Свет
Американскиот министер за одбрана: Ако Украина падне, тоа значи пад на Европа
Aко Русија победи во Украина, самата Европа ќе се соочи со колапс, изјави американскиот секретар за одбрана, Лојд Остин, во недамнешниот говор на Дипломатската академија во Киев.
„Ако Украина падне под чизмата на Путин, цела Европа ќе пропадне под притисокот на Путин“, рече Остин, кој завчера пристигна во Киев.
„Путин не само што ги крши нормите на меѓународниот систем, кои сојузниците ги изградија по толку голема цена по Втората светска војна. Тој не турка сите кон светска војна, каде што моќта е поважна од правата, каде што империите триумфираат над националниот суверенитет“, додаде тој.
Путин сака да докаже дека неговата автократија може да ја надмине глобалната демократија, рече Остин и додаде: „Путин не само што верува дека неговата волја е посилна. Тој мисли дека неговиот систем е подобар“.
Остин потоа зборуваше за исклучителната цена што ја плаќа украинскиот народ за, како што рече, да постигне праведен мир. „Да, има цена што треба да се плати за човековата слобода“, додаде Остин. „Но, тоа е мала цена во споредба со она што сите ќе го платиме ако дозволиме агресијата да продолжи неконтролирано“, заклучи американскиот министер за одбрана.
За време на работната посета на Киев, Остин најави нова помош за Украина во оружје во вредност од 400 милиони долари. Најавата за нова воена помош за Киев доаѓа во пресрет на американските претседателски избори за две недели, на 5 ноември.
Фокусот на посетата на Остин на Украина, негова четврта и веројатно последна како шеф на Пентагон во администрацијата на Џо Бајден, беше ставен на американските напори за зајакнување на одбранбените капацитети на Киев, кој се соочува со руски напредок на бојното поле во источна Украина.
Но, и покрај солидарноста со Киев, не се очекува промена во политиката на САД во однос на се погласните барања на претседателот Володимир Зеленски да и дозволи на неговата земја да користи оружје кое би било насочено длабоко во руска територија.
„САД разбираат што е тука во прашање“, му рече Остин на Зеленски, најавувајќи нова помош во муниција, оклопни возила и противтенковско оружје.
На претстојните избори во САД, републиканскиот кандидат Доналд Трамп, кој покажа неподготвеност и претпазливост кон континуираната поддршка за Украина, ќе се соочи со демократската кандидатка Камала Харис.
Но, Остин ја отфрла загриженоста дека Трамп може да се откаже од поддршката за Киев. „Овие две и пол години не видов ништо освен двопартиска поддршка за Украина и очекувам дека ќе продолжиме да ја гледаме во Конгресот“, рече Остин.
Остин дојде во Киев по серијата средби што американскиот претседател Џо Бајден ги имаше во Берлин со клучните европски партнери, изјави шефот на кабинетот на украинскиот претседател Серхи Лешченко.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Блинкен до Израел: Сега имате шанса
Американскиот државен секретар, Eнтони Блинкен, го повика Израел да ја искористи можноста што произлегува од успешното уништување на повеќето капацитети на Хамас во Појасот Газа и смртта на водачот на таа исламистичка милиција, Јахја Синвар, со цел да се постигне долгорочно решение на конфликтот во таа енклава.
„Сега е време тие успеси да се претворат во траен стратегиски успех. Остануваат само две работи: да се вратат заложниците дома и да се заврши војната знаејќи што следува“, рече Блинкен.
Тој, исто така, го повика Израел да избегне „голема ескалација“ во одговорот на иранскиот напад со балистички проектили на 1 октомври врз еврејската држава.
Блинкен на пат од Тел Авив кон Саудиска Арабија како дел од турнејата низ регионот.
Тој, исто така, ја повика израелската влада да ја искористи „неверојатната можност“ за нормализирање на односите со Саудиска Арабија, процес кој беше прекинат со нападот на Хамас на 7 октомври и војната што следеше.
„Тоа е, и покрај сè што се случува, неверојатна можност во тој регион да се движи во сосема поинаква насока што нуди трајно решение за безбедноста на Израел и неговото место во регионот.
Регион
Сергеј Трифуновиќ ја пријавил сопругата за семејно насилство
Сергеј Трифуновиќ ја пријавил сопругата за семејно насилство, јавуваат српските медиуми.
Актерот повикал полиција и рекол дека трпи насилство од сопругата Исидор. Расправијата се случила околу 22 часот во стан во Вождовац, пишува Телеграф. Не многу пред тоа, тој беше виден, со своето куче Мило, на промоцијата на албумот Сајси MC. Но, обвинителот утврдил дека нема елементи на кривичното дело семејно насилство.
Трифуновиќ и неговата сопруга се скарале, а кога тој рекол дека ќе ја остави, таа наводно почнала да му се заканува. Ниту еден од сопружниците не е повреден.
View this post on Instagram
Парот официјално стапи во брак на 16 октомври.
„Би можел да се оженам за тебе секој месец“, напиша тој во описот на една од најавите за свадбата.
Исидора Мијановиќ и Сергеј Трифуновиќ во мај годинава направија црковна венчавка, а пет месеци подоцна, на 16 октомври, во Белград склопија граѓански брак.
Исидора е 23 години помлада од актерот и се чини дека таа беше единствената која успеа да му го освои срцето доволно за да му ја „украде слободата“, иако години наназад важеше за вечниот ерген на српската јавна сцена. Таа го зеде презимето на сопругот и стана госпоѓа Исидора Трифуновиќ, а последниве месеци не кријат колку се заљубени на социјалните мрежи.
Свет
Претседателските избори во Белорусија закажани за 26 јануари 2025 година
Претседателските избори во Белорусија се закажани за 26 јануари 2025 година, пренесува белоруската државна агенција „Белта“.
Оваа одлука е донесена на седница на Претставничкиот дом, се наведува во извештајот.
На последните избори во Белорусија на 9 август 2020 година, актуелниот претседател, Александар Лукашенко, доби 80,1 отсто од гласовите.
Неговата главна противкандидатка Светлана Тихановска освои 10,12 отсто, по што ја напушти Белорусија.