Свет
Шпанија дозволила израелски агент да сослушува палестински новинар во Мадрид

Шпанските безбедносни служби дозволиле израелски агент од шпионската агенција Мосад да сослушува палестински новинар кој барал азил, објави новинската агенција „Вафа“.
Инцидентот во зградата на Цивилната гарда во Мадрид беше осуден од синдикатот на палестинските новинари. Синдикатот ја повика шпанската влада да преземе одговорност преку осигирување на безбедноста на Муат Хамид и на неговото семејство. Оттаму, исто така, повикаа шпанските власти да отворат истрага за тоа што се случило за време на сослушувањето.
Шпанската Цивилна гарда е најстарата агенција за спроведување на законот во земјата и има „воена природа“. Синдикатот на новинари соопшти дека постои сомневање дека заедно со Мосад овозможила израелскиот агент да го испрашува Хамид во својата зграда.
„Ова е грубо кршење на меѓународното право, повреда на шпанскиот суверенитет и закана за безбедноста и сигурноста на новинарот“, тврди синдикатот.
Во изјавата се додава дека случајот се следи внимателно заедно со Унијата на шпански новинари, палестинското Министерство за надворешни работи и иселеници и шпанските политички и безбедносни органи за да се осигура дека Хамид нема да биде предмет на никаква повреда или тортура.
Хамид, кој е репортер на телевизијата „Ал Араби“ и хонорарен соработник на „ Ал-Араби Ал-Џадид“ во моментов има статус на бегалец во Шпанија, каде што живее со сопругата и двете деца.
Популарниот шпански онлајн весник „Публико“ минатиот петок објави дека на 9 декември Хамид добил телефонски повик од „Николас“, дежурен офицер во информативната служба на шпанската Цивилната гарда
„Николас наводно сакал да разговара за работата на Хамид како новинар, за неговото минато и неговиот живот во Шпанија. Ова е редовна постапка за бегалците и мигрантите“, објави „Публико“.
Кога новинарот отишол да го се сретне со „Никола“ во Билбао, се сретнал со друг офицер, Хавиер.
„Хамид одговорил на сите прашања, објаснувајќи зошто поднел барање за азил во Шпанија и го опишал своето патување од Палестина до Европа преку Турција“, објави Паблико.
На почетокот на февруари младиот палестински новинар повторно бил повикан од Никола… овој пат во Мадрид. Овој пат во просторијата имало и друг човек, наводно наречен Омар, кој му бил претставен како Палестинец. Хамид, сепак, веднаш го забележал неговиот израелски акцент и решил да одговори на неговите прашања на хебрејски.
Омар признал дека е Израелец, а во тој момент Хавиер ја напуштил просторијата, оставајќи го Хамид во рацете на агентот на Мосад, кој им се заканил на палестинскиот новинар и на неговото семејство, велејќи дека никогаш нема да им биде дозволено да се вратат во Палестина поради една од неговите новинарски истраги поврзана со работата на Мосад.
„Публико“ побарал коментар и појаснувања од Израелската амбасада и од Цивилната гарда, како и од шпанското Министерство за внатрешни работи, но досега нема повратни одговори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин и Макрон разговараа по телефон по три години

Рускиот претседател, Владимир Путин разговараше со францускиот претседател Емануел Макрон за војната во Украина, соопшти денес Кремљ. Се работи за прв телефонски разговор меѓу двајцата лидери од 2022 година.
Во соопштението се наведува дека Путин, коментирајќи ја ситуацијата во Украина, оценил дека сегашниот конфликт е директна последица на политиките на западните земји кои со години ги игнорираа безбедносните интереси на Русија, а сега водат политика на продолжување на непријателствата.
Рускиот претседател ги потврди основните пристапи кон можните мировни договори за Украина, се додава во соопштението, тврдејќи дека договорот треба да биде сеопфатен и долгорочен, да обезбеди отстранување на коренските причини за украинската криза и да се базира на нови територијални реалности.
Двајцата лидери разговараа и за ситуацијата на Блискиот Исток во контекст на конфликтот меѓу Иран и Израел и нападите на САД врз нуклеарните постројки на Иран. Тие ја нагласија посебната одговорност на Русија и Франција како постојани членки на Советот за безбедност на ООН во зачувувањето на мирот и безбедноста и одржувањето на глобалниот режим за неширење на нуклеарно оружје.
„Во овој контекст, важноста од почитување на легитимното право на Техеран да развива мирна нуклеарна енергија и да продолжи да ги исполнува своите обврски според Договорот за неширење на нуклеарно оружје, вклучително и соработката со Меѓународната агенција за атомска енергија (МААЕ)“, се додава во соопштението.
Путин и Макрон се залагаа за решавање на прашањето за иранската нуклеарна програма и другите регионални прашања исклучиво преку политички и дипломатски средства, а беше нагласено дека претседателите се согласиле да продолжат со контактите. „Разговорот меѓу Владимир Путин и Емануел Макрон беше значаен“, се заклучува во соопштението.
Ова е првиот телефонски разговор меѓу двајцата претседатели по повеќе од две години, а последниот познат контакт се одржа во септември 2022 година.
Свет
Тесно изгласан „големиот, прекрасен закон“ на Трамп за даноците и трошењето

