Свет
Хезболах има складирано експлозиви во цела Европа

Хезболах прошверцувал експлозиви, вклучително и амониумнитрат во Европа, каде што има мрежа од складишта, обелодени во четвртокот вечерта од висок службеник на американскиот Стејт департмент, пренесува „Нејшнел“.
Складиштата, отворени во цела Европа од 2012 година, содржат амониумнитрат – истата хемикалија што ја предизвика уништувачката експлозија на 4 август во Бејрут, во која загинаа најмалку 190, а беа ранети повеќе од 6.500.
„Денес, американската влада открива нови информации за присуството на Хезболах во Европа“, рече Нејтан Сејлс, координатор за борба против тероризмот во американскиот Стејт департмент.
„Од 2012 година Хезболах складира резерва од амониумнитрат во цела Европа транспортирајќи комплети за прва помош што ја содржат оваа супстанција. Денес може да обелоденам дека ваквите товари се префрлени преку Белгија во Франција, Грција, Италија, Шпанија и во Швајцарија“.
Амониумнитратот најчесто се користи во индустријата и во земјоделството како ѓубриво и послаб експлозив. Но, во големи количини, како што беше случај со експлозијата во пристаништето во Бејрут, тој може да предизвика пустош – 2.750 тони амониумнитрат ја предизвикаа, како што се верува, најсилната ненуклеарна експлозија во светот.
„Можам да посочам и дека се откриени или уништени значителни количества амониумнитрат во Франција, Грција и во во Италија. Имаме причини да веруваме дека оваа активност е сè уште во тек. Од 2018 година сè уште постои сомнеж дека се чува амониумнитрат во цела Европа, веројатно во Грција, Италија и во Шпанија“, рече Сејлс.
Американскиот висок службеник не откри како се добиени информациите, но се чинеше уверен дека Хезболах го чува овој материјал во цела Европа, па дури и Велика Британија.
„Ние знаеме дека Хезболах има складирано огромни количини амониумнитрат во цела Европа. САД повикаа на целосна, отворена и транспарентна и темелна истрага за експлозијата во Бејрут и се надеваме дека набргу ќе ги видиме резултатите од тоа“, рече тој.
Сејлс рече дека Хезболах ја чува супстанцијата за некој иден терористички напад.
„Го складираат ова оружје за да може да извршат големи терористички напади секогаш кога нивните господари во Техеран сметаат дека е потребно. Тое не е нешто што би го очекувале од политичка организација, туку од терористичка организација“, рече тој.
Американската влада ги повика европските влади да стават крај на правењето разлика меѓу политичкото и военото крило на Хезболах и да ја означат целата организација како терористичка група. Велика Британија, Германија, Холандија и Литванија веќе го сторија тоа, а ЕУ и Франција сè уште прават разлика меѓу двете крила.
„Продолжуваме да го сметаме Хезболах за закана не само за САД туку и за нашите европски сојузници. И затоа го обновуваме нашиот повик за повеќе земји да ја означат групата како целина и ЕУ да го прошири своето означување од 2013 година и на т.н. воено крило за да стигне до целата организација“, рече Сејлс.
Сејлс посочи дека експлозијата на 4 август во Бејрут е ужасен и жив потсетник за тоа колку може да биде смртоносен амониумнитратот. Тој ја повика либанската влада да спроведе непристрасна и транспарентна истрага за експлозијата во пристаништето.
Хезболан, либанските власти и европските влади не ги коментираа американските наводи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Хрватот кој беше уапсен поради летање дрон близу аеродромот во Франкфурт се соочува со казна до 50.000 евра

Германската полиција презеде мерки против 41-годишен хрватски државјанин поради управување со дрон во зона забранета за летови во близина на аеродромот во Франкфурт.
Портпаролот на полицијата во Франкфурт изјави за ДПА дека нема докази дека уапсениот маж е поврзан со Русија.
Човекот им рекол на полицајците дека „само сакал да го испроба својот нов дрон“.
Хрватскиот државјанин се гони за прекршок и се соочува со парична казна. Во Германија, летовите со беспилотни летала над чувствителни области како што се аеродроми, затвори или воени бази се строго забранети. Казните за нелегални летови се до 50.000 евра.
Уште посериозно, ако се утврди дека летот претставувал опасна интервенција во воздушниот сообраќај, сторителот се соочува со затворска казна од шест месеци до десет години.
Свет
Трамп: Хамас ќе се соочи со тотално уништување ако не се согласи со планот за прекин на огнот

Американскиот претседател Доналд Трамп изјави дека палестинската милитантна група Хамас ќе се соочи со „тотално уништување“ ако одбие да ја предаде власта и контролата врз Газа.
„Тотално уништување!“ , рече Трамп за Си-Ен-Ен, кога го прашаа што ќе се случи со планот за прекин на огнот од 20 точки на Белата куќа ако Хамас инсистира да остане на власт.
На прашањето дали израелскиот премиер Бенјамин Нетанјаху го поддржува прекинувањето на бомбардирањето на Газа и пошироката визија за САД, Трамп за Си-Ен-Ен изјави: „Да, Биби е за“.
Американскиот лидер додаде дека наскоро ќе се знае дали Хамас е навистина посветен на мирот.
– Ќе дознаеме. Само времето ќе покаже – одговори Трамп.
Овде прочитајте што содржи планот на Трамп за прекин на војната во Газа составен од 20 точки.
Свет
За 24 часа Израел изврши 93 напади врз Појасот Газа, најмалку 70 загинати

Во последните 24 часа, израелските сили извршија 93 напади врз Појасот Газа во кои беа убиени најмалку 70 Палестинци, соопшти Канцеларијата за медиуми во Газа.
Канцеларијата изјави дека 93 израелски воздушни и артилериски напади биле насочени кон густо населени цивилни области, како и раселени Палестинци низ окупираната палестинска енклава, објави Ал Џезира.
– Ова ново злосторство спаѓа во рамките на тековниот геноцид врз нашиот палестински народ и потврдува дека окупаторот ги игнорира сите меѓународни повици за смиреност и инсистира на продолжување на систематското убивање на цивили и уништување на темелите на животот во Појасот Газа – се вели во соопштението на прес-службата.
Канцеларијата апелираше до администрацијата на Трамп и меѓународната заедница да преземат „сериозни, ефикасни и итни мерки“ за да го спречат израелското бомбардирање.
Според проценките на израелската армија, околу 900.000 од вкупно околу еден милион Палестинци, кои живееле во градот Газа и северниот дел од енклавата пред големата офанзива на Израелските одбранбени сили (ИДФ), биле евакуирани на југ од Појасот Газа.
Според израелските податоци, бројот на Палестинци кои го напуштаат северниот дел од Појасот Газа се зголемил во последните недели по напредувањето на израелската армија, објави „Тајмс оф Израел“.
Сепак, Канцеларијата на Обединетите нации за координација на хуманитарните прашања на 2 октомври објави дека „се проценува дека стотици илјади луѓе остануваат во градот Газа и северниот дел од енклавата“.
Минатиот месец на цивилите им беше наредено да го евакуираат градот Газа и сите области во северниот дел на енклавата и да се упатат кон хуманитарната зона назначена од Израел во јужниот дел на Појасот Газа.