Во Австрија, бројот на новозаразени со коронавирус останува на високо ниво, а во изминатите 24 часа се регистрирани 1.524 нови случаи.

Ова беше утврдено врз основа на 19.469 спроведени тестови.

Во споредба со минатата недела, тоа е раст од околу 50 проценти.

Најголем број новозаразени има во Виена, 333.

Потоа следува Тирол со 292 новозаразени, а потоа Горна Австрија со 243.

Во моментов, во Австрија има 15.471 активен пациент, од кои 889 се хоспитализирани, што е за 90 повеќе од вчера, додека бројот на пациенти на интензивна нега е непроменет, 145.

Во изминатите 24 часа починале 10 лица, така што вкупниот број на смртни случаи од Ковид-19 се зголеми на 914.

Од почетокот на епидемијата на коронавирус во Австрија, на крајот на февруари, вкупно 67.792 лица биле позитивно тестирани за коронавирус, а 51.407 биле излекувани.

Ако победи на претседателските избори во САД, Џо Бајден ќе биде силно посветен на консолидирање на мирот и стабилноста на Западен Балкан, преку зајакнување на сојузот со ЕУ и НАТО, објавија од изборниот тим на демократскиот кандидат за претседател на САД.

Составен дел од изборната програма на Бајден е и делот поврзан со приоритетите во надворешната политика, а исто така и Југоисточна Европа најде место меѓу нив. Посебно се истакнува најавата за ангажман на САД во БиХ, а оваа информација на неговиот „Фејсбук“ профил ја сподели во вторникот Елвир Клемпиќ, по потекло од БиХ, кој е одговорен за односите со етничките заедници во САД во изборниот штаб на Бајден.

„Џо Бајден ќе ги обедини нашите партнери во рамките на ЕУ и НАТО за заеднички развој на стратегија за зајакнување на позицијата на Западен Балкан во евро-атлантските институции. Џо Бајден знае дека е време храброто и одлучно американско раководство да ги поттикне реформите и помирувањето, со цел повторно да се посветиме на нашата долго ветена цел за целосна, слободна и мирна Европа. Џо Бајден е посветен на тоа дека ќе биде засекогаш против омразата и ќе ги поддржи суверенитетот, територијалниот интегритет и мултиетничкиот карактер на Босна и Херцеговина “, се вели во програмата.

Од 22 октомври ќе се воведе полициски час во северната италијанска покраина Ломбардија, која се смета за „локомотива“ на италијанската индустрија.

Според новата наредба, која е одобрена од централната влада на предлог на владата на Ломбардија, сите трговски активности во целиот регион ќе престанат од 23 часот навечер до 5 часот наутро, освен неопходните, а големите трговски центри ќе останат затворени за време на викендот.

На граѓаните им се препорачува да излегуваат надвор само кога е потребно, а компаниите да ја потенцираат работата од дома.

Претседателот на регионот Ломбардија, Атилио Фонтана, ја донесе одлуката со целосна согласност од сите регионални политички субјекти, и на предлог на научниот и техничкиот комитет со цел да се спречи ширењето на коронавирусот.

Според проценките на Комитетот, кој го анализираше забрзаното ширење на инфекција со коронавирус во последните неколку недели, до крајот на овој месец може да има 600 пациенти во единиците за интензивна нега во Ломбардија, а вкупно хоспитализирани и до 4.000.

Воведувањето на вакви строги ограничувачки мерки во најразвиениот индустриски регион на Италија, Ломбардија, вознемири многу граѓани, а јавноста претпоставува дека слични мерки, доколку не се запре брзото ширење на Ковид-19, ќе бидат воведени и во другите делови на Италија.