Сенатот на САД го изгласа законот за даноци и владини трошоци на претседателот на САД, Доналд Трамп, по повеќе од 24 часа преговори.
Гласањето заврши со нерешен резултат 50-50, при што потпретседателот Џ.Д. Венс во просторијата го даде одлучувачкиот глас. Републиканците Том Тилис, Ранд Пол и Сузан Колинс гласаа против законот, заедно со сите демократи.
Таканаречениот Голем прекрасен закон, кој ги спроведува многу од клучните политички цели на Трамп, а воедно го зголемува националниот долг за 3,3 трилиони долари, сега се враќа во Претставничкиот дом за конечно одобрување.
Трамп претходно навести дека можеби ќе биде флексибилен во врска со рокот од 4 јули.
Поради законот, избувна пресметка меѓу недамнешните сојузници, претседателот Доналд Трамп и милијардерот кој ја водеше канцеларијата за ефикасност на владата, Елон Маск. Денес, таа конфронтација повторно се разгоре.
Американскиот претседател Доналд Трамп го нарече усвојувањето на неговиот закон за даноци и владини трошоци во Сенатот „музика за неговите уши“.
За време на дискусијата на тркалезна маса во новоотворениот, многу контроверзен центар за притвор на мигранти во Флорида, кој е наречен „Алигатор Алкатраз“ поради неговите услови и локација, еден новинар го информираше Трамп дека Сенатот штотуку го усвоил законот.
„Ви благодарам, вау. Ви благодарам, чекав, слушајќи ги овие прекрасни зборови што се музика за моите уши, но ме интересираше и како стоиме. Тоа покажува колку ве ценам затоа што сум тука со вас, а веројатно треба да бидам таму“, одговори Трамп.
Трамп, исто така, го пофали својот потпретседател Џ.Д. Венс, кој го даде одлучувачкиот глас во Сенатот.
„Тој добро си ја врши работата“, рече Трамп.
Кога беше прашан што им кажува на републиканските членови на Претставничкиот дом кои не беа задоволни од промените во законодавството усвоени од Сенатот, Трамп рече:
„Тоа ви кажува дека има по нешто за секого… Тоа е одличен закон. Има по нешто за секого и мислам дека ќе помине многу непречено во Претставничкиот дом. Всушност, мислам дека ќе биде полесно таму отколку во Сенатот.“
Свет
Трамп го навреди фаворитот за градоначалник на Њујорк: „Тој е лудак“

Претседателот на САД, Доналд Трамп, денес остро го критикуваше кандидатот за градоначалник на Њујорк, Зохран Мамдани, нарекувајќи го „целосен лудак“, објави Анадолија.
„Искрено, слушнав дека е тотален лудак“, им рече Трамп на новинарите.
„Мислам дека луѓето од Њујорк се луди што гласаат така. Мислам дека се луди. За прв пат ќе имаме комунист, вистински, чист комунист. Тој сака продавници, стоковни куќи. А што е со луѓето што работат таму? Мислам дека е лудо.“
Мамдани го победи поранешниот гувернер на Њујорк, Ендру Куомо, на демократските прелиминарни избори минатата недела, позиционирајќи се себеси како првиот муслимански градоначалник на Њујорк.
Кандидатот на демократите е познат како отворен поддржувач на Палестина и критичар на Израел. Тој е ко-основач на огранокот Студенти за правда во Палестина на колеџот Боудоин, а во 2023 година учествуваше во штрајк со глад пред Белата куќа барајќи прекин на огнот во Појасот Газа.
Трамп го повтори своето тврдење дека Мамдани бил комунист. „Мислам дека е ужасен. Тој е комунист. Последното нешто што ни треба е комунист. Реков дека никогаш нема да има социјализам во Соединетите Држави“, рече тој.
„Мислам дека е лоша вест и мислам дека ќе се забавувам многу со него, гледајќи го, бидејќи мора да дојде тука за своите пари. Не грижете се, нема да се извлече.“