Свет
Алигатор влечеше безживотно тело на маж низ улиците на Флорида

Огромен алигатор е фатен како носи безживотно тело на маж во Флорида во петокот.
Сведоците прво го забележале алигаторот како ја носи својата жртва во вилиците по улица во Ларго, мала заедница во близина на Клирвотер, Флорида.
„Имаше тело во устата, затоа почнав да снимам“, изјави сведокот Џамаркус Булард.
Булард, кој бил на пат на интервју за работа, веднаш ги известил пожарникарите, кои биле во близина на ужасната сцена.
Службите за итни случаи брзо стигнале до алигаторот и го застрелале неколку пати, додал сведокот, пренесува „Њујорк пост“.
Грозоморните фотографии од местото на настанот покажуваат како полицајци стојат покрај крвавиот алигатор долг неколку метри.
Оваа област е во близина на популарниот парк Риџкрест, кој има и езерце со алигатори.
Познато е дека алигаторите талкаат низ соседството, рече жителот Џенифер Дин, но оној од вчера бил еден од најголемите што некогаш ги сретнала.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп најави царини од 50 проценти за Европската унија

Американскиот претседател Доналд Трамп, најави царини од 50 проценти за Европската унија од 1. јуни.
Во пораката, Трамп напиша дека преговорите со ЕУ не водат никаде, а веднаш по објавата, европските берзи паднаа за 2 отсто.
„Европската Унија, која беше основана првенствено за да ги експлоатира Соединетите Американски Држави во трговијата, е исклучително тешка за соработка. Нејзините силни трговски бариери, ДДВ, апсурдни казни за корпорациите, нетарифни бариери, монетарна манипулација, неправедни и неосновани тужби против американски компании и друго, доведоа до трговски дефицит со Соединетите Американски Држави од повеќе од 250 милијарди долари годишно – бројка што е целосно неприфатлива.“
Нашите преговори со нив не водат никаде! Затоа, препорачувам воведување на рамна царина од 50 отсто за Европската Унија, почнувајќи од 1 јуни 2025 година. За производите што се произведуваат или склопуваат во Соединетите Американски Држави, царината не се применува. Ви благодарам за вниманието“, се вели во пораката на Трамп.
Свет
Големата размена на затвореници меѓу Русија и Украина успешно завршена, Трамп им честита

Претседателот на Соединетите Американски Држави, Доналд Трамп, соопшти дека големата размена на затвореници меѓу Русија и Украина е успешно завршена.
„Штотуку беше завршена голема размена на затвореници меѓу Русија и Украина. Им честитаме на двете страни за оваа преговарачка победа. Ова може да доведе до нешто големо“, порача Трамп на својот профил на социјалната мрежа „Тру соушал“.
Украина претходно ѝ достави на Русија список од 1.000 воени заробеници како дел од подготовките за најавената размена, изјави вчера претставник на украинската воена разузнавачка служба.
Договорот за спроведување на оваа размена беше постигнат претходно овој месец во Истанбул за време на првите директни преговори меѓу Русија и Украина по повеќе од три години.
Регион
Лептоспироза во Сараево? Лекарите примиле десет пациенти со сомнителни симптоми

Инфективната клиника при Клиничкиот центар во Сараево во последните денови лекувала десет пациенти со симптоми што укажуваат на лептоспироза, пренесува „Кликс.ба“ од неофицијални извори.
Првите случаи се регистрирани во сараевската општина Нови Град, каде што граѓаните почнале да се јавуваат кај лекарите со висока температура, силен замор и покачени воспалителни и хепатални параметри. Неофицијално, болеста се проширила во овој дел од градот преку водата.
За да се спречи понатамошното ширење на инфекцијата, во моментот се спроведува пролетна дератизација во општините Нови Град, Центар и Илиџа. Во исто време, интензивирани се контролите врз управителите на згради, пазарите и јавните површини.
Лептоспирозата е заразна болест предизвикана од бактерии од родот Leptospira. Најчесто се пренесува преку контакт со вода, почва или храна контаминирана со урина од заразени животни, особено глодачи. Инфекцијата се јавува кога бактериите влегуваат во телото преку оштетена кожа или мукозни мембрани (очи, нос, уста).
Симптомите вклучуваат висока температура, главоболка, болки во мускулите, замор и повраќање, а во тешки случаи може да се појави оштетување на црниот дроб и бубрезите и воспаление на мозокот (менингитис). Нелекуваната лептоспироза може да има сериозни последици, вклучително и смрт.
Експертите советуваат да се избегнува контакт со потенцијално контаминирани површини, да се користи заштитна опрема во области со висок ризик и редовна контрола на штетници и хигиена.
Здравствените институции ги повикуваат граѓаните да обрнат внимание на можните симптоми и веднаш да се обратат на лекар доколку се сомневаат.