Свет
Американските лекари предупредуваат: Четворица починати на Флорида од бактерија што „јаде месо“

Редок тип на бактерија, која предизвикува некроза на ткивото (позната како бактерија што јаде месо) усмртила најмалку четири лица на Флорида оваа година, соопштија здравствените власти на оваа американска сојузна држава.
Во изминатите неколку месеци се пријавени најмалку 11 случаи на инфекција со бактеријата Vibrio vulnificus во округите Беј, Брауард, Хилсборо и Сент Џонс – области во централна Флорида, популарни кај туристите и крајбрежните заедници.
„Во разни води живеат многу видови бактерии“, изјави инфектологот Даниел Иган од болницата „Орландо хелт“. Vibrio vulnificus е бактерија што сака солена вода. Властите засега не откриваат повеќе информации за починатите.
Иако ретка, инфекцијата со оваа бактерија може да биде многу сериозна. Центарот за контрола и превенција на болестите (CDC) годишно бележи помеѓу 150 и 200 пријави. Бактеријата може да предизвика некротизирачки фасцитис – сериозна инфекција, при што ткивото околу отворена рана бргу умира. Многу пациенти завршуваат на интензивна нега, а во некои случаи е потребна и ампутација.
Стапката на смртност изнесува приближно 20 отсто, а доколку бактеријата навлезе во крвотокот, може да достигне и до 50 проценти. Во многу случаи смртта настапува во рок од два дена по појавата на првите симптоми. Бактеријата се развива во топли, солени и мешани (солено-сладководни) води.
Лекарите предупредуваат дека со глобалното зголемување на температурите бактеријата може да се прошири и на области во кои претходно не постоела. Најактивна е од мај до октомври кога температурите на морето се највисоки.
Симптомите вклучуваат повраќање, дијареја, висока температура, треска, забрзано чукање на срцето и дезориентација. Кај здрави лица инфекцијата може да помине без сериозни последици, но многу поранливи се лицата со хронични заболувања или ослабен имунитет, вклучувајќи и болни од рак.
Во 2024 година CDC регистрирал 82 инфекции и 19 смртни случаи – речиси двојно повеќе од претходната година. Порастот се поврзува со невообичаено големиот број доцносезонски урагани на Флорида и на југоистокот на САД.
Бројот на случаи нагло се зголемил по ураганите Милтон и Хелена кога водите од поплавата потиснале топла солена вода кон копнените населени места, што довело до поголема изложеност на луѓето на бактеријата. Научниците предупредуваат дека климатските промени дополнително ќе го зголемат бројот на вакви инфекции. Потоплите океани создаваат посилни бури и подолги урагански сезони – идеални услови за ширење на Vibrio vulnificus.
Министерството за земјоделство на САД проценува дека годишните трошоци за лекување инфекции од вакви бактерии ќе достигнат 6,1 милијарди долари до 2090 година во споредба со 2,6 милијарди долари во 1995 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Фон дер Лајен: Путин мора да седне на преговарачка маса, Европа ќе ја одигра својата улога

Претседателката на Европската комисија, Урсула фон дер Лајен, денес разговараше телефонски со украинскиот претседател Володимир Зеленски и американскиот претседател Доналд Трамп по веста за комбинираниот руски напад синоќа, во кој беше погодена и Делегацијата на ЕУ во Украина, меѓу другите цивилни цели.
„Тукушто разговарав со украинскиот претседател Володимир Зеленски, а потоа и со американскиот претседател Доналд Трамп по масовниот напад врз Киев, кој ја погоди и нашата канцеларија во ЕУ“, напиша фон дер Лајен на платформата X.
Таа рече дека рускиот претседател Владимир Путин мора да започне преговори со Киев.
„Путин мора да седне на преговарачка маса. Треба да обезбедиме праведен и траен мир за Украина со цврсти и веродостојни безбедносни гаранции“, истакна претседателката на Европската комисија.
Таа додаде дека Европа „целосно ќе ја одигра својата улога“.
„Нашиот одбранбен инструмент SAFE, на пример, ќе биде важен за зајакнување на храбрите украински вооружени сили“, истакна фон дер Лајен.
Таа претходно објави дека руските напади врз Киев, во кои загинаа 18 лица во текот на ноќта, меѓу кои и четири деца, „само ќе го зајакнат единството на Европа и пркосот на Украина“.
Фото: принтскрин
Свет
Заложничка преживеала 471 ден во тунелите на Хамас: „Ги молев да не ме убиваат“

