Свет
Јапонската принцеза Мако се откажа од царскиот статус

Јапонската принцеза Мако (29) следниот месец ќе се мажи за својот вереник Кеи Комуро (29), поради што таа ќе остане без статус на член на царското семејство.
Јапонската новинска агенција „Кјодо“, повикувајќи се на извори блиски до владата, пренесува дека венчавката ќе биде организирана во октомври, и дека Мако по венчавката ќе го напушти царскиот двор.
Исто така, се дознава дека брачната двојка ќе се пресели во САД.
Членовите на јапонското царско семејство немаат пасоши. Затоа, Мако со граѓански статус прво ќе аплицира за регистрација на бракот заедно со нејзиниот сопруг.
Според законите што важат во Јапонија, жена од кралското семејство која ќе се омажи за цивил го губи својот кралски статус.
Мако, најстарата ќерка на јапонскиот престолонаследник Фумихит и братучед на императорот Нурихит, е првата принцеза на Јапонија по Втората светска војна што ќе се омажи без традиционална кралска венчавка.
Принцезата и Кеи се запознаа на Универзитетот во Токио во 2012 година.
Според монархистичките правила во Јапонија, членовите на кралското семејство го губат статусот и привилегиите кога се венчаат со некој што не е од царско семејство, но добиваат отпремнина од 1,35 милиони долари. Јапонските медиуми пренесуваат дека Мако најверојатно нема да ја прифати отпремнината.
Мако и Кеи ја одложуваа венчавката две години поради долгот што мајката на Кеи го имала кон својот поранешен вереник, но тие долгови сега се чини дека се подмирени.
На крајот на минатата година, јапонскиот престолонаследник, Фумихито, ѝ даде дозвола на својата ќерка да се омажи за Кеи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Лавров: Палестинското прашање и понатаму останува нерешено

Рускиот министер за надворешни работи Сергеј Лавров изјави дека мировниот план за Газа на Доналд Трамп не го решава целосно израелско-палестинскиот конфликт, пренесе RT.
Тој нагласи дека Русија го оценува планот како „најдобро што моментално е на преговарачката маса“, но додаде дека „палестинското прашање со тоа не е решено“.
Лавров порача дека конечно решение би било можно само со создавање на палестинска држава во границите од 1967 година, во согласност со резолуциите на ОН, и повтори дека Москва останува посветена на решението со две држави.
Свет
Трамп: Не сум сигурен дека ќе влезам во рајот, но на многумина им го разубавив животот

Американскиот претседател Доналд Трамп изјави дека не е сигурен дека ќе може да влезе во рајот, но додаде дека на многумина им го направил животот подобар.
Изјавата ја даде во претседателскиот авион Air Force One. За време на летот, еден од новинарите што го придружуваа 79-годишниот претседател го праша за неговите претходни коментари кои ги дал во контекст на преговорите за мировниот договор во војната меѓу Русија и Украина.
Трамп уште во август, во емисијата „Fox and Friends“, изјави: „Ако можам да спасам 7.000 луѓе неделно, мислам дека тоа е прилично добро – сакам да се обидам да влезам во рајот, ако е можно. Слушам дека не ми оди добро. Навистина сум на дното на листата. Но ако успеам да влезам во рајот, ова ќе биде една од причините“
На прашањето дали неговите шанси се подобриле по договорот меѓу Израел и Хамас, Трамп сега одговори: „Малку се шегувам. Мислам дека ништо нема да ме одведе во рајот. Можеби не сум предодреден за тоа. Можеби сум во рајот токму сега, додека летаме со Air Force One,“ рече Трамп.
Тој повторно ја обвини администрацијата на Џо Бајден за неспособност и додаде дека војната во Украина никогаш немаше да се случи доколку изборите во 2020 година не биле наместени.
Свет
Египетскиот претседател до Израелците: Претворете го овој историски момент во нов почеток

Египетскиот претседател Абдел Фатах ал-Сиси ги повика Израелците моментот на потпишување на мировниот договор за Газа да го претворат во нов почеток за поправеден и помирен живот во регионот.
„Погледнете кон подобра иднина за нашите деца,“ рече Сиси по потпишувањето на договорот во Шарм ел-Шеик.
На самитот присуствуваа Доналд Трамп и бројни меѓународни претставници. Обраќајќи му се на Трамп, Сиси додаде: „Господине претседателе, нека војната во Газа биде последната војна на Блискиот Исток.“