Свет
Бајден гради ѕид кон Мексико, се огласи Трамп: Дали сега ќе ми се извини

Администрацијата на американскиот претседател Џо Бајден ќе изгради дел од ѕидот во Јужен Тексас на границата со Мексико за да се обиде да ја спречи илегалната миграција која е во пораст. Околу 32 километри од ѕидот ќе биде изграден во округот Стар долж границата, каде локалните власти пријавија голем број илегални преминувања.
Изградбата на граничен ѕид беше препознатлива политика на Доналд Трамп, а демократите жестоко се противеа на тоа. Во предизборната кампања во 2020 година, Бајден вети дека, доколку биде избран, ќе ја запре изградбата на ѕидот.
Неговата администрација издаде проглас набрзо по преземањето на функцијата во која се вели дека изградбата на ѕид преку јужната граница „не е сериозно политичко решение“. Но денеска изјави дека „не може да ја запре“ изградбата на граничниот ѕид бидејќи средствата за него се веќе издвоени. На прашањето дали верува дека ѕидот може да работи, тој едноставно одговори: „не“.
Во изјава за Асошиејтед њуз вчера вечерта, царината и граничната заштита на САД на сличен начин го бранеа последниот потег, велејќи дека ги користи средствата веќе доделени за граничната бариера. „Конгресот присвои средства за фискалната 2019 година за да изгради гранична бариера во долината Рио Гранде, а од Канцеларијата за домашна безбедност се бара да ги искористи тие средства за нивната намена“, се вели во соопштението.
Говорејќи на прес-конференција, мексиканскиот претседател Андрес Мануел Лопез Обрадор ја критикуваше веста, велејќи дека ѕидот е „спротивен“ од она што претходно го заговараше претседателот Бајден. „Разбирам дека има силен притисок од екстремно десничарските политички групи во САД“, додаде тој.
Според американскиот предлог за царина и гранична заштита, бариерите ќе се состојат од големи столбови вградени во бетонска основа, како и порти, камери и опрема за видео надзор. Ќе се користат средства обезбедени за време на претседателствувањето на Доналд Трамп за изградба на новиот дел.
Ова е првпат администрацијата на Бајден да ги искористи своите овластувања за да одобри изградба на нови ѕидови, што често се правеше за време на мандатот на Трамп, кога беа изградени околу 50 милји нов ѕид и надградени 400 милји постоечки бариери.
Во објава на интернет, Трамп праша дали Бајден ќе му се извини нему „и на Америка што му требаше толку долго за да продолжи“.
„Ќе го чекам неговото извинување“, напиша тој.
Бајден се соочува со зголемени критики за неговата имиграциска политика по неодамнешниот пораст на мигранти кои преминуваат во САД.
Граничната патрола на САД уапсила 181.059 луѓе долж јужната граница во август, споредено со 132.648 во јули, според најновите податоци. Мексиканскиот претседател Андрес Мануел Лопез Обрадор рече дека само минатата недела 10.000 луѓе доаѓаат на границата секој ден.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Германија ќе го преполови бројот на работни визи за Западен Балкан, меѓу кои и Македонија

Германија ќе го преполови бројот на имигранти од Западен Балкан, според коалицискиот договор на новата демохристијанско-социјалдемократска влада.
„Редовната миграција во Германија во рамки на таканареченото Правило за Западен Балкан ќе биде ограничена на 25.000 луѓе годишно“, се вели во коалицискиот договор што Унијата ЦДУ/ЦСУ и Социјалдемократската партија на Германија (СПД) го претставија денеска во Берлин.
Правилото со кое им се дозволува на работниците од Западен Балкан да имигрираат за работни цели беше воведено на почетокот на 2016 година, откако земјите од регионот беа прогласени за безбедни земји, со што практично беше исклучено стекнувањето на правата на азил во Германија за граѓаните на тие земји.
Ова правило имаше за цел да им овозможи на оние лица кои ќе најдат работа во Германија да имигрираат во Германија на редовна основа. За разлика од другите правила за трудови имигранти кои не доаѓаат од некоја од земјите на Европската унија, имиграцијата според Правилото за Западен Балкан не бара квалификации, туку само договор за вработување со работодавач во Германија.
Последната социјалдемократско-зелено-либерална влада ја удвои квотата според ова правило на 50.000 работни дозволи годишно пред помалку од една година. На крајот на минатата година, во Германија се регистрирани 79.500 лица врз основа на имиграција според правилата за Западен Балкан. Најголем број се од Косово, а потоа следат граѓаните на Босна и Херцеговина.
Граѓаните на шест земји од Западен Балкан (Албанија, Босна и Херцеговина, Црна Гора, Косово, Северна Македонија и Србија) исто така можат легално да имигрираат во Германија преку други програми за имиграција на квалификувана работна сила. Најголем проблем при издавањето на работните визи беше ограничениот капацитет на германските конзуларни претставништва, каде во почетната фаза се чекаше за термин повеќе од една година.
Свет
Американски режисер мора да плати 1,7 милијарди долари – 40 жени го обвинија за злоставување

Судот во Њујорк му наложи на американскиот режисер Џејмс Тобек, номиниран за Оскар, да плати отштета од 1,68 милијарди долари на 40 жени кои го обвинија за сексуален напад и други злосторства во последните четири децении.
Поротата во Њујорк одлучи дека Тобек ја злоупотребил својата позиција во филмската индустрија сексуално напаѓајќи жени во периодот од 1979 до 2014 година.
Тобек беше меѓу првите холивудски моќници кои беа обвинети за сексуално недолично однесување на почетокот на кампањата „MeToo“, а ова е најголемата сума пари што државата Њујорк нареди да им се исплати на жртвите кои ја покренаа иницијативата.
Тобек, кој се застапуваше себеси, ги негираше наводите, наведувајќи дека „секоја сексуална средба или контакт помеѓу тужителот и обвинетиот била консензуална“.
Покрај режисерското деби во „Fingers“ (1978), Тобек ги режираше „The Pick-up Artist“ (1987), „Two Girls and a Guy“ (1997), „Black and White“ (1999), „Tyson“ (2008), а исто така е познат и по неговото сценарио за „Bugsy“, кој не го режирал, но беше номиниран за Оскар за оригинално сценарио.
Свет
И Европската Унија ги стави на пауза царините за САД

Европската Унија одлучи да ги паузира своите контрамерки на американските царини на 90 дена за да отвори простор за преговори.
Вчера, само неколку часа пред американскиот претседател Доналд Трамп да објави дека ќе го одложи воведувањето на тарифите, 26 од 27 земји членки на ЕУ, сите, освен Унгарија, гласаа за воведување контрамерки.
Претходно денеска, претседателката на Европската комисија, Урсула фон дер Лајен, ја поздрави најавата на Трамп за пауза во примената на реципрочните царини.
„Јасните и предвидливи услови се клучни за функционирањето на трговијата и синџирите на снабдување“, напиша Фон дер Лејен на социјалната мрежа „Икс“.
Таа додаде дека царините се даноци што само им штетат на фирмите и на потрошувачите. „Затоа постојано се залагав за договор за царини нула за нула меѓу Европската Унија и Соединетите Американски Држави“, посочи таа.
Вчера, Трамп најави целосен прекин на царините, со исклучок на Кина, чии царини ќе бидат зголемени од 104 на 125 отсто.