Ниту САД, ниту Кина нема да ја добијат трговската војна, одговори кинеската амбасада во Вашингтон во понеделникот на заканата на новоизбраниот американски претседател Доналд Трамп дека ќе воведе дополнителни царини од 10 отсто на сите кинески увозни производи кога ќе ја преземе функцијата на 20 јануари.

„Во врска со американските царини за Кина, Кина верува дека кинеско-американската економска и трговска соработка е заемно корисна“, рече портпаролот на кинеската амбасада Лиу Пенгју. „Никој нема да победи во трговска или тарифна војна“, рече Лиу.

Трамп рече дека ќе воведува царини додека Кина не го запре протокот на нелегални дроги, особено фентанил, во Соединетите држави. Тој го обвини Пекинг дека не прави доволно за да го запре протокот на илегална дрога што влегува во САД од Мексико.

„Додека ова не биде прекинато, ќе наплаќаме од Кина дополнителни 10 отсто царини, покрај сите дополнителни царини, за големиот број нивни производи кои доаѓаат во Соединетите држави“, рече Трамп.

Трамп претходно вети дека ќе го прекине трговскиот статус на најповолна нација на Кина и ќе воведе царини за кинескиот увоз од повеќе од 60 отсто, многу повисоки од оние воведени за време на неговиот прв мандат.

Лиу во изјавата рече дека Кина презела чекори за борба против шверцот со дрога по постигнатиот договор меѓу американскиот претседател во заминување Џо Бајден и кинескиот претседател Си Џинпинг минатата година. „Кинеската страна ја информираше американската страна за напредокот постигнат во операциите против наркотиците“, рече Лиу.

„Сето ова докажува дека идејата дека Кина свесно дозволила прекурсори на фентанил да влезат во САД е целосно спротивна на фактите и реалноста“, рече Лиу.

Главниот кинески обвинител во јуни ги повика своите службеници за спроведување на законот да се фокусираат на борбата против шверцот со дрога, додека Пекинг и Вашингтон открија ретка заедничка истрага за дрога.

Набргу по состанокот на заедничката работна група за борба против наркотици во август, Кина објави дека ќе ги заостри контролите на три хемикалии потребни за производство на фентанил.

Покрај Кина, цел на царините се Мексико и Канада, објави Трамп на својата социјална мрежа Truth Social.

„На 20 јануари, во една од моите први извршни налози, ќе ги потпишам сите потребни документи за наплата на Мексико и Канада 25 отсто царина за сите производи што доаѓаат во Соединетите Држави и нивните смешни отворени граници“, објави Трамп.

Претседателот во заминување Џо Бајден и првата дама Џил Бајден ќе присуствуваат на инаугурацијата на новоизбраниот претседател Доналд Трамп во јануари, изјави вчера портпаролот на Белата куќа.

„Претседателот вети дека ќе присуствува на инаугурацијата на кој и да победи на изборите“, рече портпаролот Ендрју Бејтс.

„Тој и првата дама ќе го испочитуваат тоа ветување и ќе присуствуваат на инаугурацијата“, рече Бејтс.

Трамп победи на изборите во САД на 5 ноември, а во Овалната соба ќе се врати на 20 јануари.

Традицијата налага претседателот во заминување и неговата прва дама да се сретнат со новата претседателска двојка утрото на Денот на инаугурацијата и да дојдат заедно во Капитол.

Републиканецот Трамп ја прекрши таа традиција и не присуствуваше на инаугурацијата на демократот Бајден во јануари 2021 година.

Трамп беше првиот претседател по Ендрју Џонсон во 1869 година кој одби да присуствува на заклетвата на неговиот наследник.

Турскиот претседател Реџеп Таип Ердоган ги осуди постапките на израелската влада и ги пофали Палестинките за нивната храброст и издржливост, јавува Анадолија.

„Беснатата влада на Нетанјаху секој ден брутално убива десетици жени, деца, стари луѓе и бебиња, како сериски убијци кои уживаат да убиваат“, рече Ердоган во Анкара за време на говорот на Меѓународниот ден за елиминација на насилството врз жените.

Турскиот претседател, исто така, изрази восхит од храброста на палестинските жени, истакнувајќи ја нивната сила наспроти насилството и варварството. „Соочени со варварството, чесните жени од Палестина дадоа пример за целиот свет и за сите жени со нивниот благороден став кој не се поклонуваше на угнетувачот“, рече Ердоган.

Ердоган ја повтори посветеноста на Турција да ги поддржи палестинските жени, велејќи дека „нема да се двоуми да покаже реакција и да го брани најосновното право на живот, и покрај притисокот од ционистичкото лоби“. Тој додаде дека насилството врз луѓето, особено врз жените, е неприфатлив вандализам.

„Секој што ќе положи рака врз жена или ќе изврши физичко или психичко насилство мора да ја добие заслужената казна, тоа е примарна должност на државата“, заклучи тој.