Свет
Американски новинар: Украина и Русија водат мировни преговори во тајност

Русија и Украина тајно водат мировни преговори преку високи воени лидери, изјави американскиот новинар и добитник на Пулицеровата награда, Сајмон Херш.
Како што наведе тој, дијалогот добива на интензитет и покрај приговорите на украинскиот претседател Володимир Зеленски и Белата куќа.
Во написот објавен на платформата Сабстек, тој напиша дека прашањето за можното определување на нови граници долж сегашните линии на фронтот меѓу Украина и Русија може да се реши за Русија да го задржи Крим и териториите на самопрогласената Луганска Народна Република и Доњецк, како и областа Херсон и Запорожје, додека за возврат Украина би станала членка на НАТО, со голем број одредени ограничувања.
„Сериозните мировни преговори меѓу Русија и Украина одеднаш се забрзаа, но нивната главна движечка сила не е ниту Вашингтон, ниту Москва, ниту Бајден, ниту Путин, туку двајца високи генерали – началникот на рускиот Генералштаб Валериј Герасимов и Началникот на вооружените сили на Украина Валери Залужни“, вели тој.
Херш тврди дека во замена за територијата се разгледува опцијата Русија наводно да не се противи на евентуалниот влез на Украина во НАТО, но со јасен услов Алијансата таму да не ги стационира своите војници и офанзивно оружје.
Тој додава дека Белата куќа е целосно против предложениот договор. Како друга можна пречка, американскиот новинар го наведува инсистирањето на украинскиот претседател Зеленски, Украина да излезе победничка од војната.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Поради гладување 90.000 жени и деца итно имаат потреба од медицинска интервенција во Газа

Секој трет жител на Појасот Газа со денови не добива храна, предупреди Светската програма за храна (WFP) на Обединетите нации. Во последното соопштение се наведува дека 90.000 жени и деца итно имаат потреба од медицинска интервенција поради тешка неухранетост.
Според Министерството за здравство во Газа, само вчера починале уште девет лица од глад, со што бројот на жртви од неухранетост од почетокот на конфликтот достигна 122.
Израел, кој го контролира влезот на сите залихи во Газа, повторува дека не постои блокада и ја обвинува Хамас за лошата распределба на ресурсите.
Меѓународната заедница, вклучувајќи ги Германија, Франција и Велика Британија, побара итно олеснување на влезот на помошта, а генералниот секретар на ОН Антонио Гутереш остро ја осуди „рамнодушноста и недостигот на човечност“ во глобалниот одговор на кризата.
Регион
Големи пожари беснеат на најмалку пет различни локација во Грција

Во источниот дел на областа Атика, поширокиот регоион на Атина, во северна Грција, на островите Евија и Китира, како и во јужниот дел на Пелопонез, попладнево се активни големи пожари, а од бројот 112 за итни случаи беа испратени низа пораки до жителите на зафатените области.
Во пожарот во централна Евија, изгореа две противпожарни возило, а четворица пожарникари со полесни повреди на рацете и очите и со респираторни проблеми биле префрлени во болница.
Во сите пожари, беа превентивно евакуирани жителите на населените места во непосредна близина на огнената стихија, откако од бројот 112 за итни случаи беа испратени соодветни пораки.
За Атика, Евија и за дел од Пелопонез за денеска имаше предупредување за екстремно голема опасност од пожари, категорија пет, што воедно е и највисоката категорија во прогнозите за опасност од пожари на Министерството за цивилна заштита и климатски кризи на Грција.
Свет
Најмалку 25 лица загинаа во текот на ноќта во нови напади на израелската армија врз Појасот Газа

Најмалку 25 лица загинаа во текот на ноќта во нови напади на израелската армија врз Појасот Газа, во време кога мировните преговори се во застој.
Според здравствени извори, голем дел од жртвите се убиени додека чекале хуманитарна помош во близина на граничниот премин Зиким со Израел. Меѓу загинатите има и четири лица од иста семејна зграда во градот Газа.
Организацијата на Обединетите нации предупреди на ризик од масовна глад во енклавата, и покрај тврдењата на Израел дека не ги блокира доставите на помош. Според ОН, големиот дел од помошта не може да стигне до населението поради воени блокади и грабежи.
Преговорите за прекин на огнот меѓу Израел и Хамас се прекинати, откако американските и израелските преговарачи се повлекоа од Катар. Израелскиот премиер Бенјамин Нетанјаху најави дека се разгледуваат „алтернативни опции“, додека Хамас смета дека повлекувањето било тактика на притисок.