Свет
Бајден: Му кажав на Нетанјаху дека Израел мора да го почитува законот за војна во одговорот на Хамас

Американскиот претседател Џо Бајден го предупреди Иран да „биди внимателен“ и му порача на израелскиот премиер Бенјамин Нетанјаху дека САД испраќаат воена помош во борбата на Израел против Хамас.
Обраќајќи им се на група водачи на еврејската заедница во САД, Бајден за прв пат го поврза распоредувањето на американската флота во источниот Медитеран во близина на Израел со стравувањата дека Иран може да се обиде да се меша.
„Ја преместивме американската носачка флота во источниот Медитеран и испраќаме повеќе борбени авиони во таа област и испративме јасна порака до Иранците: Бидете внимателни“, рече американскиот претседател.
Американските власти велат дека не биле во можност да воспостават директна врска меѓу нападите на Хамас врз Израел и вмешаност од Иран, но бараат таква бидејќи Техеран го поддржува Хамас. Бајден и неговиот тим се обидуваат да ги ослободат можните американски заложници кои ги држи Хамас.
Најмалку 22 американски државјани се меѓу загинатите во нападот на исламистичката организација врз Израел од Појасот Газа, потврди Стејт департментот, а најмалку 17 Американци се водат како исчезнати.
Белата куќа соопшти дека потврдениот број на Американци убиени или земени како заложници може да се зголеми.
Бајден на средбата, како што јави Франс прес, рече и дека бара од Израел да го почитува законот за војна во одговорот на нападот на Хамас.
„Едно нешто што му кажав на израелскиот премиер е дека е многу важно Израел, со сиот гнев и фрустрација, да дејствува во согласност со воените права“, рече Бајден.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Пратеник најден мртов во парламентот во Финска

Безживотно тело е пронајдено денес околу 11 часот наутро во зградата на финскиот парламент, а според релевантните локални медиуми, станува збор за тело на пратеник кој извршил самоубиство, но сè уште не го објавуваат неговиот идентитет.
Полицијата не ги потврди наводите дека станува збор за пратеник, но објави дека засега нема сомнение за кривично дело.
Повикот до полицијата пристигна во 11.06 часот наутро.
Шефот на обезбедувањето на парламентот, Аро Тоивонен, рече дека имало смртен случај во зградата на парламентот, но дека на властите е да дадат дополнителни информации за случајот.
Еден од пратениците рече дека не знае многу за случајот.
„Немам никакви подетаљни информации. Тоа е навистина тажна работа, за што многу ми е жал“, рече пратеникот Јука Копра.
Копра додаде дека претпоставува оти парламентот ќе даде официјално соопштение кога тоа ќе биде можно.
Во овој момент во зградата на парламентот има голем број полицајци, а надвор беа видени неколку возила за итни случаи.
Свет
Лавров: Трамп и неговиот тим сакаат да постигнат долгорочен и сигурен резултат

Рускиот министер за надворешни работи, Сергеј Лавров, го пофали Доналд Трамп за желбата за траен мир во Украина, а ги критикува европските лидери за инсистирањето на прекин на огнот.
Во интервју за државниот телевизиски канал „Росија 24“, Лавров се осврна на средбата на Трамп со Владимир Путин на Алјаска опишувајќи ја атмосферата како „многу добра“.
„Беше јасно дека лидерот на Соединетите Американски Држави и неговиот тим, пред сè, искрено сакаат да постигнат резултат што ќе биде долгорочен, одржлив, сигурен“, додаде Лавров.
Оваа изјава доаѓа еден ден откога Трамп изјави дека прекинот на огнот не е неопходен услов за постигнување мировен договор за време на тековниот конфликт меѓу Русија и Украина.
Од друга страна, Лавров упати остри критики до европските лидери. Според него, на секој чекор тие инсистирале само на прекин на огнот, а потоа ќе продолжат да ja снабдуваат Украина со оружје.
Свет
Швајцарија планира укинување на даночната казна за брак

Швајцарија планира да го укине системот на заедничко даночење брачни парови, кој често доведува до повисоки даноци отколку за невенчани двојки.
Поддржувачите велат дека оваа промена ќе поттикне повеќе жени да работат и ќе ја усогласи земјата со практиките на повеќето држави од ОЕЦД.
Сепак, конзервативните партии и црковните групи најавуваат иницијатива за референдум тврдејќи дека реформата ги казнува семејствата со еден примател на приход и би создала милион дополнителни даночни пријави.
Владата проценува дека половина од граѓаните би имале корист, 14 проценти би биле во полоша положба, а годишните приходи од даноци би се намалиле за речиси една милијарда франци.