовите во пониските одделенија во основните училишта, а ќе се отворат и пазарите и фризерските салони, објави словенечката влада.

„Во девет од 12-те региони, оние со подобра епидемиолошка слика, ски-центрите ќе бидат повторно отворени од сабота, а оние со негативен тест за коронавирус можат да скијаат“, потврди премиерот Јанез Јанша по сесијата.

Што се однесува до условите за влез во Словенија за патниците од ЕУ и Шенген зоната, владата одлучи тие да можат да влезат без задолжителен карантин или негативен тест за коронавирус, под услов престојот да не трае подолго од 12 часа, а во следните случаи: ако имаат недвижен имот или земјиште во Словенија, поради грижа на член на семејството или имот, поради контакт со дете и некои други исклучителни случаи.