Два земјотреси со интензитет од 4,1 и 4,3 степени според Рихтер го погодија грчкиот остров Закинтос, објави грчката агенција АНА.

Потресите се регистрирани во Јонско Море на 45 и 56 километри југозападно од Закинтос.

Пред три дена островот го погодија три земјотреси. АНА потсетува дека на Закинтос се регистрирани неколку последователни потреси по земјотресот со јачина од 6,4 степени според Рихтер што се случи на 26 октомври.

Нарачателите на убиството на новинарката Дафне Каруана Галиција на Малта се идентификувани, рекле извори од полицијата за весникот „Д сандеј тајмс оф Малта“.

Според истите извори, повеќе од двајца Малтежани го наредиле убиството што се случи во 2017 година.

За убиството се уапсени тројца осомничени, но не е познат идентитетот на вистинските нарачатели.

Дафне Каруана Галиција (53) беше убиена со бомба поставена во нејзиниот автомобил. Таа истражувала афери со перење пари и криумчарење нафта во која биле вклучени владини членови.

Семејството на новинaрката соопшти дека полицијата сè уште официјално не ги известила дека се идентификувани нарачателите.

Илјадници Бугари ги блокираа главните улици и граничните премини кон Турција и Грција во знак на протест против поскапувањето на горивата во најсиромашната земја во Европската Унија.

„Анадолија“ објави дека биле блокирани и граничните премини со Романија и со Србија.

Протестите се одржуваат секој викенд во текот на изминатиов месец. Демонстрантите повеќе часа го блокираат сообраќајот на повеќе места на главните автопати.

На автопатот кој води кон границата со Турција полицијата се обидела да ги спречи возачите да го блокираат сообраќајот, но тие го пробиле кордонот.

Протестни собори се одржаа во Софија и во другите поголеми градови, а учесниците и за утре најавија блокади на улиците.