Антимигрантската Слободарска партија на Австрија (ФПО) со анимиран видеоклип промовира нова картичка за идентификација за да се спречи злоупотребата на социјалните услуги, но клипот веднаш беше оценет како расистички и полн омраза зашто во него се појавува лик на измамник кој носи фес и се вика Али, пренесува „Спутник“.

Прес-службата на ФПО, парија што управува со земјата заедно со Австриската народна партија (ОВП), објави контроверзно видео за е-картички, предложени лични карти со фотографии што ќе бидат воведени во 2020 година. Клипот е со наслов „Фотографија на е-картичка – крај на социјалната злоупотреба!“

Нејзиниот главен лик Али, кој носи традиционален турски фес, сака да посети стоматолог, но нема осигурување и се обидува да ја искористи личната карта со фотографија на својот братучед Мустафа. Сепак, измамата не му успева. Во видеоснимката, министерката за социјални работи, Беате Хартингер-Клајн, претставник на ФПО, објаснува дека оваа мерка треба да ги спречи оние што мамат и ги искористуваат нашите системи за социјална заштита, а не платиле никакво осигурување“. Видеото завршува со зборовите „Немаш среќа, Али!“

Клипот беше критикуван од опозицијата, активистите за човекови права и од корисниците на социјалните мрежи, кои ја обвинија ФПО за поттикнување омраза и го нарекоа клипот расистички и ксенофобичен. Партијата Петер пилс лист, основана од поранешен пратеник на зелените, сака да почне парламентарна истрага против министерката за социјални работи, која се појавува во видеото, за да дознае дали таа знаела за контекстот во кој биле користени нејзините изјави.

По превирањата, клипот беше избришан од профилите на ФПО на „Фејсбук“ и на „Јутјуб“. Генералниот секретар на партијата, Кристијан Хафенекер, изјави дека не го видел видеото пред да биде поставено на интернет. Тој го посочи немањето комуникација како причина за ситуацијата и рече дека првичната порака можела да биде презентирана поинаку, но кога работат многу луѓе, понекогаш се случуваат грешки.