Премиерот на Унгарија, Виктор Орбан,  ја обвини Украина дека ѝ наштетува на неговата земја во Брисел и ја нарече „непријател“

„Украинците мора да престанат постојано да бараат од Брисел да го прекине дотурот на евтина руска енергија за Унгарија“, изјави Орбан на говор во градот Самботел, западно од земјата.

„Сѐ додека Украина го прави тоа, таа е наш непријател“, додаде тој.

Парламентарните избори во Унгарија се закажани за 12 април.

Ноам Чомски и неговата сопруга Валерија направиле „тешка грешка“ и биле „непромислени“ што не го истражиле доволно добро минатото на Џефри Епстин, наведе Валерија Чомски во опширна изјава. Таа додаде дека покојниот финансиер ги измамил и манипулирал со нив. Односот на 97-годишниот лингвист и филозоф со Епстин е под лупа откако документите на американското Министерство за правда открија нови детали за нивното пријателство.

Кога Епстин во 2019 година се соочи со обвиненија за трговија со луѓе заради сексуална експлоатација, побарал совет од Чомски како да реагира.

„Гледав како грозно се однесуваат со тебе во медиумите и јавноста. Болно е да се каже, но мислам дека најдобро е само да продолжиш да ги игнорираш“, напишал Чомски во пораката потпишана со „Ноам“, која Епстин потоа ја проследил на соработник.

„Она што лешинарите најмногу го посакуваат е јавна реакција – тоа им овозможува простор за отровни напади, од кои многу доаѓаат од обични ловци на публицитет или разни чудовишта“, напишал Чомски.

„Тоа е особено точно сега, со хистеријата околу злоупотребата на жените, која достигна до точка каде што самото преиспитување на обвинението е полошо од убиство.“

Ноам Чомски е еден од неколкуте истакнати личности за кои се откри дека биле во пријателски односи со Епстин и по неговото признавање вина во 2008 година. Некои од пораките на Чомски до Епстин датираат и по 2018 година, кога „Мајами хералд“ објави истражување со детали за тоа како Епстин злоупотребувал малолетни девојчиња и како успеал да добие невообичаено блага спогодба во 2008 година.

Валерија Чомски признала дека ја прочитале таа приказна, но тврди дека не биле свесни за вистинскиот обем на злосторствата на Епстин сè до неговото второ апсење во јули 2019 година.

„Бевме непромислени што не го истраживме неговото минато. Тоа беше тешка грешка и поради таа лоша проценка се извинувам во име на двајцата. Ноам, пред мозочниот удар, ми рече дека се чувствува исто“, изјавила таа. Чомски доживеал тежок мозочен удар во 2023 година.

„Беше длабоко вознемирувачко за двајцата да сфатиме дека сме се дружеле со некој кој се претставувал како услужен пријател, а водел таен живот полн со криминални, нечовечки и изопачени дела.“

Валерија Чомски, втората сопруга на лингвистот со која е во брак од 2014 година, рече дека советот што нејзиниот сопруг му го дал на Епстин во 2019 треба да се гледа „во контекст“.

„Епстин му тврдеше на Ноам дека е неправедно гонет, а Ноам зборуваше од своето искуство со политички контроверзии во медиумите. Епстин ја создаде својата манипулативна верзија на случајот, во која Ноам со добра волја поверува“, напиша таа. „Сега е јасно дека сè било оркестрирано – со барем една намера на Епстин да го искористи Ноам за да го поправи сопствениот углед.“

„Критиката на Ноам никогаш не била насочена кон женското движење; напротив, тој отсекогаш ја поддржувал родовата еднаквост и правата на жените. Епстин ја искористи неговата критика на таканаречената „култура на откажување“ за да се претстави себеси како нејзина жртва“, додала Валерија.

