Шпанскиот премиер Педро Санчез во средата побара од сепаратистичкиот водач на Каталонија, Ким Тора, да почне дијалог со оние што се против независноста и да се откаже од својата „позиција“ за да ги ублажи тензиите во регионот, пренесува „Локал“.

Санчез, кој дојде на власт во јуни по соборувањето на неговиот конзервативен претходник Маријано Рахој, во понеделникот понуди да одржи референдум за поголема автономија за Каталонија како начин за олеснување на кризата.

Одбележувањето на годишнините од забранетиот референдум за отцепување од Шпанија и од неуспешното еднострано прогласување независност се на 1 и 27 октомври. Но, во вторникот во говорот во Барселона, Тора возврати дека сака референдум за самоопределување. Тој нагласи дека целта сè уште е да се добие независност од Шпанија и ги повика оние кои се за отцепување да се мобилизираат во наредните недели.

Санчез во средата рече дека сепаратистичката регионална влада во Каталонија треба да иницира голема дебата меѓу ненационалистите и националистите во Каталонија.

„Актуелната понуда на Тора може да задоволи половина од Каталонците (кои се за независност), но не ја задоволуваат другата половина од Каталонците”, рече тој .

Неговите коментари доаѓаат само неколку дена пред традиционалните, годишни демонстрации за Дијада, или Денот на Каталонија, на 11 септември. Големиот протест е планиран во центарот на Барселона под мотото „Да ја создадеме Каталонската Република”.