Додека Израелците протестираат низ целата земја и вршат притисок врз владата да гарантира ослободување на преостанатите заложници од Газа, поранешната заложничка Дорон Штајнбрехер (32) се присети на своите 471 дена во заложништво. Во интервју за Ројтерс, таа изрази надеж дека сите преостанати заложници наскоро ќе бидат ослободени.
„Ги молев да не ме убиваат“, рече таа во интервјуто додека семејствата на заложниците се собираа и повикуваа на прекин на речиси двегодишната војна. Денес, вели, може само да се моли за ослободување на преостанатите 50 заложници, од кои, според израелските проценки, околу дваесет се уште живи. Надежта опстојува и покрај бројните неуспешни обиди на медијаторите да обезбедат прекин на огнот меѓу Израел и Хамас.
Нејзините пријатели, браќата близнаци Гали и Зив Берман, сè уште се во рацете на палестинската милитантна група што го нападна Израел на 7 октомври 2023 година. Во тој напад, најсмртоносниот ден за Евреите од Холокаустот, 1.200 луѓе беа убиени, а 251 лице беше однесено во Газа, според израелските бројки.
Последователната израелска воена кампања во Газа одзеде повеќе од 62.000 палестински животи, според здравствените власти во Газа, а гладот се прошири низ регионот.
„Сега е важно да се вратат сите заложници дома. Секој момент, секоја секунда тие се во опасност затоа што нема храна, нема вода, а санитарната состојба е многу лоша“, нагласи таа. „Знам што мислат и чувствуваат сега. Страв за своите животи секој момент. Секој ден одите на спиење и не знаете дали ќе се разбудите.“
Штајнбрехер била држена во подземни тунели каде што, како што вели, развила силна врска со другите млади жени кои биле со неа. „Нема светлина во тунелите, нема свеж воздух. Не знаете дали е ден или ноќ“, рекла таа. Во еден тунел, едвај можела да стои, рекла таа.
Милитантите на Хамас ѝ рекле дека ќе биде веднаш погубена ако ја слушнат израелската армија како се приближува. Таа рекла дека била под интензивен психолошки притисок, ѝ било забрането да покажува емоции и ретко ѝ било дозволено да се мие. Морала да моли за храна секој ден, рекла таа.
Израелскиот премиер Бенјамин Нетанјаху вети дека ќе го уништи Хамас. И покрај протестите дома и меѓународната осуда, Израел се подготвува да започне нова офанзива во градот Газа, кој таа го опишува како последно упориште на милитантите.
Додека притисокот врз Нетанјаху расте да склучи договор со кој ќе се ослободат преостанатите заложници, министрите од крајната десница, кои се клучни за неговиот политички опстанок, се заканија дека ќе ја соборат неговата влада ако заврши војната.
Фото: принтскрин
Свет
Кулеба: Мирот во Украина не е реален, не обрнувајте внимание на Вашингтон

Поранешниот министер за надворешни работи на Украина, Дмитро Кулеба, во интервју за германскиот „Шпигел“ изјави дека очекувањата за непосреден крај на вооружениот конфликт меѓу Москва и Киев се нереални. Како што нагласи, сите формално се залагаат за мир, но во исто време признаваат дека условите за неговото доаѓање не се исполнети.
Кулеба истакна дека во последните осум месеци Вашингтон постојано испраќа порака дека „мирот се приближува, дека Русија прави отстапки и дека се постигнува напредок“. Сепак, според неговите зборови, во реалноста ситуацијата останува непроменета. „Мојот совет е да се обрне помалку внимание на вестите од Вашингтон, а повеќе на реалните знаци дека нешто се менува“, рече тој.
Поранешниот шеф на украинската дипломатија изјави дека е потребно да се следи текот на борбите на терен, но и евентуалниот развој на иницијативи поврзани со средбата меѓу рускиот претседател Владимир Путин, украинскиот лидер Владимир Зеленски и американскиот претседател Доналд Трамп. Сè друго, додаде тој, претставува „информативен шум“.
Според извештајот на Ројтерс од 21 август, Москва бара Украина целосно да се откаже од Донбас како предуслов за постигнување договор. Доколку Киев не го прифати ова, руската специјална операција ќе продолжи. Можноста за постигнување договор би можела да се формализира како трилатерален договор со учество на САД или како оживување на Истанбулскиот формат од 2022 година.
Од друга страна, Украина бара од Западот конкретни безбедносни гаранции за да се стави крај на конфликтот. Една од опциите е распоредување на европски сили под водство на САД во Украина, на што Москва остро се спротивставува, особено кога станува збор за евентуалното присуство на трупи на НАТО на нејзините граници.
Фото: принтскрин