Пред домот за стари лица во Бараево, каде што утринава избувна пожар во кој досега загинаа осум лица, а седум беа повредени, пристигнуваат видно потресени членови на семејството на жителите на домот. Мажот, чија мајка била корисничка на домот за „Блиц“ изјави дека нема информации дали мајка му е жива, и дека се надева на најдобро.

Таа била на приземје во делот кој изгорел. „Немам информации дали е жива и каде е. Последен пат бев тука на 9 јануари кога на мајка ми и донесов работи и се што и требаше. Таа потоа прими терапија“, раскажува тој за „Блиц“.

На местото на настанот пристигнала и брачна двојка, а таткото на мажот бил жител на овој дом.
„Свекор ми беше внатре, во самиот дел кој целосно изгоре. Токму под оџакот“, вели видно потресена жена.

Таа додава дека немаат информации за неговата состојба, но дека знаат дека се пронајдени четири машки тела во целосно јагленисана состојба.
Медиумите потсетуваат дека најмалку осум лица загинаа, а неколку се повредени во пожар што утринава околу 4 часот и 30 минути избувна во дом за стари лица во Србија.

Како што соопштија од српската полиција, постојат основи на сомнение дека пожарот е подметнат, а полицијата во соработка со надлежното обвинителство продолжува интензивно да работи на утврдување на сите околности и факти за овој настан.

Во моментот на пожарот во домот имало 30 лица, од кои осум починале, седум лица се повредени, од кои на тројца им била укажана лекарска помош во Ургентниот центар, а четворица на ВМА. Останатите корисници се сместени во друг дом за стари лица, пренесува медиумот.

Хамас објави дека палестинска затвореничка се уште е во затвор, а според договорот со Израел таа требаше да биде ослободена, пренесува Ynet. Одделот за затвореници на Хамас потврди дека тие работат со посредници и Црвениот крст за да извршат притисок врз Израел да се придржува до договорената листа на затвореници.

Во согласност со условите од договорот, израелската затворска служба синоќа ослободи 90 палестински безбедносни затвореници, откако првите тројца заробеници беа вратени од Газа. Меѓу затворениците имало 78 жители на окупираниот Западен Брег и 12 жители на окупираниот Источен Ерусалим. Меѓу ослободените има 69 жени, меѓу кои една малолетна, осум малолетни момчиња и 12 мажи осудени за кривични дела како што се поистоветување со тероризам и немири.

За време на првата фаза од договорот за прекин на огнот, планот е да се ослободат вкупно речиси 2.000 затвореници. Голем дел од затворениците Израел ги држи во таканаречен административен притвор, што значи дека против нив не се води кривична постапка, туку може да се држат на неодредено време.

Голем број високи дипломати од кариера денеска поднесуваат оставка од Стејт департментот, откако добиле инструкции да го сторат тоа од помошникoт на новоизбраниот претседател Доналд Трамп, изјавија за Вашингтон пост тројца неименувани американски функционери запознаени со ова прашање, пренесуваат медиумите во регионот.

Присилните заминувања, со цел да се воспостави решителен прекин со администрацијата на претседателот во заминување Џозеф Бајден, ќе ги напуштат одликуваните ветерани како Џон Бас, потсекретар за управување и вршител на должноста потсекретар за политички прашања и Џеф Пјат, помошник на државниот секретар за енергетски ресурси, изјавија официјални лица.

Тие рекоа дека барањето на Трамп за оставки на највисоките дипломати укажува на желба за брзо менување на составот на Стејт департментот. Клучните планови на Трамп вклучуваат воведување високи царини за Кина, Канада и Мексико, ставање крај на војната во Украина, зацврстување на примирјето меѓу Израел и Хамас и депортирање на милиони имигранти без документи од САД.

Тимот на Трамп во петокот јасно им стави до знаење на многу функционери на Стејт департментот кои работат како помошници секретари и на други високи позиции дека тие нема да бидат потребни откако тој денеска официјално ќе ја преземе функцијата. Новиот американски државен секретар Марко Рубио рече дека Стејт департментот треба да и даде приоритет на агендата на Трамп „Америка на прво место“ и вети дека „ќе го направи одделот повторно релевантен“, пренесува Танјуг.