Свет
(Видео) Дваесет камиони со хуманитарна помош влегоа во Газа

Првите камиони со хуманитарна помош за Појасот Газа поминаа низ единствениот граничен премин меѓу Египет и палестинската енклава, според снимките на египетската телевизија.
Дваесет камиони со медицински материјали треба да влезат во Појасот Газа, јавува египетскиот ТВ канал Ал Кахера. Ова се први испораки преку граничниот премин Рафа откако пред две недели избувна војната меѓу Израел и Хамас, исламистичката група која владее со Појасот Газа.
Германскиот канцелар Олаф Шолц го поздрави почетокот на испораката на помошта. „Точно и важно е првата хуманитарна помош сега да стигне до жителите на Газа. Ним им треба вода, храна и лекови – нема да ги оставиме сами“, напиша тој на социјалните мрежи. „Федералната влада продолжува да ги користи сите канали за да ги ублажи страдањата во овој конфликт.
Шефот на британската дипломатија Џејмс Клеверли го поздрави фактот што започна испораката на помош за Појасот Газа, но рече дека денешниот конвој не смее да биде единствениот. „Камиони кои носат помош за спасување на животи почнуваат да го преминуваат Рафах во Газа. Оваа помош е спас за оние кои страдаат. Но, тоа не може да биде еднократно“, напиша Клеверли на мрежата X.
Израел воведе „тотална опсада“ на палестинската територија по терористичкиот напад на милитантите на Хамас на 7 октомври, отсекувајќи го густо населениот крајбрежен појас на Медитеранот од храна, гориво, лекови, вода и други основни резерви, што доведе до страв од хуманитарен катастрофа.
Долга колона камиони со хуманитарна помош стои на преминот Рафа веќе со денови.
Два камиони со лекови и медицински тим планирале да ја поминат границата во текот на ноќта, изјави извор од египетските безбедносни сили за ДПА. Нивниот влез, сепак, беше запрен со израелско бомбардирање рано во саботата, додаде изворот, кој сакаше да остане анонимен.
Израел континуирано бомбардираше цели на Хамас со воздушни напади и мобилизираше стотици илјади воени резервисти пред очекуваната копнена офанзива во Појасот Газа.
САД и агенциите на ОН, меѓу другите, очекуваа Рафа да се отвори за помош во среда. Египетските и американските власти ја наведоа потребата од поправка на патот како една од причините за доцнењето.
Шефот на ОН, Антонио Гутереш, кој го посети преминот во петокот, ги нарече хуманитарните конвои „спас“ за цивилите кои страдаат во Газа.
Палестинските милитанти продолжуваат да истрелуваат ракети од Газа кон Израел. Предупредувачките сирени се огласија во израелскиот пристанишен град Ашдод, северно од Газа, во саботата наутро, соопшти израелската војска.
Засега нема информации за штети или жртви.
Градовите и заедниците кои се најблиску до границата беа главно евакуирани за да се заштити цивилното население. Крајбрежниот град Ашкелон, исто така, доби неколку предупредувања за ракети во петокот вечерта.
Egyptian Trucks 🇪🇬 with humanitarian aid, including medicines, food and water have begun to pass through the Egyptian 🇪🇬 checkpoint in Rafah into GAZA pic.twitter.com/aytu4OcX5i
— أحمدصالحAhmd Saleh (@iahmedsalih) October 21, 2023
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Пленковиќ: Новите членки на ЕУ немаат право на донесување одлуки, тоа би било како да бидете поканети на прием и да стоите напред додека другите се внатре

Хрватскиот премиер Андреј Пленковиќ денес на маргините на состанокот на Берлинскиот процес изјави дека се спротивставува на идејата новите членки на Европската унија првично да немаат целосни права на донесување одлуки. Пленковиќ учествуваше на самитот на Берлинскиот процес во Лондон, иницијатива воспоставена со цел да се приближат шест земји од Западен Балкан кон Европската унија.
Иако прашањето за проширувањето доби нов импулс поради променетите геополитички околности, некои европски политичари предупредуваат дека тоа не може да се постигне без да се промени начинот на кој функционира самата Европска Унија, особено во процесот на донесување одлуки.
Една идеја е дека потенцијалните нови членки немаат целосни права на глас сè додека ЕУ не го промени својот сегашен начин на функционирање, што им овозможува на поединечните земји да блокираат заеднички одлуки, што на пример, Унгарија често го прави.
„Оваа идеја циркулира во последните неколку години, но не сум особено ентузијастичен за тоа“, рече Пленковиќ на маргините на состанокот одржан во лондонскиот „Ланкастер Хаус“.
„Една од главните карактеристики на една држава е тоа што е почитувана. И е почитувана ако има еднакви права“, нагласи хрватскиот премиер.
Членството без право на донесување одлуки би било како „да бидете поканети на прием и да стоите напред додека другите се внатре“, смета Пленковиќ. „Не сум убеден во тоа“, додаде тој. Хрватскиот премиер рече дека пристапот на ЕУ кон проширувањето денес е многу „поотворен отколку што беше пред неколку години, земајќи ги предвид глобалните безбедносни предизвици што се одразуваат на стабилноста на Европа“.
Берлинскиот процес беше започнат во 2014 година.
Земјите кандидати треба да ја искористат оваа можност, но во исто време да ги „исполнат своите задачи“: да го прифатат acquis, да градат институции и да можат да го издржат притисокот на заедничкиот европски пазар, рече премиерот на крајот од состанокот на Берлинскиот процес.
Ова е формат започнат во 2014 година на конференција на земјите од Западен Балкан и на иницијатива на Германија, која тогаш ја водеше канцеларката Ангела Меркел. Процесот денес обединува шест земји од Западен Балкан, заедно со земјите партнери: Австрија, Бугарија, Хрватска, Франција, Германија, Грција, Италија, Полска, Словенија и Велика Британија, пишува хрвстаки „Индекс“.
Фото: принтскрин
Свет
Директорката на Лувр призна „сериозен пропуст“ по грабежот на музејот

