Свет
Американците забрзано се подготвуваат за огромни бранови, силни ветрови и поплави

Додека силниот ураган Флоренс се приближува кон источниот брег на САД, во делови од три сојузни држави е наредена евакуација на населението, а милиони Американци се подготвуваат за можеби еден од најопасните урагани во регионот во последниве децении.
Безбедноста на американскиот народ е наш апсолутен приоритет, изјави вчера претседателот на САД, Доналд Трамп. Тој истакна дека федералната влада е подготвена да реагира, објави агенцијата АП. Трамп прогласи вонредни состојби во Северна и Јужна Каролина и во Вирџинија, а откажа и некои настани. Во меѓувреме телевизискиот канал Си-ен-ен наведе четири причини зошто Флоренс се смета за крајно опасна временска непогода.
Првата е дека овој ураган постигнува неверојатна сила, а се предвидува дека Флоренс може да стане уште посилен како што се приближува кон Северна и Јужна Каролина.
Како втора причина телевизијата ги наведува т.н смртоносни водни ѕидови, односно големите бранови што настануваат поради моќните удари на ветрот, а кои може да нанесат огромни материјални штети.
Исто така, Си-ен-ен предупредува дека налетот на ураганот може да предизвика големи поплави во градовите во внатрешноста. Ова посебно се однесува на Северна и Јужна Каролина бидејќи поради претходните обилни дождови, земјата е заситена и не може да апсорбира премногу вода.
Последниот проблем што го наведува Си-ен-ен во врска со ураганот Флоренс е дека тој ќе удри во области во кои луѓето претходно не биле соочени со временски непогоди од овие размери и немаат многу искуство како да се справат со нив. Според предвидувањата, Флоренс ќе зафати и северни делови од источниот брег кои досега не биле погодени од ураган од четврта категорија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Џими Кимел се враќа на екранот

Американскиот водител Џими Кимел утре се враќа на екранот со својот популарен ноќен шоу-програм, откако продукцијата беше привремено стопирана поради неговите контроверзни коментари за убиството на Чарли Кирк, соопшти Дизни.
„Емисјата ја суспендиравме за да избегнеме дополнителни тензии во чувствителен момент за земјата“, порачаа од компанијата, додавајќи дека по разговори со Кимел, одлучиле да продолжат со снимањето.
Кимел, познат по својата критика кон Доналд Трамп, на 14 септември коментираше дека осомничениот напаѓач, Тајлер Робинсон, бил поддржувач на поранешниот претседател. Тој ја исмеа и реакцијата на Трамп по убиството на Кирк, прикажувајќи изјава во која претседателот зборува за реновирање на Белата куќа.
„Ова не е начин на кој возрасен човек тагува по убиство на пријател. Вака четиригодишно дете тагува за златна рипка“, саркастично додаде Кимел.
Емисјата на Кимел се емитува на „Еј-би-си“, телевизија во сопственост на Дизни.
Свет
Франција ја призна Палестина

Францускиот претседател Емануел Макрон вечерва на Генералното собрание на ОН потврди дека Франција ја признава Палестина како независна држава.
Со ова, Франција се приклучува на земји како Обединетото Кралство, Канада и Австралија, кои го направија истиот чекор во последните недели.
„Светот е на чекор до губење на шансата за мир. Време е да се стави крај на војната во Газа“, порача Макрон, додавајќи дека решението со две држави е единствен пат.
Израел остро реагираше, оценувајќи дека признавањето е награда за тероризмот и повтори дека палестинска држава нема да се случи.
Палестинските власти го поздравија чекорот и го оценија како неповратен пат кон дводржавно решение.
Со Франција, вкупно 153 земји-членки на ОН – речиси 80 отсто ја имаат признато Палестина.
Во меѓувреме, Израелската офанзива продолжува. Според здравствени власти во Газа, во последните 24 часа загинале 61 лице, со што вкупната бројка од 7 октомври 2023 достигнува 65.344 загинати.
Свет
Голем напад со беспилотни летала врз Москва, небото е затворено

Москва вечерва беше нападната со беспилотни летала.
Градоначалникот на Москва, Сергеј Собјанин, објави дека противвоздушните сили собориле вкупно девет дронови , а подоцна уште два. Жителите на Московскиот регион слушнале експлозии на пристапот кон градот, а според првите информации што ги објавија руските медиуми, нема повредени или голема материјална штета.
Многу откажани и одложени летови
Повеќе од 35 летови беа откажани и одложени на московските аеродроми Шереметјево, Домодедово и Внуково во вечерните часови поради украински напади со беспилотни летала. Работата на аеродромот Шереметјево беше привремено суспендирана.
„До 20:19 часот по московско време, 21 лет беше одложен, а уште еден откажан во Шереметјево. Девет одложувања и две откажувања беа регистрирани во Домодедово, а четири летови беа одложени во Внуково“, објавуваат руските медиуми.
Руските медиуми наведуваат дека по нападот, тајната служба на ФСБ и Истражниот комитет ќе спроведат истрага и дека се очекува кривична постапка за тероризам. Оперативните служби на терен ги проверуваат остатоците од беспилотните летала и проверуваат дали предизвикале дополнителна штета.