Свет
Белоруското МВР не знае ништо за притворањето на Марија Колесникова

Белоруското Министерство за внатрешни работи нема информации во врска со притворањето на членот на Президиумот на Советот за координација на опозицијата Марија Колесникова и нејзините колеги, изјави за ТАСС портпаролката на министерството, Олга Чемоданова.
„Министерството за внатрешни работи нема на располагање информации за притворањето на Колесникова и нејзините колеги“, рече таа.
Претходно, белоруските медиуми соопштија дека утринава неидентификувани лица ја киднапирале Колесникова во близина на Националниот музеј на уметноста во Минск. Таа, наводно, била принудена да влезе во комби на кое имало ознака „Комуникации“. Полицискиот оддел во Минск за ТАСС изјави дека ги проверува извештаите за исчезнувањето на Колесникова.
Поранешната претседателска кандидатка Светлана Тихановскаја ги смета белоруските власти одговорни за исчезнувањето на Колесникова.
„Режимот на белорускиот претседател Александар Лукашенко покажува дека тој дејствува само со заплашување. Киднапирањето на Марија Колесникова, Антон Роденков и Иван Кравцов е обид да се наруши активноста на Координативниот совет. Сепак, ова нема да нè спречи. Колку повеќе нè заплашуваат, толку повеќе луѓе ќе излезат на улица. Ние ќе ја продолжиме борбата, ќе бараме ослободување на сите затвореници и нови фер избори “, рече таа.
Претходно, членот на Президиумот на белорускиот опозициски Координативен совет, Максим Занк, за ТАСС потврди дека неговите обиди за контакт со Колесникова биле неуспешни. Прес-службата на Советот соопшти дека адвокатите бараат и претставници на Советот Иван Кравцов и Антон Роденков, кои остануваат недостапни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Сомнителен дрон пронајден во Полска, војската на терен

Дрон за кој се сомнева дека е руски е пронајден во поле со пченка во близина на Ѓалов во Варминско-мазурскиот регион на Полска. Леталото го забележал земјоделец додека работел со комбајн, по што надлежните служби веднаш излегле на терен, пишува wiadomosci.dziennik.pl.
Според првичните информации, состојбата на пронајдениот дрон укажува дека може да биде еден од оние што влегле во полскиот воздушен простор ноќта помеѓу 9 и 10 септември оваа година.
Во истрагата учествуваат полицијата, воената полиција и обвинител, под чиј надзор ќе се спроведуваат понатамошни дејствија.
Полскиот воздушен простор беше нарушен од беспилотни летала ноќта помеѓу 9 и 10 септември за време на рускиот напад врз Украина. Потоа беа активирани одбранбени процедури, а неколку од 19-те авиони што влегоа во полскиот воздушен простор беа соборени од полските и сојузничките воздухопловни сили.
Тоа беше првпат полските воздухопловни сили да користат оружје за неутрализирање на беспилотни летала над сопствената територија.
Свет
(Видео) Трамп: Го прашав Путин дали е тигар од хартија

Американскиот претседател Доналд Трамп изјави дека во еден од неговите разговори со рускиот претседател Владимир Путин отворено ја довел во прашање моќта на Русија, велејќи му дека изгледа како „хартиен тигар“.
Обраќајќи се вчера кон американските генерали, Трамп повторно изрази разочарување од рускиот лидер за тоа што, како што рече, брзо не ја завршил војната во Украина.
„Му реков: ‘Знаеш, не изгледаш добро. Четири години водиш војна што требаше да трае една недела. Дали си тигар од хартија?’“, рече Трамп.
На 23 септември, Трамп јавно ја спореди Русија со „тигар од хартија“, велејќи дека земјата води војна повеќе од три години без никаква цел. Според него, вистинска воена сила во таква ситуација би победила во рок од една недела.
Претседателот на САД, исто така, нагласи дека Украина може целосно да го врати својот територијален интегритет бидејќи Русија се соочува со сериозни економски проблеми.
Портпаролот на Кремљ, Дмитриј Песков, реагираше на изјавите на Трамп, велејќи дека Русија почесто се поврзува со мечка отколку со тигар. „Нема мечка од хартија“, рече Песков.
фото: принтскрин
Свет
Германија го запре, а потоа повторно го одобри извозот на оружје во Израел

Германија одобри извоз на оружје за Израел во вредност од најмалку 2,46 милиони евра откако беше воведена делумната забрана за извоз, покажува одговорот на Федералното министерство за економија на парламентарната истрага на Левичарската партија. Пратките вклучуваат „друга воена роба“ и не вклучуваат воено наоружување, соопшти министерството.
Канцеларот Фридрих Мерц на 8 август нареди привремено запирање на извозот на воена опрема што може да се користи во конфликтот во Газа. Овој потег беше одговор на сè поагресивните воени дејствија на Израел и означи промена во германската политика кон земјата. Пред тоа, Берлин постепено ги засили критиките кон владата на премиерот Бенјамин Нетанјаху, но се воздржа од санкции.
Не беа издадени дозволи за извоз во првите пет недели по забраната. Сегашните дозволи, кои го опфаќаат периодот до 22 септември, покажуваат дека пратки во вредност од 2,46 милиони евра се извршени помеѓу 13 и 22 септември. За споредба, од 1 јануари до 8 август 2024 година, дозволите за извоз за Израел изнесуваа вкупно околу 250 милиони евра.
Точната природа на стоката останува нејасна. Во одговорот на министерството се наведени осум категории, вклучувајќи ракети, торпеда, воени бродови и поморска опрема. Но, бидејќи извозот не е класифициран како оружје за војна, а вкупната вредност е релативно мала, пратките веројатно вклучуваат прибор или опрема.
Делумното запирање предизвика критики во Израел. Нетанјаху ја обвини Германија дека ја наградува палестинската милитантна група Хамас за тероризам, изразувајќи го своето разочарување директно до Мерц.
фото: принтскрин