Сириските демократски сили предводени од Курдите денес ја обвинија Турција за бомбардирање на области населени со цивили, кршејќи го договорениот петдневен прекин на огнот.

„И покрај договорот да се стави крај на борбите, турската авијација и артилерија продолжуваат да ги напаѓаат позициите на нашите борци и цивилните населби“, рече портпаролот на сириските демократски сили Муастафа Бали.

Тој додаде дека турските сили го бомбардирале пограничниот град Рас ал Аин, пренесува „Ројтерс“.

Британска агенција претходно објави дека се слушаат експлозии од гранати и пукање во областа на градот, еден ден откако Турција постигна договор со САД за петдневно запирање на офанзивата за да може силите предводени од Курдите да се повлечат.

Германската компанија „Хермес“ во источна Германија престана со работа кога двајца нејзини работници починале во рок од неколку часа, а третиот завршил во болница.

Првиот работник починал во магацинот на компанијата, вториот во комбе, а причините сè уште не се познати.

Во овој момент полицијата ги испитува околностите на смртта и ги третира како несреќен случај.

Полицијата ги тестирала супстанциите пронајдени во пратките во комбето под сомнение дека се токсични, но се наведува дека количината не е доволна за да убие возрасно лице.

На третиот човек во магацинот му се слошило, а полицијата во соопштението тврди дека неговото заминување во болница е сосема нормална медицинска процедура и дека господинот претходно имал здравствени проблеми.

„Хермес“ има 3.000 вработени и моментно не ја извршува дејноста од предострожност.

Противпожарни екипи веднаш дошле во складот ​​каде што се случила трагедијата.

Кога ги отвориле пакетите, откриле помали количини одредени супстанции што не биле смртоносни.

Само по обдукцијата на двајцата починати ќе биде појасно што се случило, но првите медицински извештаи негираат дека причина за смртта била труење.

Њујоршкото градско собрание денес изгласа затворање на озлогласениот градски затвор „Рикерс“ до 2026 година оценувајќи го како нехуман комплекс кој е оптоварен со хронично насилство.

Затворањето на „Рикерс“ и уште три градски затвори ќе ја чини градската каса 8,7 милијарди долари, односно од тие средства ќе се финансира отворањето четири похумани затвори во градот, а островот Рикерс ќе биде претворен во јавен простор.

„Островот Рикерс е симбол на суровост и нехуманост и време е да го затвориме еднаш засекогаш“, рече претседателот на Градскиот совет, Кори Џонсон, пред гласањето.

„Мислам дека не претерувам кога ќе кажам дека за многумина од нас, ова е еден од најважните гласови што ќе ги дадеме во целата наша кариера“, рече тој.

Во затворот, кој се протега на 160 хектари на остров на Ист Ривер, поврзан со мост со њујоршкиот округ Квинс, има околу 7.000 затвореници, од кои повеќето чекаат судење или издржуваат казни помали од една година.

Во екот на криминалниот бран пред две децении во тој затвор на дневно ниво во просек имало над 20.000 затвореници.

Во 2017 година градоначалникот Бил де Бласио предложи затворање на „Рикерс“ во рок од 10 години, а заклучно со 2018 година лица под 18-годишна возраст не се држат во озлогласениот затвор.