Во други пораки што ги објави Министерството за правда, Епстин разменува вулгарна шега со Чомски, а Чомски „мечтае за карипски остров“. Валерија потврди дека таа и сопругот присуствувале на вечери во куќата на Епстин во Њујорк, престојувале во негови станови во Њујорк и Париз, вечерале на неговиот ранч во Ново Мексико и учествувале на неколку академски собири со него. Таа нагласи дека „никогаш не отишле на неговиот остров, ниту пак знаеле што се случувало таму“.

Двојката го запознала Епстин во 2015 година и, според Валерија, не знаеле за неговата осуда од 2008 за поттикнување на малолетничка на проституција. Таа рече дека Епстин се претставувал како филантроп заинтересиран за науката.

„Претставувајќи се така, Епстин го привлече вниманието на Ноам и почнаа да се допишуваат. Несвесно му ги отворивме вратите на тројанскиот коњ“, рече таа. „Епстин почна да ткае мрежа околу Ноам – праќаше подароци, организираше интересни разговори за теми што го интересираа Ноам. Жал ни е што не сфативме дека тоа беше стратегија за да нѐ фати во замка и да ги поткопа идеалите за кои се бореше Ноам.“

Валерија Чомски објасни и две финансиски трансакции. Епстин еднаш му пратил на Чомски чек од 20.000 долари како поддршка на лингвистички предизвик што го смислил Чомски. Потврди и дека Епстин му помогнал на Чомски да поврати 270.000 долари откако открил „недоследности во своите пензиски фондови што му ја загрозиле економската независност и му предизвикале голема вознемиреност“.

„Епстин понуди помош и ја даде – најверојатно како дел од својата стратегија да добие поголем пристап до Ноам. Сепак, дејствуваше исклучиво како финансиски советник во таа конкретна ситуација. Колку што знам, Епстин никогаш немал пристап до нашите банкарски или инвестициски сметки.“ Таа нагласи дека ниту еден од нив, ниту поединечно ниту како двојка, немал инвестиции преку канцеларијата на Епстин.

Украина не стои зад обидот за атентат врз генерал-полковник Владимир Алексеев, прв заменик-шеф на руската воена разузнавачка служба (ГРУ), изјави заменикот на украинскиот министер за надворешни работи, Андриј Сибиха, за „Ројтерс“.

„Не знаеме што точно се случи со тој генерал, можно е да станува збор за внатрешен конфликт во Русија“, изјави Сибиха.

Изјавата уследи откако руската Федерална служба за безбедност (ФСБ) објави дека Украина стои зад нарачката за обидот за убиство. Според ФСБ, осомничениот напаѓач, кој пукал во генералот во Москва, бил уапсен во Дубаи и идентификуван како Љубомир Корба – руски државјанин роден во украинскиот регион Тернопил. Наводно, тој делувал по налог на украинската служба за безбедност и веќе бил екстрадиран во Москва.

ФСБ тврди и дека идентификувала двајца соучесници – руски државјани. Едниот, Виктор Васин, бил уапсен во Москва, а другата, Зинаида Серебрицкаја, побегнала во Украина.

Истражувачкиот новинар од „Инсајдер“, Христо Грозев, објави дека Васин работел за фирма поврзана со ФСБ, која произведува надзорни алатки. Според него, станува збор за компанијата „НТЦ Атлас“, подружница на државниот воено-индустриски гигант Ростех.

Алексеев, роден во 1961 година во тогашна советска Украина, е прв заменик-шеф на ГРУ од 2011 година. На 6 февруари Кремљ потврди дека бил нападнат со огнено оружје, а ден подоцна државните медиуми објавија дека преживеал операција и е во свест.

САД му воведоа санкции во 2016 година за организирање на сајбер напади за време на претседателските избори во кои победи Доналд Трамп. Бил и одликуван со титулата Херој на Руската Федерација.

Алексеев го обвинуваа и Велика Британија и ЕУ за организирање на нападот со хемиско оружје врз двојниот агент Сергеј Скрипаљ и неговата ќерка во Солсбери, 2018 година.