Во последните 24 часа во Хрватска се потврдени 162 нови случаи на коронавирус, а две лица починале, соопшти Националниот штаб за цивилна заштита.

Во моментов активни се 1.062 случаи, пренесува „Хина“. Меѓу заразените, има 106 пациенти на болничко лекување, од кои 10 се на респиратор.

Од почетокот на епидемијата, во Хрватска се регистрирани 6.420 случаи на коронавирус, а починале 165 лица.

Во Србија, пак, според последните податоци регистрирани се 238 нови случаи на коронавирус, на направени 8.529 тестови во последните 24 часа.

Во истиот период регистрирани се и пет смртни случаи, со што вкупниот бројот на починати поради компликации од Ковид-19 достигна 670.

На респиратори се 75 пациенти, а вкупно 1.947 се хоспитализирани.

Стапката на смртност е 2,27 отсто. Од почетокот на епидемијата се тестирани вкупно 798.009 лица, а потврдени се 29.471 случај на инфекција.

Австрискиот канцелар Себастијан Курц се изјасни за построги мерки за луѓето што се враќаат од одмор на австриските граници.

„ Мораме построго да контролираме. Итно е потребно здравствените власти да обезбедат опсежна контрола“ изјавил Курц за дневникот „Естерајх“.

Тој рекол дека одговорноста е кај секој поединец да се придржува до сите мерки во рок од 48 часа да направи тест на коронавирус. Курц смета дека е значајно да се воведе тестирање директно на граница.

„Тоа го сметам за корисно, но тоа е во одговорност на здравствените власти“ објаснил тој.

„Здравстените власти мораат да бидат подобри во својата работа. Тоа се однесува пред се на спроведувањето тестови. Предолго трае додека луѓето ги добијат резултатите. Исто така мора мерката карантин побрзо да биде спроведена“ додал Курц.

Според него, актуелниот раст на бројот на новозаразени е загрижувачки. Тој се изјасни и за отворањето на училиштата.

„ Целта е наставата да се одржи. Ако дојде до сомневање за можна зараза, тогаш во тие училишта би се спровеле тестирања на учениците. Евентуално затворање на училиштата треба за секое училиште поединечно да се оценува“ нагласува австрискиот канцелар.

Австрија ја стави Хрватска во групата ризични региони, за кои важи мерката – по враќање во Австрија, неопходен е негативен ПСР тест. Предупредувањето за патување ќе стапи на сила во понеделник на полноќ.

Неколку илјади демонстранти денеска протестираа во Сеул против повторното воведување мерки за физичка дистанца, откако е забележан голем пораст на нови случаи на ковид-19.

Протестите избија откако судот во Сеул ја поддржа одлуката на владата да забрани големи собири поради здравствени ризици.

Полицијата предуперди дека нема да дозволи незаконски протести.

Протестот се одржува пред Денот на ослободувањето, денот кога Јужна Кореја го одбележува датумот кога е ослободена од јапонската окупација, по што таа земја капитулира во Втората светска војна.

Во Јужна Кореја денеска се регистрирани 166 нови случаи на ковид-19, што е најголем дневен пораст во последните пет месеци.