Свет
Велика Британија направи клучен чекор кон легализирање на евтаназијата

Британскиот Парламент денеска гласаше за легализирање на потпомогнатото самоубиство, отворајќи го патот за понатамошна дебата на тема која ја подели земјата и ги доведе во прашање стандардите на палијативната нега.
По вжештената дебата во Долниот дом на британскиот парламент, 330 претставници гласаа за законот, а 275 од нив беа против.
Според законот, на голем број луѓе во Англија и Велс, на кои лекарите им процениле дека имаат уште шест месеци живот или помалку, ќе им биде дозволено да изберат да го завршат својот живот со медицинска помош.
Поддржувачите на законот тврдат дека станува збор за скратување на животот на неизлечиво болните, на кои на тој начин им се дава поголема контрола.
Но, противниците велат дека ранливите болни луѓе можеби ќе сакаат да го завршат својот живот од страв дека инаку ќе бидат товар за нивните семејства и општество, а не за своја корист.
Други рекоа дека немало доволно време да се разгледа законот пред гласањето.
Првичното одобрување на законот во парламентот ќе започне повеќемесечна дебата, а самиот текст би можел да се промени како што ќе премине од долниот дом во горниот дом на парламентот.
Ким Лидбитер, лабуристичката пратеничка која го претстави предлог-законот, рече дека очекува процесот да потрае дополнителни шест месеци.
Предлог-законот предизвика национална дебата во Велика Британија, во која беа вклучени поранешни премиери, верски лидери, болничари, судии, лица со посебни потреби и министри во лабуристичката влада на премиерот Кир Стармер.
Анкетите покажуваат дека мнозинството Британци го поддржуваат потпомогнатото самоубиство. Лидбитер рече дека законот треба да одговори на јавното мислење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Шефот на ОН го осуди терористичкиот напад во Индија

Генералниот секретар на Обединетите нации, Антонио Гутереш остро го осуди нападот врз туристи во индиски Кашмир во кој вчера загинаа најмалку 26 лица, изјави неговиот портпарол.
„Генералниот секретар нагласува дека нападите врз цивили се неприфатливи под никакви околности“, додаде тој, изразувајќи сочувство до семејствата на загинатите кои беа жртви на вооружен напад.
Милитанти отворија оган врз туристи во Пахалгам, на околу 90 километри од Сринагар на индиската територија Џаму и Кашмир, при што загинаа најмалку 26 лица.
Повеќето од загинатите се туристи, наводно од различни региони на Индија, а според најавата на првиот министер за Џаму и Кашмир, Омар Абдула, бројот на загинатите се уште се утврдува.
Одговорноста за нападот ја презеде милитантната група Кашмирски отпор.
Свет
Американскиот државен секретар го откажа учеството во мировните преговори за Украина

Американскиот државен секретар Марко Рубио нема да учествува на разговорите во Лондон со цел да се стави крај на војната во Украина, изјави портпаролката на Стејт департментот Тами Брус.
По разговорот со својот британски колега, на социјалната мрежа Икс Рубио најави дека ќе го одложи патувањето и ќе го посети Обединетото Кралство во наредните месеци.
Разговорите ќе продолжат, а на нив ќе присуствува и пратеникот на претседателот Доналд Трамп за Украина, генералот Кит Келог, додаде тој.
Сепак, не е јасно дали неговото отсуство значи дека Трамп ги намалил очекувањата на Вашингтон за состанокот во Лондон, откако во неделата рече дека се надева оти Москва и Киев ќе постигнат договор оваа недела за ставање крај на конфликтот во Украина.
„Во овој момент, додека се уште траат состаноците во Лондон, тој нема да биде присутен. Сепак, оваа изјава не се однесува на самите состаноци, туку на логистички прашања во неговиот распоред“, изјави Брус за новинарите на редовниот брифинг. „Генералот Келог е таму и тој ќе учествува во разговорите“, додаде таа.
Одлуката уследи по предупредувањето дека САД ќе се повлечат од напорите за постигнување мировен договор меѓу Русија и Украина доколку наскоро нема јасни знаци за напредок.
Европа
Телото на папата Франциско денеска ќе биде преместено во базиликата

Телото на папата Франциско утрово ќе биде пренесено во базиликата Свети Петар. Церемонијата започнува во 9 часот, соопшти Ватикан.
Телото на папата моментално е положено во ковчег во капелата на Домот Света Марта, каде што живеел за време на неговото папство.
Ватикан вчера соопшти дека погребот на папата Франциско ќе се изврши во сабота во 10 часот на плоштадот Свети Петар. Тој ќе биде погребан во базиликата Света Марија Велика во Рим.
На последното збогување ќе присуствуваат стотици илјади верници, како и странски лидери како американскиот претседател Доналд Трамп, францускиот претседател Емануел Макрон и украинскиот претседател Володимир Зеленски.