Свет
Антимигранската АФД ќе отвора еврејски разгранок во партијата
Антимигрантската Aлтернатива за Германија (АФД) рутински ја обвинуваат дека има антисемитски ставови, но нејзините еврејски поддржувачи кренаа многу врева деновиве со формирањето разгранок базиран на верата во рамките на партијата што на некои Евреи не им се доаѓа. Еврејскиот разгранок во рамките на АФД планира да го одржи својот прв состанок во германскиот град Офенбах на 7 октомври, објави „Франкфуртер алгемајне цајтунг“, цитирајќи го писмото упатено до весникот.
Еврејскиот разгранок ќе биде додаток на веќе постојниот христијански разгранок од АФД, чиј лидер тврди дека и покрај таквата репутација, партијата не е антисемитска.
„Тоа воопшто не важи за она што сме. АФД не е антисемитска партија, ние не толерираме антисемитизам во партијата. Ако такво нешто се појави, тогаш тие луѓе ќе бидат исфрлени од партијата“, рече Јоаким Кус во изјава за „Дојче веле“.
Сепак, оваа вест се чини дека е редок пример во кој АФД и Евреите не се појавуваат како две спротивставени страни во медиумите, кои често ја обвиниуваат партијата дека има неонацистички врски, прикриени антисемитски гледишта и ги минимизира ужасите на холокаустот. Во јуни, колидерот на АФД, Александар Галанд, ја нарече нацистичката ера куп птичји измет во повеќе од 1.000 години успешната германска историја. Минатиот месец еден локален лидер на АФД беше жестокот критикуван кога го нарече кукавица и предавник човекот што се обидел да го убие Адолф Хитлер.
Димитри Шулц, основач на планираниот еврејски разгранок, се согласува со Кус велејќи дека АФД е единствената партија во Германија која антисемитизмот го прави тема од страна на муслиманите, без да ја тривијализира.
Меѓутоа, не сите се убедени во тоа, меѓу кои и многу Евреи во Германија што не може да си замислат некој од нивната вера да се здружи со АФД. Меѓу нив се и членовите на Еврејската унија на студентите на Германија, кои ја сметаат АФД за една од најголемите закани за еврејскиот живот во Германија.
„АФД не добива кошер-сертификат од нас“, изјави лидерот на групата, Далија Гринфелд, која рече дека нејзината група ги повикува сите Евреи во Германија да се приклучат на протестот во Офенбах, да се соберат против создавањето еврејски разгранок во партијата.
Потегот на АФД доаѓа во услови на пораст на антисемитските злосторства во Германија. Полициските податоци покажуваат дека таквите напади се зголемиле 10,7 отсто во првата половина од 2018 година во споредба со истиот период лани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Ушаков: Франција и Велика Британија сакаат да ѝ обезбедат на Украина нуклеарно оружје
Помошникот на претседателот на Русија, Јуриј Ушаков, денеска изјави дека Русија е запознаена со плановите на Франција и Велика Британија да ѝ обезбедат на Украина нуклеарно оружје или технологија за производство на такво оружје.
„Американците, секако, ќе бидат информирани за сè, но тие веќе знаат. Во моментов ова се коментира на сите канали. Ние ќе им го кажеме тоа конкретно“, изјави Ушаков за телевизискиот канал „Росија 1“ и додаде дека плановите на Франција и Велика Британија да ѝ обезбедат на Украина нуклеарно оружје или технологија за негово производство ќе влијаат врз ставот на Русија за решавањето на украинскиот конфликт, пренесуваат „Интерфакс“ и „Танјуг“.
Претходно денеска, заменик-претседателот на Советот за безбедност на Руската Федерација, Дмитриј Медведев, на својот профил на „Икс“ објави дека употребата на руско нуклеарно оружје против цели во Украина, како и нуклеарни удари врз Велика Британија и Франција, би биле легални и оправдани доколку Лондон и Париз му предадат нуклеарна технологија на Киев.
Свет
Ројтерс: Иран блиску до договор со Кина за ракети кои наводно се способни да потопат носач на авиони
Иран е блиску до склучување договор со Кина за набавка на противбродски крстосувачки ракети CM-302, во момент кога САД распоредуваат значителни поморски сили во близина на иранскиот брег, објави „Ројтерс“, повикувајќи се на шест извори запознаени со преговорите.
Според извештајот, договорот е речиси финализиран, но датумот на испорака сè уште не е утврден. Станува збор за супeрсонични ракети со дострел од околу 290 километри, дизајнирани да избегнуваат бродска одбрана со лет на мала висина и голема брзина.
Експерти за вооружување оценуваат дека нивното воведување би ги засилило иранските напаѓачки способности и би претставувало сериозна закана за американските поморски сили во регионот. Поранешен израелски разузнавач изјавил дека таквата способност „целосно би ги променила правилата на игра“.
Преговорите со Кина започнале пред две години, но се забрзале по минатогодишниот конфликт меѓу Израел и Иран, наведуваат изворите. Во меѓувреме, САД распоредуваат носачи на авиони, вклучително и USS Abraham Lincoln и USS Gerald R. Ford, во близина на Иран.
Кинеското Министерство за надворешни работи соопштило дека не е запознаено со преговорите за продажба на ракети, додека Белата куќа не дала директен коментар. Американскиот претседател, Доналд Трамп, му дал рок на Иран за договор околу нуклеарната програма, во спротивно се заканил со „драстични мерки“.
Свет
Обилни дождови во Бразил: Најмалку 14 загинати, 440 раселени
Најмалку 14 лица загинале, а 440 се раселени откако обилни дождови го погодиле југоисточниот бразилски град Жуис де Фора, соопштија локалните власти.
Дождовите предизвикале поплави и свлечишта, а наставата во општинските училишта е прекината. Властите мобилизирале специјализирани тимови за помош и потрага по исчезнати лица. Градот, кој се наоѓа во сојузната држава Минас Жераис, прогласил состојба на катастрофа.
Локалните власти наведуваат дека ова е најврнежливиот февруари во историјата на градот, со двојно повеќе врнежи од очекуваното. Националниот институт за метеорологија издал предупредувања за обилни дождови во делови од 14 сојузни држави, вклучително и Рио де Женеиро.

