Свет
Австралиските диви кучиња ги напаѓаат туристите и камперите

Шестгодишно момче е хоспитализирано по напад од динго, диво куче во Австралија. Момчето било на кампување со неговото семејство на островот Фрејзер, на источниот брег на Квинсленд. Семејството било на пливање, по што момчето кога излегло од водата почнало да трча кон песочните дини. Но наишло на четири диви кучиња, од кои едното го гризнало за нога.
Болничарите го нашле момчето со повеќе рани на нозете, по што е пренесено во блиската болница на лекување, каде што е во стабилна состојба.
По нападот, туристите и камперите се предупредуваат да не се приближуваат премногу до дивите кучиња. Министерот за труд, Марк Бејли, рече дека ќе почне истрага за инцидентот.
Динго е заштитен вид во националните паркови на Квинсленд и обично е срамежлив и плашлив со луѓето. Сепак, експертите за животни велат дека постојаниот контакт со кампери и туристи – многумина од нив ги хранат кучињата иако не е дозволено – го смениле однесувањето на овие диви животни, кои станале поагресивни кон посетителите.
Во 2001 година Квинсленд наредил да се изолираат кучињата на островот откако едно деветгодишно момче беше убиено во напад со динго.
Најкрвавиот напад на динго во Австралија се случи во 1980 година, кога се сметало дека двомесечната ќерка на Линди и Мајкл Чембрлен била одвлечена од диво куче од камп во централниот дел на Австралија. Мајката беше обвинета и затворена за убиство на бебето, но подоцна беше прогласена за невина. Во 2012 година судот пресуди дека диво куче динго ја предизвикало смртта на бебето пред повеќе од 30 години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп ја отстрани Романија од програмата за безвизно патување во САД

Администрацијата на американскиот претседател Доналд Трамп објави дека ја отстранува Романија од програмата за безвизно патување во САД.
Претходната администрација на претседателот Џо Бајден на 9 јануари објави дека ја прифаќа Романија во програмата, нагласувајќи дека државата ги исполнила строгите безбедносни барања. Визите за романските граѓани требаше да бидат укинати околу 31 март.
Сепак, на крајот на март, Министерството за внатрешна безбедност објави дека ја замрзнува мерката со цел повторно да се разгледа одлуката за вклучување на Романија во програмата за безвизно патување во согласност со загриженоста на администрацијата на Трамп за безбедноста на земјата. Резултатот од повторната проценка е дека Романија е отстранета од програмата, јавија синоќа американските медиуми.
Регион
Две години од масовното убиство во „Рибникар“: Тешка трагедија која Србија никогаш нема да ја заборави

Поминаа две години од страшното масовно убиство кога 13-годишно момче уби девет деца и училишен чувар во ОУ „Владислав Рибникар“. Убиени беа Мара Анѓелковиќ, Бојана Асовиќ, Ангелина Аќимовиќ, Ана Божовиќ, Адријана Дукиќ, Ема Кобиљски, Катарина Мартиновиќ, Софија Негиќ, Андрија Чикиќ и чуварот Драган Влаховиќ.
Минатата година, во декември, беа осудени Владимир и Миљана Кецмановиќ, а првостепено беа осудени родителите на момчето.
Владимир Кечмановиќ е осуден на 14,5 години затвор, а Миљана Кечмановиќ на три години затвор. Инструктор на стрелиште е осуден на 15 месеци затвор поради лажно сведочење.
3 мај е. Пристигнува вест за пукање во близина на училиштето „Владислав Рибникар“, по што веднаш се појави информација дека е убиен училишниот чувар. Сепак, глетката надвор од училиштето укажува дека се случило нешто многу пострашно.
Пред училиштето имало голем број амбулантни и полициски возила, учениците биле евакуирани, родителите трчале од сите страни кон училиштето за да ги земат своите деца. Учениците зборуваа за тоа дека ученик на „Рибникар“ пукал во училиштето. Според првите информации, во училиштето имало повредени, но не и загинати деца. Имаше вест и дека е ранета учителка. Околу половина час по објавувањето на веста за пукањето, полицијата го извела момчето со лисици и јакна преку главата за да го заштити неговиот идентитет како малолетник. Влегол во автомобилот, кој потоа се оддалечил.
Следните часови се претворија во мачно чекање за родителите. Децата ги изнесоа на вториот влез, класа по класа. Ги чекаа нивните вознемирени родители. Оние кои не ги пречекаа децата, прашуваа по болниците. Паника владеела и кај учениците. Некои виделе школски другари како лежат таму и не знаеле дали се живи.
По сите настани во мај, приказната за „Рибникар“ замолкна поради спроведување на детална истрага. На таткото и мајката на момчето и двајца вработени во стрелиштето денеска им се суди во кривична постапка, додека граѓанска постапка се води против момчето, неговите родители, ОУ „Владислав Рибникар“ и Република Србија.
Во тек е кривична постапка која е затворена за јавноста, како и три активни граѓански постапки, а се очекува да започне четвртата по тужбата на оштетениот наставник по историја.
Регион
На Александар Вучиќ ненадејно му се слошило, па ја прекина посетата на САД

Српскиот претседател е на пат кон Белград откако синоќа му се слошило при посетата на САД и побарал медицинска помош. По медицински преглед, донесена е одлука тој да се врати во Србија, јавија српските медиуми.
Како резултат на тоа, на претседателот на Србија нема да се појави на главните настани за кои дојде во САД меѓу кои и кратка средба со американскиот претседател Доналд Трамп. Вучиќ требаше да има средби и со конгресменката Клаудија Тени, Род Благојевиќ и српски претприемачи од САД. Со него во САД биле и министерот за финансии Синиша Мали и советничката за медиуми Сузана Васиљевиќ, јавија српските медиуми.
За што точно станува збор, кабинетот на претседателот Вучиќ ќе ја информира јавноста во наредните денови.
Најавената посета на Вучиќ на Москва на 9 мај сега е доведена во прашање, иако претходно изјави дека во никој случај нема да се откаже од неа.