Свет
Британија воведе санкции на Руси вклучени во депортирањето украински деца

Британската влада соопшти дека вовела нови санкции, вклучително и против рускиот министер за образование, Сергеј Кравцов, поврзани со присилната депортација на украински деца од Москва.
Велика Британија санкционира 14 лица како одговор на обидите на Русија да го уништи украинскиот национален идентитет, од кои 11 се вклучени во присилното преместување на децата.
„Во неговата застрашувачка програма за присилна депортација на деца и пропагандата исполнета со омраза што ја исфрлаат неговите слуги, ја гледаме вистинската намера на Путин – да ја избрише Украина од картата“, рече британскиот министер за надворешни работи, Џејмс Клеверли, во изјавата.
„Денешните санкции ги тераат на одговорност оние што го поддржуваат режимот на Путин, вклучително и оние што би ја виделе Украина уништена, нејзиниот национален идентитет и иднина избришани.
Руската министерка за култура, Олга Љубимова, беше санкционирана за давање поддршка за промовирање политики и акции кои ја дестабилизираат Украина или го загрозуваат територијалниот интегритет, соопшти Британија.
Претходно овој месец, Русија соопшти дека на своја територија донела речиси 700.000 деца од конфликтните зони во Украина. Од Москва објаснија дека програмата за носење деца од Украина на руска територија е за да ги заштитат сирачињата и децата напуштени во зоната на конфликтот.
Сепак, Украина тврди дека многу деца биле незаконски депортирани, а САД велат дека илјадници деца биле насилно отстранети од своите домови. Украинското Министерство за интеграција на окупираните територии соопшти дека 19.492 украински деца во моментот се сметаат за незаконски депортирани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Поради гладување 90.000 жени и деца итно имаат потреба од медицинска интервенција во Газа

Секој трет жител на Појасот Газа со денови не добива храна, предупреди Светската програма за храна (WFP) на Обединетите нации. Во последното соопштение се наведува дека 90.000 жени и деца итно имаат потреба од медицинска интервенција поради тешка неухранетост.
Според Министерството за здравство во Газа, само вчера починале уште девет лица од глад, со што бројот на жртви од неухранетост од почетокот на конфликтот достигна 122.
Израел, кој го контролира влезот на сите залихи во Газа, повторува дека не постои блокада и ја обвинува Хамас за лошата распределба на ресурсите.
Меѓународната заедница, вклучувајќи ги Германија, Франција и Велика Британија, побара итно олеснување на влезот на помошта, а генералниот секретар на ОН Антонио Гутереш остро ја осуди „рамнодушноста и недостигот на човечност“ во глобалниот одговор на кризата.
Регион
Големи пожари беснеат на најмалку пет различни локација во Грција

Во источниот дел на областа Атика, поширокиот регоион на Атина, во северна Грција, на островите Евија и Китира, како и во јужниот дел на Пелопонез, попладнево се активни големи пожари, а од бројот 112 за итни случаи беа испратени низа пораки до жителите на зафатените области.
Во пожарот во централна Евија, изгореа две противпожарни возило, а четворица пожарникари со полесни повреди на рацете и очите и со респираторни проблеми биле префрлени во болница.
Во сите пожари, беа превентивно евакуирани жителите на населените места во непосредна близина на огнената стихија, откако од бројот 112 за итни случаи беа испратени соодветни пораки.
За Атика, Евија и за дел од Пелопонез за денеска имаше предупредување за екстремно голема опасност од пожари, категорија пет, што воедно е и највисоката категорија во прогнозите за опасност од пожари на Министерството за цивилна заштита и климатски кризи на Грција.
Свет
Најмалку 25 лица загинаа во текот на ноќта во нови напади на израелската армија врз Појасот Газа

Најмалку 25 лица загинаа во текот на ноќта во нови напади на израелската армија врз Појасот Газа, во време кога мировните преговори се во застој.
Според здравствени извори, голем дел од жртвите се убиени додека чекале хуманитарна помош во близина на граничниот премин Зиким со Израел. Меѓу загинатите има и четири лица од иста семејна зграда во градот Газа.
Организацијата на Обединетите нации предупреди на ризик од масовна глад во енклавата, и покрај тврдењата на Израел дека не ги блокира доставите на помош. Според ОН, големиот дел од помошта не може да стигне до населението поради воени блокади и грабежи.
Преговорите за прекин на огнот меѓу Израел и Хамас се прекинати, откако американските и израелските преговарачи се повлекоа од Катар. Израелскиот премиер Бенјамин Нетанјаху најави дека се разгледуваат „алтернативни опции“, додека Хамас смета дека повлекувањето било тактика на притисок.