Директорката на музејот Лувр, Лоренс де Кар, денес посочи, по грабежот на кралските вредни предмети од овој најпосетуван музеј во светот, дека имало „сериозен пропуст“ во безбедносните мерки и изјави дека понудила оставка, но била одбиена.
Во сведочењето пред францускиот Сенат, де Кар истакна дека музејот имал сериозен недостаток на безбедносни камери и други слабости што ги открил грабежот, според BFMTV.
Де Кар изјави дека „застарената инфраструктура“ на институцијата не дозволува интеграција на современи безбедносни системи, и покрај зголемените барања за засилена заштита.
Зборувајќи пред францускиот Сенат, де Кар нагласи дека „нема доцнење во спроведувањето на главниот план за безбедност на музејот“, но призна дека има значителни проблеми со состојбата на безбедносните точки и системот за надзор.
„Имаме застарена инфраструктура што не дозволува додавање на модерна опрема.
Исто така, се соочуваме со сериозни тешкотии во однос на безбедносните контролни пунктови, кои се во лоша состојба“, рече таа. Де Кар, исто така, призна дека безбедносниот тим не го забележал навреме доаѓањето на крадците, велејќи дека „слабостите во заштитата на надворешниот периметар на музејот се познати и веќе се идентификувани“. „Нашиот систем за видео надзор е недоволен, а постои и сериозен проблем со локацијата и состојбата на безбедносните контролни пунктови“, изјави де Кар и повика на формирање посебна полициска станица во самиот музеј.
Сепак, директорката на музејот истакна дека витрините што беа поставени во декември 2019 година во галеријата Аполон „претставуваат значаен напредок во однос на безбедноста“, додавајќи дека претходните беа „застарени и несоодветни“.
Под голем притисок поради кражбата, која го наруши угледот на Франција во светот, де Кар рече дека поднела оставка, но дека министерката за култура на Франција не ја прифатила.
„Денес доживуваме ужасен неуспех во Лувр, за кој јас преземам дел од одговорноста“, рече директорката. Лувр денес повторно се отвори за посетители, за прв пат по грабежот во кој беа украдени осум музејски експонати што му припаѓаа на кралското семејство.
Грабежот се случи во неделата, а штетата се проценува на повеќе од сто милиони американски долари. Внатрешноста на галеријата Аполо, каде што беа изложени крунските дијамантски скапоцености, е сè уште затворена, со преградна мрежа на влезот, објавува АП.
Француските власти велат дека крадците поминале помалку од четири минути во музејот, го користеле товарниот лифт од фасадата свртена кон Сена, скршиле прозорец и две витрини пред да избегаат со мотоцикли, објавува Танјуг.
За време на истрагата, на местото на злосторството се идентификувани четири лица, а околу 100 истражители работат на идентификување на членовите на групата и соучесниците.
Фото: принтскрин
Свет
Володин: Европските земји купуваат американски гас по цени на „Шанел“, штетејќи им на сопствените економии

Европските земји купуваат американски гас по цени на „Шанел“, штетејќи им на сопствените економии, изјави Вјачеслав Володин, претседател на Државната Дума, долниот дом на рускиот парламент.
„Гасот што се испорачува од Америка во Европа не е „Шанел“. Но, неговиот мирис беше ценет исто толку високо како францускиот парфем. И тие го купуваат, уништувајќи ги сопствените економии. И ги дигнаа во воздух нашите гасоводи, правејќи ги работите полоши за себе“, рече Володин за време на дебатата за буџетот на Руската Федерација за 2026 година и периодот на планирање од 2027 и 2028 година.
Според него, европските лидери покажуваат недостаток на одговорност кон интересите на своите граѓани.
„Иднината ќе покаже што направиле, бидејќи им недостасува одговорен став кон своите граѓани, за што зборуваме сега. Мораме да размислуваме за земјата, да размислуваме за нашите граѓани“, додаде претседателот на Државната Дума.
На 27 јули, претседателката на Европската комисија, Урсула фон дер Лајен, и Трамп се согласија Вашингтон да воведе царини од 15% на приближно 75% од европските стоки увезени во САД, почнувајќи од 1 август, наместо царината од 30% на целиот европски увоз со која се закани Белата куќа. За возврат, комисијата вети дека целосно ќе го забрани целиот увоз на руска енергија во ЕУ и ќе купи американска нафта, гас, нуклеарна опрема и гориво во вредност од 750 милијарди долари, како и дека ќе инвестира 600 милијарди долари во американската економија, анализираат медиумите.
Фото: принтскрин