Свет
(Видео) Американец повикал помош и застрелал седум полицајци, пронајден е мртов

Седум полицајци се повредени кога доцна синоќа одговориле на повик за член на семејство во неволја кому, наводно, му била потребна итна помош во стан во Сан Антонио, соопшти полицијата.
Според началникот на полицијата во Сан Антонио, Бил Мекманус, полицајците биле застрелани еден по друг додека пристигале на местото на настанот, објави ABC News.
Осомничениот бил пронајден мртов во станот по повеќечасовен судир, рече Мекманус. Истрагата се уште утврдува дали смртта е последица на самоубиство или на местото на настанот била повикана екипа на специјалци. На сите полицајци им биле укажани повреди кои не се опасни по живот, потврдија властите.
Првиот полицаец кој дошол на местото на настанот бил застрелан во нозете, а вториот бил ранет набргу, соопшти полицијата. Третиот полицаец пристигнал подоцна и исто така бил ранет, а потоа четвртиот полицаец бил застрелан во горниот дел на трупот, потврди полицијата.
Дополнителни детали за преостанатите тројца полицајци не се објавени. Идентитетот на полицајците сè уште не е објавен, но началникот на полицијата Мекманус рече дека секој од нив има меѓу четири и осум години искуство
Осомничениот е маж на 40-годишна возраст, а полицијата се уште не го соопшти неговиот идентитет.
Според полицијата, тој бил уапсен на 18 јануари под две обвиненија за напад и возење под дејство на алкохол.
Во моментот на нападот врз полицајците бил на слобода со кауција, потврди Мекманус.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Тинејџерка со сведоштво за терористичкиот напад во црква во Сирија: Секој тука е нечиј роднина

Повеќе од 20 лица загинаа, а 50 беа повредени во терористичкиот напад во православната црква Свети Илија во Дамаск, што се случи во неделата за време на литургијата.
Меѓу луѓето што биле во црквата тој ден е и студентката Ана (19), која вели дека во таа христијанска заедница сите се поврзани и дека трагедијата ги шокирала.
„Секој овде е нечиј роднина. Кога едно лице умира, се чувствуваме како сите да губиме дел од себе. Експлозијата нè потресе сите. Видов млади мажи, соседи, како скокаат да ја спречат, но не можеа. Луѓето беа во шок кога се случи, многу од жртвите беа жени што ги гледав во црква секоја недела“, рече Ана.
После тоа, семејствата во Двела, сиромашна населба што веќе се соочуваше со сериозни економски тешкотии, беа принудени да собираат донации преку групни фондови само за да ги погребаат своите роднини и пријатели. На место каде што верата и сиромаштијата одат рака под рака, тагата доаѓа со висока цена.
Ана рече дека имало инциденти во областа што му претходеле на нападот.
„Само пред неколку месеци, кога автомобил застанал пред истата црква што промовирала исламски прозелитизам, жителите реагирале бурно, бркајќи ја групата, а видеа од конфронтацијата подоцна се појавиле на интернет. Оттогаш, членовите на заедницата се соочувале со закани на социјалните медиуми“, рече таа.
По нападот од 22 јуни, сириската влада реагираше брзо. Претседателот Ахмад ал-Шара го осуди нападот.
„Ветуваме… дека ќе работиме дење и ноќе, мобилизирајќи ги сите наши специјализирани безбедносни агенции, со цел да ги уапсиме сите оние кои учествувале и го планирале ова гнасно злосторство и да ги изведеме пред лицето на правдата. Нападот нè потсетува на важноста на солидарноста и единството на владата и народот во лицето на сè што ја загрозува безбедноста и стабилноста на нашата нација“, додаде тој.
Министерството за внатрешни работи подоцна ја обвини Сараја Ансар ал-Суна за бомбардирањето, „спиечка“ ќелија поврзана со групата Исламска држава, покренувајќи прашања за нејзиното потекло, мотиви и потенцијални врски со други џихадистички мрежи.
Министерството соопшти дека ќелијата е откриена во рации спроведени во соработка со военото разузнавање.
.
Свет
(Видео) Брод со илјадници автомобили потона во Тихиот Океан три недели по избувнувањето на пожар

