Свет
Адвокат од САД прогласен за виновен за убиство на сопругата и синот

Поранешниот адвокат на Јужна Каролина, Алекс Мардо (54), е прогласен за виновен за убиство на сопругата и синот и се соочува со најмалку 30 години затвор.
Поротата расправаше помалку од три часа пред да го осуди Мардо за убиството на сопругата Меги (52) и најмладиот син Пол (22) во четвртокот вечерта на крајот од шестнеделното судење, објави Би-би-си.
Според извештаите, Мардок се соочува со 30 години до доживотен затвор, без помилување за секое убиство.
Меги и Пол Мардо беа застрелани во близина на одгледувачницата за кучиња на имотот на семејството на 7 јуни 2021 година.
„Доказите за вина се огромни“, рече судијата на Окружниот суд во Јужна Каролина, Клифтон Њуман.
Мардо некогаш бил влијателен адвокат во Јужна Каролина, а со децении, до 2006 година, членовите на неговото семејство биле водечки обвинители во областа.
За време на судењето, сепак, било откриено дека тој со години крадел од своите приправници и клиенти за да ја задоволи зависноста од лекови против болки и да си обезбеди екстравагантен начин на живеење.
Мардо се изјасни за невин за убиствата, но за време на судењето призна дека лажел за своето алиби и финансиските злосторства, што му наштети на неговиот кредибилитет кај поротата.
Имено, тој го смени сведочењето откога поротата слушна аудиодоказ дека бил на местото на злосторството неколку минути пред да се извршат убиствата.
Судот слушнал и за бизарниот обид на Мардо да ја лажира сопствената смрт за да добие осигурување само три месеци откако ги убил сопругата и синот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нуклеарните инспектори на ОН пристигнаа во Иран за прв пат по израелскиот напад

Нуклеарните инспектори на ОН се вратија во Иран за прв пат откако Иран ја прекина соработката со агенцијата по израелските напади врз нејзините нуклеарни постројки, објавија денес иранските државни медиуми.
Иранскиот министер за надворешни работи, Абас Аракчи, им рече на пратениците дека Техеран сè уште не постигнал договор за тоа како да ја продолжи целосната соработка со нуклеарното надзорно тело на ОН, објави парламентарната новинска агенција ICANA.
Тој рече дека инспекторите ќе ја следат размената на гориво во иранската нуклеарна централа Бушер, според извештајот.
Коментарите на Аракчи дојдоа еден ден откако Иран се сретна со Франција, Велика Британија и Германија за да се обиде да ги оживее разговорите за неговата нуклеарна програма, за која западните сили велат дека е насочена кон развој на бомба, додека Исламската Република вели дека е насочена кон цивилни проекти.
Иранските власти велат дека на земјата ѝ е потребен нов договор за соработка со Меѓународната агенција за атомска енергија (МААЕ) по 12-дневната воздушна војна со Израел во јуни, на која брзо ѝ се придружија и САД. Во јуни, иранскиот парламент донесе закон со кој се суспендира соработката со МААЕ и се бара сите идни инспекции да бараат зелено светло од Врховниот совет за национална безбедност на Техеран.
Советот ја одобри посетата на инспекторите, но „нацрт за нов начин на соработка со МААЕ не е финализиран ниту одобрен“, рече Аракчи, според ICANA. „Полнењето гориво на нуклеарниот реактор Бушер мора да се изврши под надзор на инспектори на меѓународната агенција“, додаде тој.
Шефот на МААЕ, Рафаел Гроси, изјави за Фокс њуз дека „првиот тим инспектори на МААЕ се врати во Иран“, но дека агенцијата сè уште дискутира за тоа како да ги продолжи инспекциите. По нападите во јуни, Иран исто така тврдеше дека објектите повеќе не се безбедни за инспекторите.
фото: принтскрин
Европа
Кремљ: Ги поддржуваме мировните напори на Трамп, но ги отфрламе гаранциите на ЕУ за Украина

Кремљ на денешниот редовен брифинг за медиумите изјави дека ги смета напорите на САД за постигнување мир во Украина за „многу важни“ и дека тие би можеле да помогнат во решавањето на долготрајниот конфликт. Сепак, портпаролот Дмитриј Песков јасно стави до знаење дека Москва има негативен став кон европските предлози за безбедносни гаранции за Украина.
Песков го повтори долгогодишниот став на Русија дека не треба да има распоредени трупи од земјите-членки на НАТО на украинска територија. На прашањето за можни мировни разговори на високо ниво, тој рече дека ваквите состаноци мора внимателно да се подготвуваат за да бидат ефикасни.
По извештаите дека руските напади во текот на ноќта биле насочени кон украинската енергетска инфраструктура, Песков рече дека Русија ги таргетирала само воените и воено поврзаните цели.
Песков, исто така, објави дека се во тек интензивни подготовки за претстојната посета на рускиот претседател Владимир Путин на Кина.
Путин ќе присуствува на самитот на Шангајската организација за соработка, кој ќе се одржи од 31 август до 1 септември во кинескиот пристанишен град Тјенџин. Според Песков, на самитот ќе учествуваат повеќе од 20 светски лидери.
Потоа, Путин ќе го посети Владивосток, голем руски пристанишен град во близина на кинеската и севернокорејската граница, на 5 септември.
фото: принтскрин
Свет
Папата апелира за траен прекин на огнот во Газа и ослободување на заложниците

Папата денес упати силен апел до глобалната заедница да го прекине речиси двегодишниот конфликт меѓу Израел и Хамас повикувајќи на траен прекин на огнот, ослободување на заложниците во Газа и обезбедување хуманитарна помош.
„Уште еднаш упатувам силен апел да се прекине конфликтот во светата земја, кој предизвика толку многу терор, уништување и смрт“, рече папата на својата неделна аудиенција во Ватикан.
„Барам ослободување на сите заложници, постигнување траен прекин на огнот, олеснување безбеден влез на хуманитарна помош и целосно почитување на меѓународното хуманитарно право“, рече тој.
Папата не ги именува Израел или палестинската милитантна група Хамас, но рече дека меѓународното право бара „обврска за заштита на цивилите, забрана за колективно казнување, неселективна употреба на сила и присилно раселување на населението“.
Фото: принтскрин