Свет
Африка сака крај на војната во Украина: лидерите од Египет и Јужна Африка повикаа на прекин на огнот

Лидерите на неколку африкански земји повикуваат на прекин на огнот во Украина и имаат намера да ги посетат Москва и Киев кон средината на месецот, соопшти кабинетот на претседателот на Јужноафриканската Република.
Во соопштението се наведува дека по вчерашните виртуелни разговори, претседателите на Египет, Замбија, Коморските Острови, Сенегал, Уганда и на Јужноафриканската Република се договориле да се вклучат во разговори со претседателите на Русија и Украина, Владимир Путин и Володимир Зеленски, за прекин на огнот и траен мир во регионот.
„Министрите за надворешни работи на споменатите земји добија задача да ги финализираат елементите на планот за мир. Претседателите потврдија дека може да отпатуваат во Украина и Русија во средината на јуни“, се наведува во соопштението.
За време на средбата страните истакнаа дека Африка е многу заинтересирана за ставање крај на конфликтот во Украина и е подготвена да дејствува како посредник во тоа.
Африка сака да стави крај на војната со оглед на негативните последици за африканските земји и остатокот од светот во голем број клучни сектори, како што се храната, енергетската безбедност и меѓународното финансирање, пренесе ТАСС.
Претседателот на Јужноафриканската Република, Кирил Рамафоса, на 16 мај објави дека Русија и Украина се согласиле за посета на африканска делегација, со цел да се бара мирно решение на конфликтите. Рамафоса зборуваше во име на Јужна Африка, Египет, Конго, Сенегал, Уганда и Замбија.
Во тек се консултации за временската рамка на посетата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Повеќе од 40 повредени во масовниот руски напад врз Киев, меѓу оние кои починаа има и дете

Украина соопшти дека најмалку четири лица се убиени, а 13 други се ранети во главниот град Киев за време на голем руски напад врз земјата во текот на ноќта.
„Според ажурираните податоци, досега 13 лица се повредени (вклучувајќи едно дете) и четворица починаа (вклучувајќи едно дете) како резултат на нападот врз Киев“, изјави Тимур Ткаченко, началник на Воената администрација на градот Киев, на Телеграм.
Ткаченко додаде дека е предизвикана штета на неколку станбени и нестанбени згради во областите Дарницки, Свјатошински, Соломијански, Холосиевски и Днепровски, вклучувајќи го и кардиолошкиот институт. Гувернерот на регионот Киев, Микола Калашник, изјави дека најмалку 28 лица, меѓу кои и три деца, се повредени во регионот околу главниот град.
„Четири лица се хоспитализирани во регионалните болници, тројца возрасни и едно дете. Сите се хоспитализирани во умерено сериозна состојба“, додаде Калашник.
Украинските воздухопловни сили тврдат дека воздушната одбрана соборила 568 од 595 дронови, како и 43 од 48 различни видови ракети лансирани од Русија преку ноќ, а главна цел бил Киев.
Свет
Земјотрес со јачина од 5,4 степени ја погоди западна Турција

Земјотрес со јачина од 5,4 степени ја погоди денеска западна Турција, соопшти Европско-медитеранскиот сеизмолошки центар (ЕМСЦ).
Земјотресот се случил во 12:59 часот по локално време и бил на длабочина од девет километри, според податоците објавени на веб-страницата на ЕМСЦ.
Според податоците од Турската дирекција за управување со катастрофи и вонредни состојби (АФАД), епицентарот на земјотресот бил во областа на градот Симав во округот Ќутахија.
Земјотресот, кој бил почувствуван и во соседните области, бил на длабочина од 8,4 километри, соопшти AФАД.
Свет
Цистерни со нафта излетаа од шини на железничката пруга Ваљево – Косјериќ

Две цистерни полни со нафта синоќа излетаа од шините на железничката пруга Ваљево – Косјериќ, во близина на местото Ражана, пренесуваат локалните медиуми.
Според информациите, цистерните биле при крајот на товарниот воз што се движел кон Косјериќ. Засега не е познато што ја предизвикало несреќата, ниту дали имало истекување нафта од композицијата.
Локалните портали јавуваат дека екипи се на терен и се очекува официјално соопштение од надлежните органи за причините и можните последици од инцидентот.