Деветнаесет лица сè уште се водат како исчезнати два дена по нападот во хотелот во Најроби, во кој беше убиено 21 лице, соопшти Црвениот крст на Кенија. Меѓу жртвите има британски и американски државјанин, а другите, најверојатно, се кениски државјани.

DusitD2

Претседателот на Кенија, Ухуру Кенјата, соопшти вчеравечер дека 20-часовната опсада е завршена со ликвидација на сомалиските напаѓачи што влегоа во луксузниот хотелски комплекс DusitD2, во кој имало стотина гости и вработени.

Одговорноста за нападот ја презеде терористичката организација Ал Шабаб со седиште во Сомалија, која се бори да наметне строг исламски закон.

Секој трет вработен во Обединетите нации бил сексуално вознемируван во последните две години, покажува извештај на оваа меѓународна организација, објави Би-би-си. Во истражувањето учествувале само 30.364 вработени или околу 17 отсто од вкупниот број.

Генералниот секретар на ОН, Антонио Гутереш, рекол дека извештајот и умерено ниската стапка на одговори е знак дека пред нив е долг пат. Тој рекол дека релативно малиот број учесници во истражувањето би можело да биде знак на чувство на недоверба, перцепција за неактивност и недостиг на одговорност во ОН.

Според извештајот, повеќе од половина од оние што биле жртва на сексуално вознемирување во ОН рекле дека тоа се случило во канцеларија, а 17,1 отсто од вкупниот број учесници во истражувањето рекле дека тоа се случило на социјален настан поврзан за работата. Повеќе од една петтина, 21,7 отсто, рекле дека им биле раскажувани несоодветни сексуални случки или вицови. Околу 14 отсто од испитаниците добиле навредливи коментари за нивниот изглед, тело или сексуални активности, а 13 отсто имале колеги што се обиделе да внесат сексуални разговори.

Во извештајот се наведува дека двајца од тројца што малтретираат се мажи, а секој трет вработен по сексуалното вознемирување, презел некакви дејства.

Министерството за надворешни работи на Турција остро го осуди терористичкиот напад врз американските војници во сирискиот град Манбиџ во кој загинаа 20 лица, од кои четворица американски војници.

Во соопштението на министерството се истакнува дека „Турција со жалење дознава за бомбашкиот напад во центарот на градот Манбиџ во кој загинаа американски воен персонал и цивили“ и се подвлекува дека Турција осудувајќи го ова злосторничко дело со решителност ќе продолжи со активностите што заеднички ги води со САД во правец на отстранување на терористичките организации од Манбиџ и обезбедување на стабилноста и безбедноста во регионот.

Нападот за кој одговорност презеде Исламската држава се случи по изјавите на претседателот на САД, Доналд Трамп, дека САД ќе ги повлече своите трупи од Сирија.

Асуде Кочан