Товарниот брод Morning Midas потонал во Тихиот Океан во понеделникот, откако горел три недели, и со себе повлекол илјадници автомобили од товарниот простор.
Morning Midas потонал на околу 667 километри од брегот, откако претрпел оштетувања од пожарот и од лошите временски услови, се наведува во соопштението на компанијата Zodiac Maritime, која управувала со бродот. Ниту еден дел од товарот не бил спасен пред потонувањето, соопшти компанијата.
🇨🇳 🇲🇽 BUQUE CON AUTOS ELÉCTRICOS SE HUNDE EN EL PACÍFICO 🚢
Morning Midas, un buque con más de 3,000 vehículos eléctricos procedentes de China con destino a México, se hundió en el Pacífico tras incendiarse por fallas en las baterías.
El incidente ocurrió a 770 km de Alaska. La… pic.twitter.com/qYMMEIkoB2
— México Ahora (@AhoraMex) June 26, 2025
Бродот, долг околу 180 метри, превезувал 70 електрични возила, 681 хибрид и повеќе од 2000 конвенционални автомобили, соопшти американската крајбрежна стража. На бродот имало и повеќе од 1800 метрички тони бродско гориво, што претставува потенцијален ризик од истекување нафта.
Крајбрежната стража во вторникот соопшти дека засега нема видливи знаци на загадување. Два спасувачки влечни брода останале во близина на местото на потонувањето за да ја надгледуваат можноста за загадување и остатоците од бродот, а уште еден брод е на пат за да го заштити морскиот екосистем, соопшти Zodiac Maritime.
Сите 22 членови на екипажот биле евакуирани со спасувачки чамец и биле спасени од комерцијален брод, набрзо по избувнувањето на пожарот на 3 јуни, додека бродот се наоѓал околу 1930 километри од Анкориџ.
Бродот бил на пат од Кина кон Мексико. Дим почнал да се издига од палубата каде што биле сместени електричните возила, а екипажот испратил повик за помош откако не успеал да го стави пожарот под контрола, соопшти Zodiac Maritime. Противпожарни и спасувачки бродови стигнале до Morning Midas една недела по избувнувањето на пожарот. Тој во меѓувреме сам се изгаснал, но бродот сепак потонал.
Либерија, под чие знаме пловел бродот, ќе спроведе истрага за причината на пожарот, додека компанијата Zodiac Maritime ќе спроведе посебна интерна истрага.
И Zodiac Maritime и Крајбрежната стража изјавија дека е прерано да се донесат заклучоци дали електричните возила го предизвикале пожарот. Електричните возила содржат литиум-јонски батерии кои можат да се прегреат и да предизвикаат пожар што брзо се шири и произведува отровни гасови, што го прави гасењето тешко и опасно.
Свет
Израелскиот министер: Ако ајатолахот беше на нишан, ќе го елиминиравме

Израелскиот министер за одбрана Израел Кац откри во интервју за „Канал 13“ дека Израел имал намера да го елиминира врховниот лидер на Иран, ајатолахот Али Хамнеи, но дека таа можност никогаш не се појавила.
„Да беше на нишан, ќе го елиминиравме. Сакавме да го елиминираме Хамнеи, но немаше оперативна можност“, рече Кац.
На прашањето дали Израел побарал американско одобрение за таква акција, Кац одговори: „Не ни треба дозвола за тие работи“.
Минатата недела, Ројтерс, повикувајќи се на двајца американски функционери, објави дека американскиот претседател Доналд Трамп ставил вето на израелскиот план за атентат врз иранскиот ајатолах.
Трамп подоцна го нарече ајатолахот „лесна цел“ во објава на неговата социјална мрежа Truth Social.
„Знаеме точно каде се крие таканаречениот „врховен лидер“. Тој е лесна цел, но таму е безбеден – сè уште нема да го отстраниме (убиеме)! Но, не сакаме ракети испукани врз цивили или американски војници. Нашето трпение е при крај. Ви благодариме за вашето внимание!“, напиша тој во таа пригода.